Skanda Purana · Chapter 5.71

// vyāsa uvāca // //
bhagava nbhavatā sarvaṃ kathitaṃ devamūrtinā //
avaṃtītīrthamāhātmyaṃ pavitraṃ vedasaṃmitam

bhūyastu śrotumicchāmi tvatto brahmavidāṃ vara //
mahākālavane ramye avaṃtyāṃ bhuvi sattama //
tīrthāni katisaṃkhyāni vidyaṃte hyatra suvrata

// sanatkumāra uvāca // //
śrūyatāṃ bho dvijaśreṣṭha kathāṃ pāpaharāṃ parām //

umāmaheśvarasaṃvādaṃ nāradasya ca dhīmataḥ //
nāradena purā pṛṣṭaṃ praśnametaddvijottama

// nārada uvāca // //
bhagavañcchrotumicchāmi mahākāla vane śubhe //
tīrthāni yāni vartaṃte tāni no vada vistarāt

iti pṛṣṭastadā vipra nāradena purā'nagha //
uvāca ślakṣṇayā vācā umayā sahito haraḥ

// śrīmahādeva uvāca // //
śṛṇuṣva bho ṛṣiśreṣṭha mahākālavane śubhe //
tīrthāni yāni tiṣṭhaṃti tāni vakṣyāmi suvrata

puṣkarādyāni tīrthāni yāni kāni mahītale //
tāni sarvāṇi vartaṃte mahākālavanottame

asaṃkhyātasahasrāṇi koṭikoṭīni sattama //
rudrasare nimajjaṃti koṭitīrthaṃ tathocyate

nīhārakaṇikāvṛṣṭiṃ girau varṣaṃti kinnarāḥ //
hemaṃte caiva dṛśyaṃte tīrthe paiśācamocane

na hi saṃkhyāṃ vijānāmi tīrthānāṃ bhuvi sattama //
kiyanti saṃti tīrthāni liṃgāni ca tathaiva ca

tathā'pi ca prādhānyena kathayiṣyāmi sattama //
saṃvatsarasya yāvaṃti ahāni ca dvijottama

tāvaṃti prāpaṇīyāni prasiddhāni paraṃtapa //
vatsare paripūrṇe ca jāyate'vaṃtiyātrikā

vidhivatkurute yastu sākṣācchaṃbhurbhavecca saḥ //
manvaṃtarasahasreṣu kāśīvāse ca yatphalam

tatphalaṃ jāyate'vaṃtyāṃ vaiśākhe paṃcabhirdinaiḥ //
avaṃtī yātrā kartavyā prayatnena mumukṣuṇā

mādhave'pi viśeṣeṇa hyavaṃtīsnānamācaret //
yo hi vaiśākhamāsādya avaṃtyāṃ vyāsa mānavaḥ

saṃvatsaravratī snātastīrthetīṃrthe yathāvidhi //
dattvā dānāni sarvāṇi samūlaṃ phalamaśnute

bhuktvā bhogānsuvipulāñchivaloke mahīyate

māhātmyametacchivabhaktivarddhanaṃ yaśaskaraṃ puṇyavivarddhanaṃ ca //
yaḥ śrāvayedvā śṛṇuyācca bhaktyā kulaṃ samuddhṛtya haraḥ padaṃ vrajet

iti śrīskāṃde mahāpurāṇa ekāśītisāhasryāṃ saṃhitāyāṃ paṃcama āvaṃtyakhaṃḍe'vantīkṣetramāhātmye vyāsasanatkumārasaṃvāde 'vantīkṣetramāhātmyavarṇanaṃnāmaika saptatitamo'dhyāyaḥ

// cha //
//
iti śrīskāṃde mahāpurāṇe pañcama āvantyakhaṇḍe'vantīkṣetramāhātmyaṃ prathamaṃ sampūrṇam // ( ५-१) //