Skanda Purana · Chapter 5.67

śṛṇu vyāsa paraṃ tīrthaṃ bhuvi vikhyātamuttamam //
kuṭumbeśvareti vikhyāto nāmnā caiva maheśvaraḥ

tasya tīrthavaraṃ tīrthaṃ sarvatīrthaphalapradam //
yasmiṃstīrthe naraḥ snātvā kuṭumbī jāyate dhuvam

kuṭumbārthaṃ tapastepe purā dakṣaḥ prajāpatiḥ //
nāradena purā vyāsa putraṣaṣṭirvivāsitā

prajākāmaḥ sa dharmātmā suciraṃ vratamācarat //
sapatnīko mahātejā nirāhāro jitendriyaḥ

asmiṃstīrthe śuciḥ snāto japanbrahma sanātanam //
varṣāṇāmayutaṃ vyāsa tapastepe sudāruṇam

tena tīrthaprasādena labhetsa bahulāṃ prajām// pra
jāpatiriti khyāto jāto dakṣaḥ pratāpavān

brahmā'pi tatra vai paścāttapaḥ kṛtvā suduṣkaram //
niṣkalaṃ kamalaṃ rūpaṃ prāptavāṃstatkṣaṇādvidhiḥ

mahādevo'pi tatraiva prāptavānbrahmaṇaḥ padam //
caturmukhadharaṃ liṃgaṃ dṛśyate'dyāpi sattama

bhadrapīṭhadharā devī bhadrakālīti viśrutā //
tatraiva ca sadā vyāsa krīḍati sma dhṛtavratā

dvāre tiṣṭhati tatraiva bhairavaḥ kṣetrapālakaḥ //
pādena khaṃjatāṃ yātaḥ purā daityavarārditaḥ

putravatpālito devyā sadā tiṣṭhati tatsthale //
ye te devagaṇāḥ sarve tasmiṃstīrthe pratiṣṭhitāḥ

ṛṣayo'pi mahābhāgāḥ sadā parvaṇiparvaṇi //
āyāṃti caiva saṃdhyārthaṃ bahuputraprade sare

asmiṃstīrthe sadācārāḥ snānaṃ kurvanti ye narāḥ //
na teṣāṃ durlabhaṃ kiṃcijjāyate janmajanmani

mahābādhāsu ghorāsu mahāmārīṣu tatparaiḥ //
havanaṃ kriyate nityaṃ sarṣapai rājikairyavaiḥ

pāyasai rvividhairbhogaisteṣāṃ doṣo na jāyate //
durbhikṣe rājyabhraṃśe ca saṃgrāme bhṛśadāruṇe

pūjayetkṣettrapālaṃ ca sarvā''padi samāhitaḥ //
sarvaduḥkhavi nirmukto jāyate nā'tra saṃśayaḥ

snātvā kuṭuṃbake tīrthe pūjayitvā maheśvaram //
dānaṃ kūṣmāṃḍakaṃ dadyādbrāhmaṇāya tapasvine

sauvarṇamaṇi muktābhirvāso'laṃkārasaṃyutam //
dhanadhānyasamāyuktaḥ kuṭuṃbī jāyate naraḥ

phālgune ca site pakṣe yā vai caturdaśī bhavet //
trayodaśīyutā vyāsa śivarātristathocyate

taddine ca naraḥ snātvā rātrau jāgaraṇaṃ caret //
bilvodakena gaṃdhena bahupuṣpaphalaistathā

dhūpairdīpaiśca naivedyairvāso'laṃkārakādibhiḥ //
pūjayedyo naro bhaktyā girīśaṃ sagaṇaṃ param

tasya pāpaṃ kṣayaṃ yāti śivaloke mahīyate //
dvādaśaikādaśīpuṇyaṃ labhate bhuvi mānavaḥ

aśvamedhaphalaṃ tasya jāgare ca kṣaṇekṣaṇe //
tatastu prātarutthāya snānadānādikāḥ kriyāḥ

kṛtvā tu vidhivadvyāsa śivapūjā'rcanaṃ tathā //
viprāṃśca bhojayetsapta tasya puṇyaphalaṃ śṛṇu

kapilānāṃ savatsānāṃ sahasrāṇi caturdaśa //
vājapeya sahasrasya phalaṃ prāpnoti nānyathā

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe'vantīkṣetra māhātmye kuṭuṃbeśvaramāhātmyavarṇanaṃnāma saptaṣaṣṭitamo'dhyāyaḥ