Skanda Purana · Verses 5.5-2

// śrīrudra uvāca // //
anādikalpeśvaraṃ devaṃ paṃcamaṃ viddhi pārvati //
sarvapāpaharaṃ nityamanādirgīyate sadā

kalpasyādau purā devi liṃgametadvinirgatam //
yadā nāgnirna cādityo na bhūmirna diśo na kham

na vāyurna jalaṃ caiva na dyaurne ndurgrahā na ca //
na devāsuragaṃdharvā na piśācā na rākṣasāḥ

ato liṃgātsamudbhūtaṃ jagatsthāvarajaṃgamam //
kālena ca layaṃ yāti liṃge'sminparvatātmaje

asmālliṃgātsamudbhūtā vaṃśā devarṣipaitṛkāḥ //
manvaṃtarāṇi vaṃśāni vaṃśyānucaritaṃ ca yat

yāvatyaḥ sṛṣṭayaścaiva yāvaṃtaḥ pralayāstathā //
samudrāḥ parvatāścaiva nimnagāḥ kānanāni ca

bhūrlokādyāśca ye lokāḥ pātālāḥ sapta ye smṛtāḥ //
gatistathārkasomādigraharkṣa jyotiṣāmapi

dṛśyādṛśyaṃ ca tatsarvamato liṃgādvarānane //
anādikāraṇaṃ yattadavyaktākhyaṃ maharṣayaḥ //
yadāhuḥ puruṣaṃ sūkṣmaṃ nityaṃ sadasadā tmakam

dhruvamakṣayamajaramameyaṃ nānyasaṃśrayam //
gaṃdharūparasairhīnaṃ śabdasparśavivarjitam

anādyaṃtaṃ jagadyoniṃ triguṇaprabhavāvyayam //
asādṛśyamavijñeyaṃ liṃgaṃ proktaṃ maharṣibhiḥ

pralayasyāṃte tenedaṃ divyamāsīdaśeṣataḥ

ahamurvyāṃ prabuddhastu jagadādiranādimān //
sarvaheturaciṃtyātmā paraḥ ko'pyaparakriyaḥ

prakṛtiṃ puruṣaṃ caiva pradarśyāśu jagatpatiḥ //
kṣobhayāmāsa yogena pareṇa parameśvaraḥ

yathā saṃnidhimātreṇa gaṃdhaḥ kṣobhāya jāyate //
manaso nopakartṛtvāttathāsau parameśvaraḥ //
anādiḥ kathyate devo jagatkāraṇatatparam

pradhānaṃ kṣobhyamāṇaṃ tu tena liṃgena pārvati //
jāyate bhuvanādhāro brahmāṃḍa iti viśrutaḥ

yasminnaṃḍe jagatsarvaṃ sadevāsuramānuṣam //
utpannaṃ ca vilīnaṃ ca yasyāṃto'pi na labhyate

sa eva kṣobhakaḥ pūrvaṃ sa kṣobhyaḥ pṛthivīpatiḥ //
sa saṃkocavikāsābhyāṃ pradhānatve vyavasthitaḥ

utpannaḥ sa jagannātho nirguṇo'pi rajoguṇaḥ //
bhuṃjanpravartate sargaṃ brahmatvaṃ samupāgataḥ

brahmatve sṛjate lokāṃstataḥ sattvātirekataḥ //
viṣṇutvametya dharmeṇa karoti paripālanam

tatastamoguṇodbhinno rudratvenākhilaṃ jagat //
upasaṃhṛtya vai śete trailokyaṃ triguṇo'guṇaḥ

yathā prāgvāpakaḥ kṣetrī pālako lāvakastathā //
sa saṃjñā yāti tadvacca brahmaviṣṇutvarudratāḥ

brahmatve sṛjate lokānudratve saṃharatyapi //
viṣṇutve pāti tānsarvāṃstisro'vasthāḥ smṛtāḥ sadā

rajo brahmā tamo rudraḥ sattvaṃ viṣṇurjagatpatiḥ //
eta eva trayo vedā eta eva trayo narāḥ

kalpe kalpe hyanādistu gīyate tridaśaiḥ sadā //
pitṛbhiśca gaṇaiḥ siddhairato'nādikalpeśvaraḥ

nāma prāptaṃ viśālākṣi mahākālavanaṃ sadā //
yadā jāto vivādastu brahmaṇaḥ keśavasya ca

ahaṃ jyāyānahaṃ jyāyānkalpādau sṛṣṭikāraṇāt //
divyā samutthitā vāṇī nirālaṃbā tadāṃbarāt //

mahākālavane liṃgaṃ kalpeśvareti saṃjñakam //
tasyādimathavāṃtaṃ ca yaḥ paśyati sa ca prabhuḥ //
bhaviṣyati na saṃdeho na vādaḥ kriyatā miti

tato devi gato brahmā ūrddhvalokamanaṃtakam //
adholokaṃ gato viṣṇustena vākyena satvaram

nādirdṛṣṭo na cāṃtaśca brahmaṇā keśavena tu //
tadā tau vismayāpannau tuṣṭuvāte parasparam

vedoktasūktairvividhairabhinaṃdya puraḥsthitau //
nādirasti na cāṃtaśca na ca kalpo'tra dṛśyate

tasmādanādikalpo'yamadyaprabhṛti bhūtale //
khyātiṃ yāsyati nāmnā ca mahākālavanottame

pañcapātakasaṃyukto yo martyo duṣṭamānasaḥ //
so'pi gacchecchivaṃ dṛṣṭvānādikalpeśvaraṃ śivam

śivamastu sadā teṣāṃ yeṣāṃ tvaṃ darśanaṃ gataḥ //
te dhanyā mānuṣe loke ye tvāṃ śaraṇāgatāḥ

sarvatīrthābhiṣekaistu yatpuṇyaṃ prāpyate naraiḥ //
tatsarvamadhikaṃ deva labhyate tava darśanāt

tāvatpataṃti saṃsāre sukhaduḥkhasamākule //
tāvanna dṛśyate deva saṃsārārṇavatārakaḥ

yadā pāpakṣayaḥ puṃsāṃ tadā tvaddarśanaṃ bhavet

brahmahā vā surāpo vā steyī ca gurutalpagaḥ //
tatsaṃsargī naro yastu mahākilbiṣakārakaḥ //
so'pi yāti paraṃ sthānaṃ punarāvṛttivarjitam

yatphalaṃ cāśvamedhena rājasūyena yatphalam //
tatphalaṃ samavāpnoti tava deva samarcanāt

te narāḥ paśavo loke teṣāṃ janma nirarthakam //
yairna dṛṣṭo mahādevo'nā dikalpeśvaraḥ śivaḥ

ityuktvā keśavo devo brahmā caiva varānane //
vāme dakṣiṇabhāge ca tasya liṃgasya saṃsthitau

eṣa te kathito devi prabhāvaḥ pāpanāśanaḥ //
yasya śravaṇamātreṇa labhyate paramaṃ padam

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvantyakhaṃḍe caturaśītiliṃgamāhātmye'nādikalpeśvaramāhātmyavarṇanaṃnāma paṃcamo'dhyāyaḥ