Skanda Purana · Verses 5.6-2

// śrīmahādeva uvāca // ///
svarṇajvāleśvaraṃ ṣaṣṭhaṃ viddhi cātra yaśasvini //
yasya darśanamātreṇa dhanavāniha jāyate

purā sārddhaṃ tvayā devi krīḍato mama maṃdire //
jātaṃ varṣaśataṃ divyaṃ surataikarasasya ca

devaiḥ sarvaistato vahniḥ prerito mama saṃnidhau //
tato vahniḥ samāyātastrailokyārthe yaśasvini

tato vahnimukhe kṣiptaṃ vīryaṃ svaṃ krīḍatā mayā //
dahyamānastadā tena gaṃgāṃ vahnirjagāma ha

tatra gatvā pracikṣepa vīryamagniḥ sudurddharam //
tathāpi dahyate vahnirvīryaśeṣeṇa pārvati

jātaṃ ramyaṃ tato divyaṃ vīryaśeṣeṇa kāṃcanam //
jvalaṃtaṃ cātitāpena duḥsahaṃ durddharaṃ priye

agnerapatyaṃ prathamaṃ dṛṣṭvotpannaṃ tu pārvati //
lobhābhibhūtā asurāḥ surā gandharvakinnarāḥ //

yakṣāḥ sādhyāḥ piśācāśca manuṣyā rākṣasāḥ khagāḥ //
abhyadhāvansusaṃrabdhāste suvarṇajighṛkṣavaḥ

suvarṇārthe mahānnādo mamedamiti jalpatām //
ajñānātsaṃgaraścaiva saṃjātaḥ prāṇahārakaḥ

athāvaraṇamukhyāni nānāpraharaṇāni ca //
pragṛhyābhyanadannādairdevaiḥ sārddhaṃ yaśasvini

asurā asuraiḥ sārddhaṃ manuṣyā mānuṣaiḥ saha //
gandharvāḥ saha gandharvaiḥ kiṃnaraiḥ saha kiṃnarāḥ //

bhūtaiḥ sārddhaṃ ca bhūtāni rākṣasaiḥ saha rākṣasāḥ //
vetālaiḥ saha vetālā yuddhaṃ cakruḥ sudāruṇam

putrastu pitaraṃ dveṣṭi pitā putraṃ tathaiva ca //
haṃti bhāryā svabhartāraṃ bhartā ca svāṃ priyāṃ tathā

mātaraṃ svasuto haṃti mātā putraṃ hinasti ca //
tato vairavinirbaṃdhaḥ saṃjātaḥ svarṇakāraṇāt

surāṇāmasurāṇāṃ ca sarvaṃ ghorataraṃ mahat //
prāsāśca vipulāstīkṣṇā nyapataṃta sahasraśaḥ //
tomarāśca sutīkṣṇāgrāḥ śastrāṇi vividhāni ca

suvarṇārthe mahādevi vamaṃto rudhiraṃ bahu

asiśaktigadāṛṣṭyo nipeturdharaṇītale //
chinnāni paṭṭiśaiścaiva śirāṃsi yudhi dāruṇaiḥ

rudhireṇāvaliptāṃgā nihatāśca parasparam //
adrīṇāmiva kūṭāni dhātuyuktāni śerate

hāhākāraḥ samabhavadbhayakṛcca sahasraśaḥ //
anyonyaṃ chiṃdatāṃ śastraiḥ suvarṇasya ca kāraṇāt

parighairāyasaiḥ pāśairvajrakalpaiśca muṣṭibhiḥ //
nighnatāṃ samare 'nyonyaṃ śabdo divamivāspṛśat

chiṃdhibhiṃdhi pradhāva tvaṃ pātayādhisareti ca //
aśrūyanta mahāghorāḥ śabdāstatra samaṃtataḥ

evaṃ tu tumule yuddhe varttamāne mahābhaye //
kaṃpitā dharaṇī devi devāstrastāḥ savāsavāḥ

kṣubhyaṃti sma samudrāśca celuśca dharaṇīdharāḥ //
tasyārthe pīḍitaṃ sarvaṃ sadevāsuramānuṣam

ṛṣayo vālakhilyādyā devāḥ śakrapurogamāḥ//
bṛhaspatiṃ puraskṛtya brahmalokaṃ gatāḥ striyaḥ

socchvāsā kathayāmāsurjarjarīkṛtamastakāḥ //
vṛttāṃtaṃ vistarātsarvaṃ lokatrayavināśanam

tacchrutvā vacanaṃ teṣāṃ brahmā lokapitāmahaḥ //
ciṃtayitvā ca taiḥ sārddhamājagāma mamāṃtikam

mayā pṛṣṭāstu te sarve kenaite jarjarīkṛtāḥ //
śastrāstraiḥ pīḍitāḥ kena kasmādvo bhayamāgatam

kaścāsau dānavo duṣṭo yena vai pīḍitā bhṛśam //
tatsarvaṃ kathitaṃ devi mamāgre bhayavihvalaiḥ

te māmūcustadā devā brahmādyā bhayakāraṇam //

lobhātsarve vinaṣṭāḥ sma suvarṇasya ca kāraṇāt //
pīḍitaṃ ca jagatsarvaṃ sadevāsuramānuṣam

iti teṣāṃ vacaḥ śrutvā mayā jñātaṃ varānane //
tasyārthe kalaho ghoraḥ saṃjāto hi parasparam

lokatrayavināśaśca sahasā yena vai kṛtaḥ //
yamuddiśya tyajetprāṇāṃstamāhurbrahmaghāta kam

brahmahā vahniputrastu yamuddiśya mṛto janaḥ //
śarīraṃ śabalaṃ caiva savikāraṃ bhaviṣyati

dhātavo hi bhaviṣyaṃti tasya dehe na saṃśayaḥ //
lakṣyate duḥkhamatulaṃ chedadāhādigharṣaṇam

etasminnaṃtare vahnirdṛṣṭvā putrasya ceṣṭitam //
jñātvā krodhaṃ madīyaṃ tu bhīto vai putrakāra ṇāt

ājagāma suvarṇena sārddhaṃ devi mamāṃtikam //
prasādito'haṃ putrārthe vahninā hi varānane

rakṣaṇīyastvayā deva putroyaṃ tava śaṃkara //
bhāṇḍāgāre svakīye tu kriyatāṃ parameśvara

tvayi tuṣṭe mahādeva prāpyo'yaṃ nātra saṃśayaḥ //
icchayā dīyatāṃ devi yasya kasya janasya ca

iti tasya vacaḥ śrutvā pitṛdevamukhasya ca //
tatheti ca pratijñātaṃ mayā lobhādyaśasvini // ३९ /
snehānmayā vahniputra utsaṃge ca kṛtastadā //
snehādvai cuṃbito mūrdhni pariṣvaktaḥ punaḥpunaḥ

dadāmi te mahābhāga varaṃ varaya śobhanam //
parituṣṭo'smi vai kāmaṃ yatheṣṭaṃ samavāpnuhi

ahamājñāpayāmi tvāṃ śreyaścaivamavāpsyasi //
mamābhīṣṭakaraṃ sthānaṃ vidyate pṛthivītale

akṣayaṃ pralaye putra mahākālavanaṃ śubham //
tatraiva vidyate liṃgaṃ karkoṭakasya dakṣiṇe

mahāpāpaharaṃ putra darśanāddīptidāyakam //
tasya darśanamātreṇa kṛtakṛtyo bhaviṣyasi

puṇyaścaiva pavitreṇa durlabhaśca bhaviṣyati //
akulīnaḥ kulīnastu samalo nirmalo naraḥ

virūpo rūpavāṃścaiva tvatprasādādbhaviṣyati //
dānāni paripūrṇāni vratāni niyamāstathā

yajñāścaivopavāsāśca tīrthaṃ piṃḍādikaṃ tvayā //
susaṃpūrṇā bhaviṣyaṃti tava dānena suvrata

sarveṣāṃ caiva ratnānāmādhipatyaṃ kariṣyasi //
priyābhīṣṭo hi devānāṃ lokānāṃ ca bhaviṣyasi

ityukto'sau mahādevi divyarūpo varānane //
jvālāmālā vṛtaḥ puṇyo nirmalo hi babhūva ha

liṃgenoktaḥ suvarṇastu diṣṭyādiṣṭyeti kāṃcanam //
adyaprabhṛti nāmnā vai khyātiṃ yāsyasi bhūtale

sthātavyaṃ matsamīpe tu vahniputra tvayā sadā //
akṣayā bhavitā kīrttistvadīyā bhuvanatraye

ityukto devi liṃgena vahniputro'tinirmalaḥ //
jvālāvṛtatanurjātaḥ sūryakoṭisamaprabhaḥ

dīptirlabdhā suvarṇena jvālāmālākulā tadā //
ato devi suvikhyātaḥ svarṇajvāleśvaraḥ śivaḥ

yastamarcayate bhaktyā svarṇajvāleśvaraṃ śivam //
tasya saṃjāyate devi vijayo rājyamūrjitam //
aiśvaryaṃ dānaśaktiśca putrapautramanaṃtakam //

jñānato'jñānato vāpi yatpāpaṃ kurute naraḥ //
tatkṣālayati dehotthaṃ darśanānnātra saṃśayaḥ

yatphalaṃ piṃḍadānena gayāyāṃ labhate naraḥ //
tatphalaṃ dviguṇaṃ proktaṃ pūjayā nātra saṃśayaḥ

gāyatryāḥ śatasāhasraiḥ samyagjaptaiśca yatphalam//
tatphalaṃ samavāpnoti svarṇajvāleśvarastuteḥ

yatpuṇyaṃ sarvadānena dattena vidhipūrvakam //
tatphalaṃ samavāpnoti kīrtanānnātra saṃśayaḥ

pūjayaṃti caturdaśyāṃ svarṇajvāleśvaraṃ tu ye //
pūjyaṃte te sadā lakṣmyā pūrayaṃtyā manorathān

rakṣitaṃ tridaśairdevi gaṇairnānāvidhaistathā //
liṃgaṃ kaścinna jānāti mama māyāvimohitaḥ

mama prasādāttaddevi dṛśyate liṃgamuttamam //
etatte kathitaṃ samyaganyacchṛṇu varānane

iti śrīskāṃde mahāpurāṇa ekāśītisāhasryāṃ saṃhitāyāṃ paṃcama āvaṃtyakhaṇḍe caturaśītiliṅgamāhātmye svarṇajvāleśvaramāhātmyavarṇanaṃnāma ṣaṣṭho'dhyāyaḥ