સ્કંદ પુરાણ · અધ્યાય 5.64

॥ સનત્કુમાર ઉવાચ ॥ ॥
અતઃ પરં પ્રવક્ષ્યામિ વીરેશ્વરમથો શૃણુ ॥
તસ્મિંસ્તીર્થે નરઃ સ્નાત્વા વીરલોકમવાપ્નુયાત્

નાગાનાં પ્રવરં તીર્થં સર્વકામવરપ્રદમ્ ॥
કાલભૈરવમિત્યાખ્યં તચ્ચ તીર્થં પરં સ્મૃતમ્

યસ્ય દર્શનમાત્રેણ સર્વદુઃખાતિગો ભવેત્

॥ વ્યાસ ઉવાચ ॥ ॥
કસ્મિન્કાલે હિ વિખ્યાતં કાલભૈરવસંજ્ઞિતમ્ ॥
તીર્થં મુનિવરશ્રેષ્ઠ એતદ્વિસ્તરતો વદ

॥ સનત્કુમાર ઉવાચ ॥ ॥
પુરાઽયં ભૈરવો યોગી યોગિનીત્રાસકારકઃ ॥
કાલચક્રકૃતાઃ કૃત્યા યોગિનીનાં ગણાસ્તદા

તાસાં કાલીતિ વિખ્યાતા યોગિની પરમોત્તમા ॥
તયાયં પાલિતો નિત્યં પુત્રવદ્ભૈરવોઽમલઃ

તેનૈતે ચ વિનિર્ધૂતા દોષોત્પાતાશ્ચ સત્તમ ॥
ત્રિવિધા ભુવિ વિખ્યાતાઃ સર્વવિઘ્નકરાઃ પરાઃ

કાલકૃત્યાસ્તદા તેન ભ્રંશિતાઃ પરમાત્મના॥
મહામારી પૂતના કૃત્યા શકુની રેવતી ખલા

કોટરી તામસી માયા નવૈતા માતૃકાઃ સ્મૃતાઃ॥
દુષ્ટદોષવહા દુષ્ટાઃ સર્વપ્રાણિભયંકરાઃ

વશીચક્રે સ ધર્માત્મા સર્વકામવરપ્રદાઃ ॥
શિપ્રાતીરે સ્થિતો નિત્યં કૂલે ચોત્તરતઃ શુભે

ઊષરસ્ય પરે પૂર્વે સોઽપિ તિષ્ઠતિ સર્વદા ॥
આષાઢસ્ય સિતે પક્ષે રવિવારે સમાહિતઃ

નવમીં ચાઽષ્ટમીં પ્રાપ્ય ચતુર્દશ્યાં વિશેષતઃ ॥
પૂજાં કુર્વંતિ યે કેચિન્નરા નિશ્ચલમાનસાઃ

વિવાહે પુત્રજનને માંગલ્યે ચ શુભે પરમ્ ॥
પત્રપુષ્પાર્કગંધૈશ્ચ નૈવેદ્યૈર્વિવિધૈસ્તથા

તાંબૂલવાસગંધાદ્યૈઃ પૂજયેદ્વરદ રૂપિણમ્ ॥
વિપ્રાણાં ભોજનૈર્હોમૈસ્તર્પયેત્સતતં વિભુમ્

એતત્પરમકલ્યાણમેતત્પરમમંગલમ્ ॥
નત્વા સ્તુત્વા ચ તં દેવં સર્વકામાર્થસિદ્ધયે ॥

સકલકલુષહારી ધૂર્તદુષ્ટાંઽતકારી સુચિરચરિતચારી મુંડમૌંજીપ્રચારી ॥
કરકલિતકપાલી કુણ્ડલી દંડપાણિઃ સ ભવતુ સુખકારી ભૈરવો ભાવહારી

વિવિધરાસવિલાસવિલાસિતં નવવધૂરવધૂતપરાક્રમમ્ ॥
મદવિઘૂર્ણિતગોષ્પદગોષ્પદં ભવપદં સતતં સતતં સ્મરે

અમલકમલનેત્રં ચારુચંદ્રાવતંસં સકલગુણગરિષ્ટં કામિનીકામરૂપમ્ ॥
પરિહૃતપરિતાપં ડાકિનીનાશહેતું ભજ જન શિવરૂપં ભૈરવં ભૂતનાથમ્ ॥।

સબલબલવિઘાતં ક્ષેત્રપાલૈકપાલં વિકટકટિકરાલં હ્યટ્ટહાસં વિશાલમ્ ॥
કરગતકરવાલં નાગયજ્ઞોપવીતં ભજ જન શિવરૂપં ભૈરવં ભૂતનાથમ્

ભવભયપરિહારં યોગિનીત્રાસકારં સકલસુરગણેશં ચારુચંદ્રાર્કનેત્રમ્ ॥
મુકુટરુચિરભાલં મુક્તમાલં વિશાલં ભજ જન શિવરૂપં ભૈરવં ભૂતનાથમ્

ચતુર્ભુજં શંખગદાધરાઽઽયુધં પીતાંબરં સાંદ્રપયોદસૌભગમ્ ॥
શ્રીવત્સલક્ષ્મં ગલશોભિકૌસ્તુભં શીલપ્રદં શંકરરક્ષણં ભજે

લોકાઽભિરામં ભુવનાભિરામં પ્રિયાભિરામં યશસાભિરામમ્ ॥
કીર્ત્યાભિરામં તપસાઽભિરામં તં ભૂતનાથં શરણં પ્રપદ્યે

આદ્યં બ્રહ્મસનાતનં શુચિપરં સિદ્ધિપ્રદં કામદં સેવ્યં ભક્તિસમન્વિતં હરિહરૈઃ સૃષ્ટ્યાસહં સાધુભિઃ ॥
યોગ્યં યોગવિચારિતં યુગધરં યોગ્યાનનં યોગિનં વંદેહં સકલં કલંકરહિતં સત્સેવિતં ભૈરવમ્

ભૈરવાષ્ટકમિદં પુણ્યં પ્રાતઃકાલે પઠેન્નરઃ ॥
દુઃસ્વપ્નનાશનં તસ્ય વાંછિતાર્થફલં ભવેત્।

રાજદ્વારે વિવાદે ચ સંગ્રામે સંકટેતથા॥
રાજ્ઞા કુદ્ધેન ચાઽઽજ્ઞપ્તે શત્રુબંધગતે તથા

દારિદ્ર્યદુઃખનાશાય પઠિતવ્યં સમાહિતૈઃ ॥
ન તેષાં જાયતે કિંચિદ્દુર્લભં ભુવિ વાંછિતમ્

॥ ઇતિ ભૈરવાષ્ટકમ્ ॥ ॥
અસ્મિંસ્તીર્થે પ્રકર્તવ્યં સ્નાનદાનાદિકં નરૈઃ॥
સંસારભયભીતૈશ્ચ પૂજિતો ભૈરવો વરઃ ॥
તસ્માત્સર્વપ્રયત્નેન કર્તવ્યં તીર્થમુત્તમમ્

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં પઞ્ચમ આવંત્યખણ્ડે ઽવન્તીક્ષેત્રમાહાત્મ્યે કાલભૈરવતીર્થયાત્રાવર્ણનંનામ ચતુઃષષ્ટિતમોઽધ્યાયઃ