સ્કંદ પુરાણ · શ્લોક 5.57-2

॥ ઈશ્વર ઉવાચ ॥ ॥
સપ્તપંચાશતં વિદ્ધિ ઘંટેશ્વરમથો શૃણુ ॥
યસ્ય દર્શનમાત્રેણ કામાવાપ્તિશ્ચ જાયતે

ઘંટોનામ ગણશ્રેષ્ઠો બભૂવ મમ વલ્લભઃ ॥
ચાક્ષુષસ્ય મનોઃ કાલે કૌતુકાર્થં યદૃચ્છયા ॥
પ્રસ્થિતો બ્રહ્મસદનં દ્રષ્ટું બ્રહ્માણમવ્યયમ્

અથાયાન્તં સમાલોક્ય ગન્ધર્વં ગીતકોવિદમ્॥
ચિત્રસેનં ગણશ્રેષ્ઠઃ પપ્રચ્છ કુશલં મુદા

મયા તત્રૈવ ગન્તવ્યં સદને પરમેષ્ઠિનઃ।.
ગીતૈરારાધયિષ્યામિ બ્રહ્માણં જગતાં પતિમ્

ચિત્રસેનોઽથ તં દેવિ પ્રત્યુક્તો ઘંટમબ્રવીત્॥
પદ્મયોનિઃ સુરૈઃ સાર્ધં ગુહ્યં મન્ત્રમચીકરત્

એતચ્છ્રુત્વા ગણો ઘંટસ્તસ્થૌ વિસ્મિતમાનસઃ ॥
મૂહૂર્તં ચિંતયામાસ પ્રતિહારનિવારિતઃ

હિત્વા સ્વામિનમીશાનં દ્રષ્ટું બ્રહ્માણમાગતઃ ॥
પ્રવેશોપિ ન લભ્યેત પ્રસાદો દૂરતઃ સ્થિતઃ

એવં ચિંતયતસ્તસ્ય સાગ્રઃ સંવત્સરો ગતઃ ॥
ઘંટસ્ય બ્રહ્મણો દ્વારિ પ્રવેશો દેવિ નાભવત્

નિર્ગચ્છતમથાલોક્ય વીણાહસ્તં સમુત્સુકમ્ ॥
નારદં સ ગણશ્રેષ્ઠઃ પદ્મયોનિં ગૃહોદરાત્

પ્રોક્તો ઘંટેન સહસા માં નિવેદય નારદ ॥
ગણોઽહં ગીતતત્ત્વજ્ઞો મહાદેવસ્ય વલ્લભઃ

દર્શનાર્થં સમાયાતો બ્રહ્મણઃ પરમેષ્ઠિનઃ ॥
ઘંટસ્ય વચનં શ્રુત્વા પ્રીતિમાનભવન્મુનિઃ ॥
નારદઃ પ્રત્યુવાચેદં સમાશ્વાસ્ય સકૈતવમ્

અહં બૃહસ્પતેઃ પાર્શ્વે પ્રેષિતોઽસ્મિ ગણાધિપ ॥
કિંચિત્કાર્યાંતરં પ્રષ્ટું બ્રહ્મણા લોકકર્તૃણા ॥
આયાસ્યામિ ક્ષણેનૈવ તાવત્કાલં પ્રતીક્ષ્યતામ્

ઇત્યુક્ત્વા નારદો દેવિ મમ પાર્શ્વમુપાગતઃ॥
વૃત્તાંતં કથયામાસ ઘંટસ્ય મુનિસત્તમઃ

ઈદૃશો દુર્લ્લભો ભૃત્યો ઘંટેન સદૃશઃ પ્રભો ॥
યસ્ત્વાં ત્યક્ત્વા ગણો દેવ સેવાયૈ પરમેષ્ઠિનઃ॥
સ્થિતઃ સંવત્સરં સાગ્રં પ્રવેશં ન ચ લબ્ધવાન્॥૧૪
તચ્છ્રુત્વા વચનં તસ્ય નારદસ્ય મુનેસ્તદા॥
મયા શપ્તસ્તુ કોપેન પત ઘણ્ટ મહીતલે

માં ત્યક્ત્વા હિ ગતોન્યત્ર સેવાર્થં પરવેશ્મનિ॥
મયેત્યુક્તે ચ વચને બ્રહ્માદ્વારિ સ્થિતોઽપિ સન્

પતિતો ભૂતલે ઘંટો દેવદારુવનાંતિકે ॥
આત્માનં પતિતં દૃષ્ટ્વા ભૂમૌ ઘંટેન પાર્વતિ

પ્રોક્તં શોકોત્તરેણૈવ વચનં ગદ્ગદાક્ષરમ્ ॥
સેવાર્થં યાતિ યોઽન્યત્ર પરિહૃત્ય સ્વકં પ્રભુમ્

સ યાતિ નરકં ઘોરમપકીર્તિં ચ વિંદતિ ॥
નારદેન મમ ત્વદ્ય વંચિતસ્ય દ્વયં ગતમ્ ॥
યસ્માત્સ્વામી ન મે બ્રહ્મા ન ચ દેવો મહેશ્વરઃ

એવં વિલપતસ્તસ્ય નારદો મુનિસત્તમઃ ॥
આજગામ તમુદ્દેશં યત્ર ઘંટો વ્યવસ્થિતઃ

દેવદારુવને દેવિ દર્શનાર્થં તપસ્વિનામ્ ॥
ઘંટેન નારદો દૃષ્ટો ભીતેનાકુલચેતસા

અવસ્થામીદૃશીં કૃત્વા કિમન્યન્મે કરિષ્યતિ ॥
એવં તં ચિંતયાનં તુ નારદો વાક્યમબ્રવીત્

ગણાધ્યક્ષ ન તે કાર્યો મન્યુઃ પુણ્યવિનાશનઃ ॥
કીર્ત્યર્થં પતિતો ઘંટ પ્રાયશ્ચિત્તાર્થમેવ ચ

પ્રાયશ્ચિત્તવિશુદ્ધાત્મા પ્રભું પ્રાપ્સ્યસિ શંકરમ્ ॥
તસ્માદ્ગચ્છ મમાદેશાન્મહાકાલવનં શુભમ્

રેવંતેશ્વર પૂર્વે તુ વિદ્યતે લિંગમુત્તમમ્ ॥
સર્વસંપત્કરં દિવ્યં ત્વન્નામ્ના ખ્યાતિમેષ્યતિ

ઇત્યુક્તો નારદેનૈવ જૈગીષવ્યઃ સમાગતઃ ॥
તેનાપિ કથિતં સર્વં સત્યમુક્તમનેન વૈ

નારદેન ગણાધ્યક્ષ કીર્ત્તિસ્તે ભવિતાઽક્ષયા ॥
કશ્યપેન મૃકણ્ડેન કણ્વેન જમદગ્નિના

અત્રિણા ભૃગુણા દેવિ લોમશેન સુરર્ષિણા ॥
પ્રોક્તો ઘંટો ગતઃ શીઘ્રં મહાકાલવનં શુભમ્

યત્ર ઘંટાનિનાદેન યુધ્યતો મમ સંયુગે ॥
પાપક્ષયકરં દેવિ સંભૂતં લિંગમુત્તમમ્ ॥
દૃષ્ટં તત્ર ગણેનૈવ લિંગં તેજોમયં શુભમ્

દર્શનાત્તસ્ય લિંગસ્ય ભૂયો ઘંટો ગણોઽભવત્ ॥
લક્ષ્મ્યા કાંત્યા સમાયુક્તઃ સહસ્રકિરણાકૃતિઃ

ઘણ્ટોભિનંદિતોઽત્યર્થં વિમાનૈઃ સાર્વકામિકૈઃ ॥
મમ પાર્શ્વં સમાયાતો મમાતીવ પ્રિયોઽભવત્

યે પશ્યન્તિ વિશાલાક્ષિ દેવં ઘણ્ડેશ્વરં શિવમ્ ॥
તે ઘણ્ટાભિર્નાદિતાસ્તુ વિમાનૈઃ સાર્વકામિકૈઃ

યાસ્યંતિ સુચિરં કાલં મમ લોકં સનાતનમ્ ॥
ઘણ્ટેશ્વરં પરં લિંગં નાખ્યેયં યસ્યકસ્યચિત્

વ્યાધિતો યદિ વા દીનો દુઃખિતો વા ભવેન્નરઃ ॥
યઃ પશ્યતિ પ્રસંગેન દેવં ઘણ્ટેશ્વરં પ્રિયે ॥
દીપ્તકાંચનવર્ણાભૈર્વિમાનૈઃ સાર્વકામિકૈઃ

ગંધર્વાપ્સરસાં મધ્યે સ્વર્ગે મોદતિ માનવઃ ॥
ઈપ્સિતાઁલ્લભતે કામાન્વીણાવેણુવિનોદિતઃ

તતઃ સ્વર્ગાત્પરિભ્રષ્ટઃ સર્વૈશ્વર્યસમન્વિતઃ ॥
હિરણ્યધાન્યસંપૂર્ણે સમૃદ્ધે જાયતે કુલે ॥
રાજા વા રાજતુલ્યો વા જંબૂદ્વીપપતિર્ભવેત્

યઃ પૂજયતિ દેવેશં શ્રદ્ધયા પરયા યુતઃ ॥
સ યાતિ પરમં સ્થાનમપુનર્ભવકારણમ્

એષ તે કથિતો દેવિ પ્રભાવઃ પાપનાશનઃ ॥
ઘણ્ટેશ્વરસ્ય દેવસ્ય પ્રયાગેશમથો શૃણુ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં પઞ્ચમ આવંત્યખણ્ડે ચતુરશીતિલિઙ્ગમાહાત્મ્યે ઘણ્ટેશ્વર માહાત્મ્યવર્ણનંનામ સપ્તપંચાશત્તમોઽધ્યાયઃ