Skanda Purana · Chapter 5.46

// sanatkumāra uvāca // //
amarāvatī yathā jātā purī hyeṣā kuśasthalī //
śṛṇu vyāsa mahābhāga yathā brahmābravītsurān

tathāhaṃ saṃpravakṣyāmi vistareṇa tapodhana //
ekadā brahmaṇādiṣṭaḥ prajārthamṛṣisattamaḥ

mārīcaḥ kaśyapastepe tapaḥ paramaduṣkaram //
mahākālavane ramye divye sa hi mahānṛṣiḥ

śīrṇapatrānilāhāro vāyubhakṣī jitendriyaḥ //
pūrṇe varṣasahasre tu vāguvācāśarīriṇī

śrūyatāṃ bho dvijaśreṣṭha mama vākyamanuttamam //
yasmāttapasi tapastīvraṃ phalamuddiśya suvrata

tasmātte saṃtatistāta yāvaccaṃdradivākarau //
tāvattiṣṭhatu medinyāṃ yaśasā putrapautrakaiḥ

aditiste satī bhāryā tvayā sahācarattapaḥ //
tasmātsarveṣu kāleṣu chāyābhūtā yaśasvinī

bhaviṣyaṃti sutāḥ sarve viṣṇuśceṃdrapurogamāḥ //
amarā nirjarā devā divi khyātāḥ sadaiva hi

tvaṃ cāpi ca ṛṣiśreṣṭhaḥ prajāpatirakalmaṣaḥ //
bhaviṣyasi na saṃdeho mamavākyāddvijottama

ityuktvā ca puna rdevī tatraivāṃtaradhīyata //
tadārabhya purīṃ vyāsa kuśasthalīmanuttamām

kaśyapaḥ saha dākṣiṇyā sāgnikaḥ samupāśritaḥ //
prajāpi vavṛdhe tasmā tsadevāsuramānuṣā

marīceḥ kaśyapo jajñe tataḥ sarvaṃ pratiṣṭhitam //
sudhāpānakṛto devāḥ śaśvattenāmarāḥ kṛtāḥ

naṃdanaṃ cāpi tatraiva mahākālavanottame //
kāmadhenuḥ samākhyātā manorathavarapradā

sā siṣeve sadā tatra mahākālaṃ maheśvaram //
pārijātataruśreṣṭhastathā cāmlānapaṃkajam

biṃdusaraḥ samākhyātaṃ mānasaṃ sara uttamam//
haṃsasārasasamākīrṇaṃ surasiddhaniṣevitam

muktāmaṇigaṇākīrṇaṃ ratnaśobhanaśobhitam //
nidhireṣa mahāpadmaḥ kahlārakumudojjvalaḥ

yāni yāni ca divyāni saṃti brahmāṇḍagolake//
tāni sarvāṇi tiṣṭhaṃti mahākālavane śubhe

tenatenātmayogena mānavāścātra saṃsthitāḥ //
tadāhārāstadācārāstadrūpāstatparākramāḥ

anyonyaṃ ca samākīrṇā sarve cāmarasaṃnibhāḥ //
vicaraṃti yathā devāḥ purīmetāṃ janā bhuvi

amarāṃganāsamā nāryaḥ sadaiva sthirayauvanāḥ //
īdṛśī ca purī dṛṣṭā bhuvi vyāsa sanātanī

devadānavagandharvaiḥ kinnaroragarākṣasaiḥ //
bhuktimuktipradā nityā bahukālaphalapradā

amarāṇāṃ kaṭakaṃ hyatra tasmājātāmarāvatī //
ya etasyāṃ mahābhāgāḥ prasaṃgena samāgatāḥ

snānadānādikaṃ kṛtvā paśyatyeva maheśvaram //
na teṣāṃ durlabhaṃ kiñcitputrato dhanato'pi vā

sarvabhogānavāpnoti mṛtaḥ śivapuraṃ vrajet //
paṭhanācchravaṇādvāpi śatarudriyaphalaṃ labhet

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe'vantīkṣetramāhātmye'marāvatīnāmakathanaṃnāma ṣaṭcatvāriṃśo'dhyāyaḥ