Skanda Purana · Verses 5.67-2

// īśvara uvāca //
saptaṣaṣṭikasaṃkhyākaṃ kedāreśvarasaṃjñakam //
devaṃ śṛṇu varārohe darśanātpāpanāśanam

sṛṣṭikāle purā devi devā vyāptā himena hi //
śītārttā vihvalāḥ sarve brahmāṇaṃ śaraṇaṃ gatāḥ

himādriṇārditāḥ sarve vayaṃ deva jagatpate //
trāhi bhītāṃścatuvaktra pitāmaha namo'stu te

devānāṃ vacanaṃ śrutvā proktaṃ vai brahmaṇā priye //
pīḍitā himaśailena śaṃkaraśvaśureṇa ca

nāhaṃ yātuṃ samartho'smi satyametanmayoditam// //
mahādeva mṛte devā gatiranyā na vidyate

sa eva śaraṇaṃ devaḥ sarveṣāṃ no bhaviṣyati //
tasyājñayā mayā sarve parvatā racitāḥ purā

kṛtā buddhirvicitrā ca himādriśca mayā kṛtaḥ //
asevyaḥ sarvajaṃtūnāmadhṛṣyo durgamo giriḥ

himācalasya tasyaiva śāstā devo maheśvaraḥ //
tasmādyāsyāmahe devā kailāsaṃ parvatottamam

yatra tiṣṭhati viśvātmā devadevo maheśvaraḥ //
evamuktvā gato brahmā devaiḥ sārddhaṃ mamāṃtikam //
dṛṣṭohaṃ pūjitastaistu stuto'haṃ vividhaiḥ stavaiḥ

mayā saṃmānitā devāścatuvaktraḥ prapūjitaḥ //
pūjayitvā mayā pṛṣṭo brahmā gamanakāraṇam //5.2.67.१ ०//
kiṃ kāryaṃ tridaśaiḥ sārddhamāgato'si pitāmaha //
kathitaṃ brahmaṇā sarvaṃ śrutaṃ sarvaṃ mayā priye

himācalaṃ samāhūya maryādā ca kṛtā mayā //
śailānāṃ rājarājatve himādriśca pratiṣṭhitaḥ

devānāṃ viṣayāścaiva gaṃdharvāṇāṃ tathaiva ca //
yakṣāṇāmatha nāgānāṃ kiṃnarāṇāṃ tathaiva ca

vidyādharāṇāṃ krīḍārthaṃ pṛthakpṛthaṅniveśitāḥ //
rūpato bhāti śaileṃdraḥ śuddhasphaṭikasaṃnibhaḥ

jāhnavīnirjharoṣṇīṣaḥ śarvāṇījanakastathā

sarvadevamayo divyaḥ sarvatīrthamayaḥ kṛtaḥ //
sarvāśramanivāsaśca sarvāmaraniṣevitaḥ

evaṃ saṃsthāpya śaileṃdraṃ liṃgamūrttirahaṃ sthitaḥ //
vikhyātastriṣu lokeṣu kedāreśvaranāmataḥ

udakaṃ nirmitaṃ tatra maṃtrapūrṇaṃ mayā priye //
māhātmyaṃ vividhaṃ proktaṃ liṃgasya ca jalasya ca

yotrāgatya naro bhaktyā samyaṅmāṃ pūjayiṣyati //
jalaṃ yo'traiva gṛhṇāti vidhānena varānane //
tasyodare bhaviṣyāmi liṃgarūpī na saṃśayaḥ

ityukte vacane devi sadevāsurapannagāḥ //
yakṣarakṣaḥpiśācāśca bhūtavaitālakiṃnarāḥ

vidyādharagaṇāścaiva mama darśanalālasāḥ //
samāyātā varārohe pītvā tatra jalaṃ śubham

dṛṣṭo'haṃ vidhinā taistu liṃgamūrttigataḥ priye //
mama tulyāśca te jātāstasminnadrivare sthitāḥ //
janalokagataiḥ siddhaiḥ pūjyamānā varānane

atha kālena bahunā śrutvā māhātmyamuttamam //
kedāreśvaradevasya jalasya ca viśeṣataḥ

manuṣyāḥ samupāyātāste rajobahulā yataḥ //
tamaḥprāyā viśālākṣi tadāhaṃ māhiṣaṃ vapuḥ

kṛtavāṃstadbhayārthāya na ca te bhītimāgatāḥ //
iha devotra devo'tra babhramuste didṛkṣavaḥ

na tairdṛṣṭo mahādevi yato'haṃ mahiṣākṛtiḥ //
sthito'smyalakṣyarūpeṇa tataste dīnamānasāḥ //
udvignā niśvasantaśca vairāgyaṃ paramaṃ gatāḥ

nātra devo na tīrthāni na gaṃgā puṇyadāyinī //
na dharmo na paro lokaḥ sarvame tadviḍambanam

evaṃ kila purāṇeṣu śrūyate sarvadā śrutau //
himālaye ca kedāraṃ liṃgaṃ mokṣapradāyakam

evaṃ tu vadatāṃ teṣāṃ mānuṣāṇāṃ yaśasvini //
ākāśādutthitā vāṇī mayā proktānukaṃpayā

amārgaṃ mā vadatvatra na niṃdyāḥ śrutayo'vyayāḥ //
purāṇaṃ nānyathā proktaṃ brahmaṇā lokakartṛṇā

ye niṃdaṃti purāṇāni dharmaśāstrāṇi nāstikāḥ //
te yāṃti narakaṃ ghoraṃ yāvadābhūtasaṃplavam

sadā devotra kedāraḥ svargamokṣapradāyakaḥ //
vidyate tridaśaiḥ pūjyaḥ satataṃ naiva dṛśyate

karoti pūjāṃ himavānmāsānaṣṭau ca śāśvatān //
himādristena puṇyena nagendrastu kṛto nagaiḥ //
sevyaśca ramaṇīyaśca sarvatīrthanamaskṛtaḥ

sarvaratnanidhānaśca devānāṃ vallabhastathā //
grīṣme caiva vasante ca devadevo'tra dṛśyate

niyatenaiva kālena mānuṣāṇāṃ ca sarvadā //
yadi buddhiḥ parā jātā sarvadā mama darśane

ākhyāsye tadupāyaṃ ca śrūyatāṃ sāvadhānataḥ //
mā vikalpo'tra karttavyaḥ sarvānkāmānavāpsyatha

kṣetrāṇāmuttamaṃ kṣetraṃ bhuktimuktipradāyakam //
pralaye'pyakṣayaṃ proktaṃ mahākālavanaṃ narāḥ

tatrāhaṃ saṃbhaviṣyāmi lokānāmanukaṃpayā //
liṃgarūpeṇa śiprāyāstaṭe puṇye suśobhane

someśvarasya devasya paścime sthānamuttamam //
prasiddhamupayāsyāmi kedāreśvaranāmataḥ

sarvadā darśanaṃ tatra mayā sārddhaṃ bhaviṣyati //
sarveṣāṃ ca pradāsyāmi sarvā nkāmānna saṃśayaḥ

iha yāvatphalaṃ tasmāddāsyāmi hyadhikaṃ tataḥ //
iti te mānavāḥ sarve śrutvā vāṇīṃ manoramām //
ākāśādutthitāṃ divyāṃ manaḥprahrādakārikām

gatā vanaṃ mahākālaṃ saṃsmaranto maheśvaram //
vikalpena vicitreṇa satyameveti nānyathā

snātvā śiprājale puṇye yāvatpaśyanti bhāskaram //
tāvadṛṣṭipathotpannaṃ liṃgaṃ pāpapraṇāśanam

atha te harṣitāḥ procuḥ kedāro'yaṃ na saṃśayaḥ //
dṛṣṭo'smākaṃ na sandeho gaṃgā śiprājale sthitā

tataste pūjayāmāsuḥ puṣpairnānāvidhaistathā //
pūjito'haṃ viśālākṣi teṣāṃ tuṣṭo varānane//

durlabho'tivaro dattaḥ kailāse sthānamuttamam //
akṣayaṃ ca padaṃ dattaṃ punarāvṛttivarjitam

ato'haṃ tridaśaiḥ proktaḥ kedāreśvaranā mataḥ //
prārthitaḥ parayā bhaktyā lokānāmanukaṃpayā

ihāgatya narā ye ca tvāṃ paśyaṃti subhaktitaḥ //
teṣāṃ phalaṃ tvayā deva dātavyamadhikaṃ yataḥ

himādrau himanāthasya yātrāyāḥ pratyahaṃ phalam //
labhante ca narā nityaṃ nātra kāryā vicāraṇā

brahmahā vā surāpo vā ste yī vā gurutalpagaḥ //
tatsaṃparkī naro yastu tvāṃ dṛṣṭvā kilviṣākaraḥ

so'pi yāti paraṃ sthānaṃ punarāvṛttivarjitam //
cāṃdrāyaṇānāṃ vidhi vacchatānāṃ caiva yatphalam //
tatphalaṃ samavāpnoti kedāreśvaradarśanāt

te narāḥ paśavo loke teṣāṃ janma nirarthakam //
yairna dṛṣṭo mahākāle kedāreśvarasaṃjñakaḥ

kaumāre yauvane bālye vārddhake yadupārjitam//
tatpāpaṃ saṃkṣayaṃ yāti kedāreśvaradarśanāt

himālayakṛtā yātrā tasyāḥ proktaṃ ca yatphalam//
tatphalaṃ samavāpnoti kedāreśvaradarśanāt

ityukto'haṃ tadā devi devaiḥ praṇatipūrvakam //
tatheti ca mayā proktaṃ te'pi devā divaṃ gatāḥ

eṣa te kathito devi prabhāvaḥ pāpanāśanaḥ //
kedāreśvaradevasya piśācākhyamataḥ śṛṇu

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe caturaśītiliṅgamāhātmye kedāreśvaramāhātmyavarṇanaṃnāma saptaṣaṣṭitamo'dhyāyaḥ