Skanda Purana · Verses 5.56-2

// śrīmahādeva uvāca // //
ṣaṭpaṃcāśattamaṃ viddhi revaṃteśvarasaṃjñakam //
yasya darśanamātreṇa parā siddhiḥ prajāyate

asahaṃtī purā saṃjñā ravestejo'tiduḥsaham //
tapaḥ karttuṃ gatā devi jñātā sūryeṇa suvratā

aśvarūpaṃ tataḥ kṛtvā jagāmāthottarānkurūn //
dadṛśe tatra saṃjñāṃ ca vaḍavārūpadhāriṇīm

gatā sā sammukhaṃ tasya pṛṣṭharakṣaṇatatparā //
tatobhūnnāsikāyogastayostatra sametayoḥ

nāsatya dasrau tanayāvaśvavaktrau vinirgatau //
retasoṃ'te ca revaṃtaḥ khaḍgī carmī tanutradhṛk

aśvārūḍhaḥ samudbhūtastato bāṇadhanurddharaḥ //
tena vai jātamātreṇa aśvārūḍhena līlayā //
nirjitaṃ ca jagaccedaṃ sadevāsuramānuṣam

tato devāḥ parābhūtā brahmāṇaṃ śaraṇaṃ gatāḥ //
praṇamya kathayāmāsurbhayakaṃpitakaṃ dharāḥ

asmākaṃ vibhavaṃ tejo raviputreṇa nāśitam //
revaṃtena sureṃdreṇa śṛṇu lokapitāmaha

tasya gātrasamudbhūto vahnirdhāvati kāla jit //
jvalaṃti pādapāstena pataṃti śikharāṇi ca

sarvato vyākulībhūtaṃ hāhākāramacetanam //
tenaiva pīḍitaṃ sarvaṃ jvālāmālāsamākulam

daśadikṣu pravṛtto'yaṃ samṛddho havyavāhanaḥ //
sarvaṃ kiṃśukasaṃkāśaṃ prajvalanniva dṛśyate

iti teṣāṃ vacaḥ śrutvā brahmaṇoktaṃ varānane //
jñātaṃ mayā suraśreṣṭhā bhavatāṃ kāryamīdṛśam

bhaviṣyati ca vastacca kāṃkṣitaṃ yatsurottamāḥ //
gacchadhvaṃ sahasā tasmācchaṃkaraṃ śaraṇaṃ surāḥ

brahmaṇo vacanaṃ śrutvā mamāṃtikamupāgatāḥ //
tridaśā bhayasaṃtrastā natvā māmi damabruvan

ādityatanayenaiva revaṃtena maheśvara //
dagdhaṃ tribhuvanaṃ sarvaṃ śarīrasthena vahninā //
tejasā mahatā caiva vikrameṇa balena ca

asādhyaḥ kila so'smākaṃ sarveṣāṃ devasattama //
bhavānprabhavate tasya nānyaḥ śaṃkara kaścana

tvāṃ prapadyāmahe sarve bhayārttāḥ śaraṇārthinaḥ //
śaraṇaṃ varadaṃ devaṃ tridaśānāṃ maheśvara

mayā smṛtaḥ sūryaputro revaṃtastatkṣaṇātpriye //
prāptaḥ prītiprasannātmā vacanaṃ cedamabravīt

kiṃ mayā deva karttavyaṃ brūhi sarvamaśeṣataḥ //
tato mayā sūryaputra utsaṃge ca kṛtastadā

snehādācuṃbito mūrdhni pariṣvaktaḥ punaḥpunaḥ //
dadāmi te mahābhāga varaṃ varaya suvrata

parituṣṭosmi te kāmaṃ yatheṣṭaṃ kāmamāpnuhi //
idamājñāpayāmi tvāṃ śreyaścaivamavāpsyasi

mamābhīṣṭaṃ paraṃ sthānaṃ vidyate pṛthivītale //
akṣayaṃ pralaye putra mahākālavanaṃ śubham //
tatra dāsyāmi te sthānaṃ tatra kīrttirbhavipyati

pūrve kaṃṭeśvarasyāpi sthānaṃ paramadurlbham //
tatra tvaṃ vasa revaṃta liṃgaṃ drakṣyasi śāśvatam

sarvadā tridaśaiḥ pūjyo bhaviṣyasi na saṃśayaḥ //
guhyakādhipatistvaṃ ca svargaloke bhaviṣyasi

aśvaśālāsu sarvāsu pūjanīyo bhaviṣyasi //
nṛpatīnāṃ gṛhe caiva vasiṣyasi supūjitaḥ

tejo madīyaṃ tatsthānaṃ liṃgākāraṃ sanātanam //
pūjitaṃ tridaśaistatra saṃsevyaṃ yatnatastvayā

evamukto mayā devi revaṃto ravijastadā //
jagāmākāśamāviśya mahākālavanaṃ kṣaṇāt

dadarśa tatra talliṃgaṃ jyotīrūpaṃ sanātanam //
sūryaputrastu revaṃto dṛṣṭo liṃgena pārvati

proktaḥ praṇayapūrveṇa diṣṭyā dṛṣṭo'si sūryaja //
adyaprabhṛti te nāmnā khyātiṃ yāsyāmi bhūtale

sthātavyaṃ matsamīpe tu sūryaputra tvayā sadā //
akṣayā bhavitā kīrttistvadīyā bhuvanatraye

revaṃteśvarasaṃjño'haṃ bhaviṣyāmi na saṃśayaḥ //
ye māṃ drakṣyaṃti revaṃta bhaktyā paramayā yutāḥ //
teṣāmaśvā bhaviṣyaṃti vijayo yaśa ūrjitam

aiśvaryaṃ dānaśaktiśca putrapautramanaṃtakam //
guhyakānāṃ patirbhūtvā svargaloke sa vatsyati

liṃgasya vacanaṃ śrutvā proktaṃ vai ravisūnunā //
revaṃtena viśālākṣi saṃtuṣṭenāṃtarātmanā

dehi me hyacalā bhaktiṃ dehi me sthānamuttamam //
dehi me paramaṃ jñānaṃ dhruvāṃ kīrtiṃ ca dehi me

bhagavanbhūtabhavyeśa bhavabaṃdhabhayāpaha /
saṃskṛtārtho'smi saṃjātastava devasya darśanāt

janmakoṭisusaṃśuddhā ye tvāṃ paśyaṃti dehinaḥ //
na teṣāṃ punarāvṛttirghorasaṃsārasāgare /

ityuktvā ravisūnurvai revaṃto ravivallabhaḥ //
revaṃteśvaradevasya samīpe saṃvyavasthitaḥ

eṣa te kathito devi prabhāvaḥ pāpanāśanaḥ /
revaṃteśvaradevasya ghaṃṭeśvaramatho śṛṇu

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṃḍe caturaśītiliṅga māhātmye revaṃteśvaramāhātmyavarṇanaṃnāma ṣaṭpañcāśattamo'yāyaḥ