Skanda Purana · Verses 5.61-2

// īśvara uvāca // //
ekaṣaṣṭitamaṃ viddhi saubhāgyeśvaramīśvaram //
yasya darśanamātreṇa saubhāgya matulaṃ labhet

pradhamaṃ prākṛte kalpe rājābhūdaśvavāhanaḥ //
prāgjyotiṣapure ramye dharmātmā kīrttivarddhanaḥ

anekayajñakṛtprājñaḥ saṃgrāmeṣvapa rājitaḥ //
tasya bhāryā viśālākṣi nāmnā madanamañjarī

kāśirājasutā subhrū rūpeṇātīva śobhanā //
dakṣā suśīlā dharmiṣṭhā gṛhavyāpārako vidā

catuḥṣaṣṭikalāyuktā sadā bhartṛhite ratā //
pūrṇenduvadanā saumyā sadā madhurabhāṣiṇī

pūrvakarmavaśāddevi durbhūgā samajāyata //
sā neṣṭā tasya nṛpaternetrodvegakarī sadā

śrotrodvegakaraṃ vākyaṃ tasya rājñaḥ karoti sā //
dadāha locane rājastasyāḥ saṃdarśanaṃ sadā

mṛrchāṃ prāpnotyasahyāṃ sa tasyāḥ sparśena bhūpatiḥ //
kadā cālokito rājā tayā premṇā varānane //
dahyamāno'titīvreṇa vahninā vākyamabravīt //

dvāsthaitāṃ durbhagāṃ bhāryāmādāya vipine vane //
parityajāśu naitatte vicāryaṃ vacanaṃ mama

tato nṛpasya vacanamavicāryamavekṣya saḥ //
dvāsthastatyāja tāṃ subhrūmāropya syaṃdanaṃ vane

sā ca tyaktā vane śūnye rudatī ca muhurmuhuḥ //
sasmāra taṃ mahīpālaṃ tamamanyata daivatam //

atha sā cārusarvāṃgī tatrāsaktātmamānasā //
niśvāsaparamā ninye dinaśeṣaṃ tathā niśām

niśvasantyanavadyāṃgī hāheti rudatī muhuḥ //
mandabhāgyeti cātmānaṃ nininda madirekṣaṇā

na vihāre na cāhāre ramaṇīye na tadvane //
na kandareṣu śailānāṃ sā babandha tadā ratim //
tyaktā tena varārohe nininda nijayauvanam

durbhagāhaṃ kva jātātra duṣṭadaivavaśīkṛtā //
kathaṃ prāptaḥ sa me bharttā tādṛśo nṛpasa ttamaḥ

dhanyo'yamatipuṇyo'yaṃ yo'yaṃ yauvanagocaraḥ //
anyāsāmasatīnāṃ ca ramiṣyati na saṃśayaḥ

abhīṣṭā kasyacitkāṃtā kāṃtaḥ kasyāścidīpsitaḥ //
parasparānurāgāḍhayaṃ dāṃpatyamatidurlabham

mamāyaṃ vallabho rājā na cāhaṃ nṛpavallabhā //
parasparānurāgo hi dhanyānāmeva jāyate

yadyadya sa mahīpālo na mayā saṃgameṣyati //
tatkāmāgniravaśyaṃ māṃ kṣapayiṣyati duḥsahaḥ

ramaṇīyamabhūdyattu puṃskokilanināditam //
hīnaṃ hi vallabhenaivaṃ dahatīvādya me vanam

itthaṃ sā madanāviṣṭā vilapantī punaḥpunaḥ //
dadarśa tāpasaṃ tatra trikālajñaṃ dṛḍhavratam

mekhalājinakaupīnadaṇḍakāṣṭhopajīvanam //
mahaujasaṃ mahābhāgaṃ mumukṣuṃ munipuṃgavam

udayādityasaṃkāśaṃ vibhāvasusamadyutim //
taṃ dṛṣṭvā sahasotthāya sā rājñī durmatā satī

vinayenopasaṃyamya praṇipatyābhivādya ca //
viyogakāraṇaṃ rājñaḥ papraccha praṇatā satī

bhagavankāśirājasya sutāhamativallabhā //
bhaginī śatrusenasya mātuścātīva vallabhā

aśvavāhanasaṃjñena nṛpeṇoḍhā mahāmune //
dharmato dharmakalpena prajapatisamena tu

sā kimarthaṃ na cābhīṣṭā jātā'haṃ tasya bhūpateḥ //
sa cātīva mamābhīṣṭo nṛpatiḥ sarvadā vibho //

durbhagāhaṃ kathaṃ jātā karmaṇā kena tāpasa //
kathaṃ bhavati vaśyo me bharttā nṛpatisattamaḥ //
saubhāgyaṃ ca kathaṃ me syāditi satyaṃ ca kathyatām

tasyāstadvacanaṃ śrutvā sa muniḥ saṃśitavrataḥ //
jñānena kathayāmāsa tasyā daurbhāgyakāraṇam

pāṇigrahaṇakāle tvaṃ grahaiḥ pāpairvilokitā //
bhartā te nṛpatiḥ putri grahaiḥ saumyairvilokitaḥ

tena te vallabho rājā na tvaṃ bhūpasya vallabhā //
iti tasya vacaḥ śrutvā sā rājñī dīnamānasā //
papraccha vinayopetā bhaktinamrātmakandharā

bhagavankena dānena snānena niyamena ca //
karmaṇā kena saubhāgyaṃ paramaṃ hi kathaṃ bhavet

iti tasyā vacaḥ śrutvā sa muniḥ saṃśitavrataḥ //
kathayāmāsa māhātmyaṃ saubhāgyaṃ yena labhyate

mahākālavane putri ligaṃ saubhāgyadāyakam//
mataṃgeśvarapārśve tu vidyate'bhīṣṭadāyakam //
tasya darśanamātreṇa saubhāgyaṃ samavāpsyasi

iṃdrāṇyārādhitaṃ liṃgaṃ purā saubhāgyakāraṇāt //
saubhāgyaṃ paramaṃ labdhaṃ naṣṭaḥ śakro'pi labdhavān //
tasmādgaccha mamādeśānmahākālavanaṃ śubham

saubhāgyaṃ bhavitā tatra kāṃtena saha darśanam//
putro bhaviṣyati śubhe tasya liṃgasya darśanāt

ityuktā sā tadā tena tāpasena varānane //
vidyate yatra talliṃgaṃ mahākālavanaṃ gatā

dadarśa praṇayopetā liṃgaṃ saubhāgyadāyakam //
darśanāttasya liṃgasya rājā sasmāra tāṃ priyām

papraccha jamadagniṃ tu kva gatā me priyā vibho //
bhakṣitā vipine vipra siṃhavyāghraniśācaraiḥ

mayā tyaktā nṛśaṃsena ahaṃ tasyāstu vallabhaḥ //
evaṃ bruvāṇo nṛpatiḥ pratyukto jamadagninā

na bhakṣitā sā bhūpāla siṃhavyāghraniśācaraiḥ //
sā cāviplutacāritrā tvadbhaktā ca pativratā //

mahākālavanaṃ rājangatā saubhāgyakāmyayā //
bhāryā rakṣyā mahīpāla iti sā śrutiruttamā

bhāryāyāṃ rakṣyamāṇāyāṃ prajā bhavati rakṣitā //
ātmā hi jāyate tasyāṃ sā rakṣyāto nareśvara

dharmahāniścānudinamabhāryasya bhavennṛpa //
nityakriyāyā vibhraṃśaḥ sa cāpi patanāya vai

patnyānukūlayā bhāvyaṃ yathāśīle'pi bharttari //
duḥśīlā durbhagā bhāryā poṣaṇīyā nareśvara

iti tasya vacaḥ śrutvā samāyāto nareśvaraḥ //
mahākālavane ramye dadarśa svāṃ priyāṃ tadā

saubhāgyālaṃkṛtāṃ subhrū pūjayaṃtīṃ maheśvaram //
dṛṣṭvā snehena cāliṃgya pratyuvāca sa tāṃ priyām

viraheṇa tvadīyena saṃtapto'haṃ varānane //
adya me saphalaṃ cakṣurjīvitaṃ ca sujīvitam

yattvāṃ paśyāmi subhage kṛtārthohaṃ kṛtastvayā //
evaṃ dṛṣṭātiharṣeṇa sā dadarśa tadā patim //
uvāca ca prasīdeti bhūyo bhūyo mudānvitā

tataḥ sa rājā rabhasātpariṣvajyāha bhāminīm //
priye prasanna evāhaṃ bhūyo bhūyo bravīmi kim

tataḥ samāgamo jāto jātaḥ putro'tidhārmikaḥ //
tasya liṃgasya māhātmyāddattonāma sa gīyate

saubhāgyamatulaṃ labdhaṃ tayā devyā himātmaje //
saubhāgyeśvarasaṃjñaṃ tu tataḥprabhṛti bhūtale

ye paśyaṃti viśālākṣi saubhāgyeśvaramīśvaram//
teṣāṃ kule na daurbhāgyaṃ jāyate parvatātmaje

bhaviṣyati na dāridryaṃ viyogo na ca bandhubhiḥ //
putramitrakalatrāṇāṃ liṃgasya ca samarcanāt

nopasargabhayaṃ teṣāṃ ye paśyaṃti varānane //
saubhāgyeśvarasaṃjñaṃ tu na grahādibhayaṃ bhavet

sarvabādhāvinirmukto dhanadhānyasamanvitaḥ //
manuṣyo jāyate devi saubhāgyeśvaradarśanāt //
saṃpūjyaḥ sarvalokeṣu saubhāgyekanidhirbhavet

||
jāyate bhūpatirloke sārvabhaumo varānane //
nāputrā nādhanā nārī na dīnā na ca duḥkhitā //
jāyate durbhagā naiva saubhāgyeśvaradarśanāt

na vaidhavyaṃ na ca vyādhirnākālamaraṇaṃ śriye//
na putrabhartṛjaṃ duḥkhaṃ jāyate liṃgadarśanāt

yathā lakṣmīrharernityaṃ sāvitrī brahmaṇaḥ smṛtā //
rohiṇī vallabhā ceṃdoḥ śacī śakrasya vallabhā //
tathā sā jāyate nārī saubhāgyeśvaradarśanāt

eṣa te kathito devi prabhāvaḥ pāpanāśanaḥ //
saubhāgyeśvaradevasya śṛṇu rūpeśvaraṃ priye

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe caturaśīti liṃgamāhātmye saubhāgyeśvaramāhātmyavarṇanaṃnāmaikaṣaṣṭitamo'dhyāyaḥ