Skanda Purana · Verses 5.62-3

śrīmārkaṇḍeya uvāca -
tato gacchettu rājendra karoḍīśvaramuttamam /
yatra vai nihatāstāta dānavāḥ sapadānugāḥ

indrādidevaiḥ saṃhṛṣṭaiḥ satataṃ jayabuddhibhiḥ /
teṣāṃ ye putrapautrāśca pūrvavairamanusmaram

kruddhairdevasamūhaiśca dānavā nihatā raṇe /
teṣāṃ śirāṃsi saṃgṛhya sarve devāḥ savāsavāḥ

nikṣipya narmadātoye bandhubhāvamanusmaram /
tatra snātvā surāḥ sarve sthāpayitvā umāpatim

indreṇa sahitāḥ sarve'pūjayaṃllokasiddhaye /
hṛṣṭacittāḥ surāḥ sarve jagmurākāśamaṇḍalam

dānavānāṃ mahābhāga sūditā koṭiruttamā /
tadā prabhṛti tattīrthaṃ karoḍīti mahītale

vikhyātaṃ tu tadā loke pāpaghnaṃ pāṇḍunandana /
aṣṭamyāṃ ca caturdaśyāmubhau pakṣau ca bhaktitaḥ /
upoṣya śūlinaścāgre rātrau kurvīta jāgaram

satkathāpāṭhasaṃyukto vedādhyayanasaṃyutaḥ /
prabhāte vimale prāpte pūjayettridaśeśvaram

pañcāmṛtena saṃsnāpya śrīkhaṇḍena ca guṇṭhayet /
śastaiḥ pallavapuṣpaiśca pūjayettu prayatnataḥ

bahurūpaṃ japanmantraṃ dakṣiṇāśāṃ vyavasthitaḥ /
yathoktena vidhānena nābhimātre jale kṣipet

tilāñjaliṃ tu pretāya dakṣiṇāśāmupasthitaḥ /
śrāddhaṃ tatraiva viprāya kārayedvijitendriyaḥ

viṣamairagrajātaiśca vedābhyasanatatparaiḥ /
gohiraṇyena sampūjya tāmbūlairbhojanaistathā

bhūṣaṇaiḥ pādukābhiśca brāhmaṇānpāṇḍunandana /
bhavetkoṭiguṇaṃ tasya nātra kāryā vicāraṇā

tasmiṃstīrthe tu yaḥ kaścittyajeddehaṃ vidhānataḥ /
tasya bhavati yatpuṇyaṃ tacchṛṇuṣva narādhipa

yāvadasthīni tiṣṭhanti martyasya narmadājale /
tāvadvasati dharmātmā śivaloke sudurlabhe

tataḥ kālāccyutastasmādiha mānuṣatāṃ gataḥ /
koṭidhanapatiḥ śrīmāñjāyate rājapūjitaḥ

sarvadharmasamāyukto medhāvī bījaputrakaḥ /
vikhyāto vasudhāpṛṣṭhe dīrghāyurmānavo bhavet

punaḥ smarati tattīrthaṃ tatra gatvā nṛpottama /
karoḍeśvaramabhyarcya prāpnoti paramāṃ gatim

indracandrayamairrudrairādityairvasubhistathā /
viśvedevaistathā sarvaiḥ sthāpitastridaśeśvaraḥ

revāyā uttare kūle lokānāṃ hitakāmyayā /
mānavo bhaktisaṃyuktaḥ prāsādaṃ kārayettu yaḥ

tasmiṃstīrthe naraśreṣṭha sadgatiṃ samavāpnuyāt /
nyāyopāttadhanenaiva dārupāṣāṇakeṣṭakaiḥ

brāhmaṇaḥ kṣatriyairvaiśyaiḥ śūdraiḥ strībhiśca śaktitaḥ /
te'pi yānti narā loke śāṃkare surapūjite

yaḥ śṛṇoti sadā bhaktyā māhātmyaṃ tīrthajaṃ nṛpa /
tasya pāpaṃ praṇaśyeta ṣaṇmāsābhyantaraṃ ca yat

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe karoḍīśvaratīrthamāhātmyavarṇanaṃ nāma dviṣaṣṭitamo'dhyāyaḥ//