Skanda Purana · Verses 5.57-2

// īśvara uvāca // //
saptapaṃcāśataṃ viddhi ghaṃṭeśvaramatho śṛṇu //
yasya darśanamātreṇa kāmāvāptiśca jāyate

ghaṃṭonāma gaṇaśreṣṭho babhūva mama vallabhaḥ //
cākṣuṣasya manoḥ kāle kautukārthaṃ yadṛcchayā //
prasthito brahmasadanaṃ draṣṭuṃ brahmāṇamavyayam

athāyāntaṃ samālokya gandharvaṃ gītakovidam//
citrasenaṃ gaṇaśreṣṭhaḥ papraccha kuśalaṃ mudā

mayā tatraiva gantavyaṃ sadane parameṣṭhinaḥ/.
gītairārādhayiṣyāmi brahmāṇaṃ jagatāṃ patim

citraseno'tha taṃ devi pratyukto ghaṃṭamabravīt//
padmayoniḥ suraiḥ sārdhaṃ guhyaṃ mantramacīkarat

etacchrutvā gaṇo ghaṃṭastasthau vismitamānasaḥ //
mūhūrtaṃ ciṃtayāmāsa pratihāranivāritaḥ

hitvā svāminamīśānaṃ draṣṭuṃ brahmāṇamāgataḥ //
praveśopi na labhyeta prasādo dūrataḥ sthitaḥ

evaṃ ciṃtayatastasya sāgraḥ saṃvatsaro gataḥ //
ghaṃṭasya brahmaṇo dvāri praveśo devi nābhavat

nirgacchatamathālokya vīṇāhastaṃ samutsukam //
nāradaṃ sa gaṇaśreṣṭhaḥ padmayoniṃ gṛhodarāt

prokto ghaṃṭena sahasā māṃ nivedaya nārada //
gaṇo'haṃ gītatattvajño mahādevasya vallabhaḥ

darśanārthaṃ samāyāto brahmaṇaḥ parameṣṭhinaḥ //
ghaṃṭasya vacanaṃ śrutvā prītimānabhavanmuniḥ //
nāradaḥ pratyuvācedaṃ samāśvāsya sakaitavam

ahaṃ bṛhaspateḥ pārśve preṣito'smi gaṇādhipa //
kiṃcitkāryāṃtaraṃ praṣṭuṃ brahmaṇā lokakartṛṇā //
āyāsyāmi kṣaṇenaiva tāvatkālaṃ pratīkṣyatām

ityuktvā nārado devi mama pārśvamupāgataḥ//
vṛttāṃtaṃ kathayāmāsa ghaṃṭasya munisattamaḥ

īdṛśo durllabho bhṛtyo ghaṃṭena sadṛśaḥ prabho //
yastvāṃ tyaktvā gaṇo deva sevāyai parameṣṭhinaḥ//
sthitaḥ saṃvatsaraṃ sāgraṃ praveśaṃ na ca labdhavān//१४
tacchrutvā vacanaṃ tasya nāradasya munestadā//
mayā śaptastu kopena pata ghaṇṭa mahītale

māṃ tyaktvā hi gatonyatra sevārthaṃ paraveśmani//
mayetyukte ca vacane brahmādvāri sthito'pi san

patito bhūtale ghaṃṭo devadāruvanāṃtike //
ātmānaṃ patitaṃ dṛṣṭvā bhūmau ghaṃṭena pārvati

proktaṃ śokottareṇaiva vacanaṃ gadgadākṣaram //
sevārthaṃ yāti yo'nyatra parihṛtya svakaṃ prabhum

sa yāti narakaṃ ghoramapakīrtiṃ ca viṃdati //
nāradena mama tvadya vaṃcitasya dvayaṃ gatam //
yasmātsvāmī na me brahmā na ca devo maheśvaraḥ

evaṃ vilapatastasya nārado munisattamaḥ //
ājagāma tamuddeśaṃ yatra ghaṃṭo vyavasthitaḥ

devadāruvane devi darśanārthaṃ tapasvinām //
ghaṃṭena nārado dṛṣṭo bhītenākulacetasā

avasthāmīdṛśīṃ kṛtvā kimanyanme kariṣyati //
evaṃ taṃ ciṃtayānaṃ tu nārado vākyamabravīt

gaṇādhyakṣa na te kāryo manyuḥ puṇyavināśanaḥ //
kīrtyarthaṃ patito ghaṃṭa prāyaścittārthameva ca

prāyaścittaviśuddhātmā prabhuṃ prāpsyasi śaṃkaram //
tasmādgaccha mamādeśānmahākālavanaṃ śubham

revaṃteśvara pūrve tu vidyate liṃgamuttamam //
sarvasaṃpatkaraṃ divyaṃ tvannāmnā khyātimeṣyati

ityukto nāradenaiva jaigīṣavyaḥ samāgataḥ //
tenāpi kathitaṃ sarvaṃ satyamuktamanena vai

nāradena gaṇādhyakṣa kīrttiste bhavitā'kṣayā //
kaśyapena mṛkaṇḍena kaṇvena jamadagninā

atriṇā bhṛguṇā devi lomaśena surarṣiṇā //
prokto ghaṃṭo gataḥ śīghraṃ mahākālavanaṃ śubham

yatra ghaṃṭāninādena yudhyato mama saṃyuge //
pāpakṣayakaraṃ devi saṃbhūtaṃ liṃgamuttamam //
dṛṣṭaṃ tatra gaṇenaiva liṃgaṃ tejomayaṃ śubham

darśanāttasya liṃgasya bhūyo ghaṃṭo gaṇo'bhavat //
lakṣmyā kāṃtyā samāyuktaḥ sahasrakiraṇākṛtiḥ

ghaṇṭobhinaṃdito'tyarthaṃ vimānaiḥ sārvakāmikaiḥ //
mama pārśvaṃ samāyāto mamātīva priyo'bhavat

ye paśyanti viśālākṣi devaṃ ghaṇḍeśvaraṃ śivam //
te ghaṇṭābhirnāditāstu vimānaiḥ sārvakāmikaiḥ

yāsyaṃti suciraṃ kālaṃ mama lokaṃ sanātanam //
ghaṇṭeśvaraṃ paraṃ liṃgaṃ nākhyeyaṃ yasyakasyacit

vyādhito yadi vā dīno duḥkhito vā bhavennaraḥ //
yaḥ paśyati prasaṃgena devaṃ ghaṇṭeśvaraṃ priye //
dīptakāṃcanavarṇābhairvimānaiḥ sārvakāmikaiḥ

gaṃdharvāpsarasāṃ madhye svarge modati mānavaḥ //
īpsitām̐llabhate kāmānvīṇāveṇuvinoditaḥ

tataḥ svargātparibhraṣṭaḥ sarvaiśvaryasamanvitaḥ //
hiraṇyadhānyasaṃpūrṇe samṛddhe jāyate kule //
rājā vā rājatulyo vā jaṃbūdvīpapatirbhavet

yaḥ pūjayati deveśaṃ śraddhayā parayā yutaḥ //
sa yāti paramaṃ sthānamapunarbhavakāraṇam

eṣa te kathito devi prabhāvaḥ pāpanāśanaḥ //
ghaṇṭeśvarasya devasya prayāgeśamatho śṛṇu

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe caturaśītiliṅgamāhātmye ghaṇṭeśvara māhātmyavarṇanaṃnāma saptapaṃcāśattamo'dhyāyaḥ