Skanda Purana · Verses 5.63-2

// śrīhara uvāca // //
dhanuḥsāhasranāmānamīśvaraṃ śṛṇu pārvati //
triṣaṣṭisaṃkhyakaṃ divyaṃ darśanātpāpanāśanam

vidūrathonāma nṛpaḥ khyātakīrttirabhūdbhuvi //
tasya putradvayaṃ jātaṃ sunītiḥ .sumatistathā

ekadā tu vanaṃ yāto mṛgayāṃ sa vidūrathaḥ //
dadarśa garttaṃ sumahadbhūmermukhamivodgatam

taṃ dṛṣṭvā ciṃtayāmāsa kimetaditi pārthivaḥ //
pātālavivaraṃ manye vaḍavānalasaṃnibham

ciṃtayanniva tatrāsau dadarśa vijane vane //
brāhmaṇaṃ suvrataṃ nāma tapasvinamakalmaṣam

sa taṃ papraccha nṛpatiḥ kimetaditi bho dvija

// brāhmaṇa uvāca // //
dānavaḥ sumahāvīryo vasatyugro rasātale //
kujaṃbhonāma vikhyāto bhinatti vasudhāmimām

tamajitvā kathaṃ rājyaṃ bhokṣyase vasudhādhipa //
tena vidhvaṃsitā viprā rātrau niḥsṛtya pārthiva

upadrutāstathā deśā dhvastāścaiva tathāśramāḥ //
āpyāyayati daityo'yaṃ sabalī muśalāyudhaḥ

yadi tvaṃ ghātayasyenaṃ pātālāṃtaragocaram //
tataḥ samastavasudhāpatireva bhaviṣyasi

iti vipra vacaḥ śrutvā maṃtrayāmāsa pārthivaḥ //
maṃtribhiḥ sahito'moghaṃ śrutvā muśalamadrije

taṃ maṃtraṃ kriyamāṇaṃ tu sūnubhyāṃ saha maṃtribhiḥ //
tatpārśvavarttinī kanyā śuśrāvātha mudāvatī

tataḥ katipayāhe tu tāṃ kanyāṃ jalajekṣaṇām //
jahāropavanāddaityaḥ kujaṃbhaḥ svasakhīvṛtām

etacchrutvā mahīpālaḥ krodhaparyākulekṣaṇaḥ //
uvāca putrau jāne'haṃ sakujaṃbho mahāsuraḥ

dṛṣṭvā bhūmau purā gatteṃ tatra saṃśayite mayi //
kathito dvijamukhyena mayā pṛṣṭena putrakau

sa hanyatāṃ so'paharttā mudāvatyāḥ sudurmatiḥ //
prasthitau nṛpabhaktyātha svasainyaparivāritau

tau sutau tatra saṃprāptau pātāle pitṛśāsanāt//
yuyudhāte kujaṃbhena svaśaktyā senayā vṛtau

tataḥ parighanistriṃśaśaktiśūlaparaśvadhaiḥ //
bāṇaiścirataraṃ yuddhaṃ teṣāmāsītsadāruṇam

tato māyābalavatā tena daityena tatkṣaṇāt //
amoghenādvitīyena muśalena varānane

hata sainyau raṇe baddhau rājaputrau mahābalau

tataḥ śrutvā mahīpālo vivarṇavadano'bhavat //
baddhaputraḥ parāmārttiṃ jagāma giriputrike

ruroda bahudhātyarthaṃ putrasnehena pārthivaḥ //
tato vilapatastasya mārkaṃḍeyo mahāmuniḥ //
anekasṛṣṭisaṃhāradṛṣṭakāryaparāvaraḥ

uditādityasaṃkāśaḥ saptakalpānugo vaśī //
ājagāma nṛpābhyāśe vilapaṃtaṃ dadarśa saḥ //
rājānaṃ kathayāmāsa trikālajño mahāmuniḥ

mā śucastvaṃ mahīpāla kṣattriyo'si dṛḍhavrataḥ //
kva śoka kva mahīpālo durjayo lokapālavat

śokaṃ kupuruṣācīrṇaṃ tyaja tvaṃ rājasattama //
udyamaṃ kuru rājeṃdra kujaṃbhaṃ ghātayiṣyasi

nātyuccaṃ meruśikharaṃ nātinīcaṃ rasātalam //
vyavasāyaḥ sakhā yasya nāsti dūre mahodadhiḥ

mahākālavane liṃgamārādhaya samāhitaḥ //
rūpeśvarasya devasya pārśve dakṣiṇataḥ sthitam

dhanuḥsāhasratulyaṃ tu muśalasya nivāraṇam //
dhanuḥ prāpsyasi rājeṃdra kujaṃbhaṃ vinipātaya

dhanuḥsāhasrahastaistu rakṣitaṃ yodhasattamaiḥ //
liṃgaṃ devāsurairyuddhe sahasrākṣeṇa sevitam //
iṃdreṇa ca dhanurlabdhaṃ jaṃbho vai yena pātitaḥ

tasya tadvacanaṃ śrutvā sa rājātha vidūrathaḥ //
jagāma tvarito devi mahākālavanaṃ śubham

dadarśa tatra talliṃgaṃ pūjayāmāsa bhaktitaḥ //
tasya tuṣṭastadā devo dadau divyaṃ dhanustadā

dhanuḥsāhasratulyaṃ ca muśalasya nivāraṇam //
dhanurlabdhvā tadā rājā baddhagodhāṃgulitravān//
jagāma dhīraḥ pātālaṃ tena gartena satvaram

tato jyāsvanamatyugraṃ sa cakre pārthivastadā //
yena pātālamakhilamāsīdāpūritāṃtaram

tato jyāsvanamākarṇya kujaṃbho dānaveśvaraḥ //
ājagāmātikopena svasainyaparivāritaḥ

tato yuddhamabhūttasya saha rājñā varānane //
dināni trīṇi sa yadā yodhitastena dānavaḥ

tataḥ kopaparītātmā muśalāyābhyadhāvata //
gaṃdhairmālyaistathā dhūpaiḥ pūjyamānaḥ sa tiṣṭhati

yāvadgṛhṇāti muśalaṃ tāvatsā ca mudāvatī //
pasparśa caṃdanavyājairanekaiśca punaḥpunaḥ

tataḥ sa gatvā yuyudhe musalenāsureśvaraḥ //
tadā musalapātāste dhanuṣā niṣprabhīkṛtāḥ

dhanurjyāghātaśabdena patite bhūtale tadā //
gato vaivasvataṃ lokaṃ kujaṃbhonāma dānavaḥ

tato'patatpuṣpavṛṣṭistasyopari mahīpateḥ //
jagurgaṃdharvapatayo devavādyāni sasvanuḥ

sa cāpi rājā taṃ hatvā putrau labdhvā sutāṃ tadā //
mudāvatīṃ mudā yukto harṣagadgadanirbharaḥ

putrābhyāṃ sahito devi susaṃpūrṇamanorathaḥ //
sāṃtaḥpuraparīvāraḥ punarāyādvarānane

mahākālavane ramye yatra talliṃgamuttamam//
pūjayāmāsa ratnaiśca vastrairābharaṇaistathā

tataḥ sa pūjito devaiḥ śakreṇa ca punaḥpunaḥ //
asya liṃgasya māhātmyāddhanuḥ prāptaṃ nṛpeṇa ३

kujaṃbho'pi hato daityo devavidveṣakārakaḥ //
dhanuḥsāhasranāmāyamataḥ khyātiṃ gamiṣyati

bhaktyā ye pūjayiṣyaṃti dhanuḥsāhasramīśvaram//
yāsyanti śatravasteṣāṃ kṣayaṃ naivātra saṃśayaḥ

arcite devadeveśe dhanuḥsāhasrike śive //
arcitāḥ sarvadevāḥ syurvaradāśca na saṃśayaḥ

prātarmadhye'parāhṇe ca dhanuḥsāhasrakaṃ śivam //
ye namanti narā nityaṃ na te narakabhoginaḥ

tīrthānāṃ ca yathā gaṃgā rakṣitā yodhasattamaiḥ //
tathāyaṃ rakṣako devo nāmnā dhanuḥsahasrakaḥ

tatra gaṃgāditīrthāni vidyante vividhāni ca //
surahasyātipuṇyāni sadyaḥ pāpaharāṇi ca

teṣāṃ phalaṃ vinirdiṣṭaṃ ye paśyanti tu bhaktitaḥ //
dhanuḥsāhasrakaṃ nāma sadā śatrukṣayaṃkaram

eṣa te kathito devi prabhāvaḥ pāpanā śanaḥ //
dhanuḥsāhasradevasya devaṃ paśupatiṃ śṛṇu

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe caturaśīti liṅgamāhātmye dhanuḥsāhasramāhātmyavarṇanaṃnāma triṣaṣṭitamo'dhyāyaḥ