સ્કંદ પુરાણ · અધ્યાય 5.46

॥ સનત્કુમાર ઉવાચ ॥ ॥
અમરાવતી યથા જાતા પુરી હ્યેષા કુશસ્થલી ॥
શૃણુ વ્યાસ મહાભાગ યથા બ્રહ્માબ્રવીત્સુરાન્

તથાહં સંપ્રવક્ષ્યામિ વિસ્તરેણ તપોધન ॥
એકદા બ્રહ્મણાદિષ્ટઃ પ્રજાર્થમૃષિસત્તમઃ

મારીચઃ કશ્યપસ્તેપે તપઃ પરમદુષ્કરમ્ ॥
મહાકાલવને રમ્યે દિવ્યે સ હિ મહાનૃષિઃ

શીર્ણપત્રાનિલાહારો વાયુભક્ષી જિતેન્દ્રિયઃ ॥
પૂર્ણે વર્ષસહસ્રે તુ વાગુવાચાશરીરિણી

શ્રૂયતાં ભો દ્વિજશ્રેષ્ઠ મમ વાક્યમનુત્તમમ્ ॥
યસ્માત્તપસિ તપસ્તીવ્રં ફલમુદ્દિશ્ય સુવ્રત

તસ્માત્તે સંતતિસ્તાત યાવચ્ચંદ્રદિવાકરૌ ॥
તાવત્તિષ્ઠતુ મેદિન્યાં યશસા પુત્રપૌત્રકૈઃ

અદિતિસ્તે સતી ભાર્યા ત્વયા સહાચરત્તપઃ ॥
તસ્માત્સર્વેષુ કાલેષુ છાયાભૂતા યશસ્વિની

ભવિષ્યંતિ સુતાઃ સર્વે વિષ્ણુશ્ચેંદ્રપુરોગમાઃ ॥
અમરા નિર્જરા દેવા દિવિ ખ્યાતાઃ સદૈવ હિ

ત્વં ચાપિ ચ ઋષિશ્રેષ્ઠઃ પ્રજાપતિરકલ્મષઃ ॥
ભવિષ્યસિ ન સંદેહો મમવાક્યાદ્દ્વિજોત્તમ

ઇત્યુક્ત્વા ચ પુન ર્દેવી તત્રૈવાંતરધીયત ॥
તદારભ્ય પુરીં વ્યાસ કુશસ્થલીમનુત્તમામ્

કશ્યપઃ સહ દાક્ષિણ્યા સાગ્નિકઃ સમુપાશ્રિતઃ ॥
પ્રજાપિ વવૃધે તસ્મા ત્સદેવાસુરમાનુષા

મરીચેઃ કશ્યપો જજ્ઞે તતઃ સર્વં પ્રતિષ્ઠિતમ્ ॥
સુધાપાનકૃતો દેવાઃ શશ્વત્તેનામરાઃ કૃતાઃ

નંદનં ચાપિ તત્રૈવ મહાકાલવનોત્તમે ॥
કામધેનુઃ સમાખ્યાતા મનોરથવરપ્રદા

સા સિષેવે સદા તત્ર મહાકાલં મહેશ્વરમ્ ॥
પારિજાતતરુશ્રેષ્ઠસ્તથા ચામ્લાનપંકજમ્

બિંદુસરઃ સમાખ્યાતં માનસં સર ઉત્તમમ્॥
હંસસારસસમાકીર્ણં સુરસિદ્ધનિષેવિતમ્

મુક્તામણિગણાકીર્ણં રત્નશોભનશોભિતમ્ ॥
નિધિરેષ મહાપદ્મઃ કહ્લારકુમુદોજ્જ્વલઃ

યાનિ યાનિ ચ દિવ્યાનિ સંતિ બ્રહ્માણ્ડગોલકે॥
તાનિ સર્વાણિ તિષ્ઠંતિ મહાકાલવને શુભે

તેનતેનાત્મયોગેન માનવાશ્ચાત્ર સંસ્થિતાઃ ॥
તદાહારાસ્તદાચારાસ્તદ્રૂપાસ્તત્પરાક્રમાઃ

અન્યોન્યં ચ સમાકીર્ણા સર્વે ચામરસંનિભાઃ ॥
વિચરંતિ યથા દેવાઃ પુરીમેતાં જના ભુવિ

અમરાંગનાસમા નાર્યઃ સદૈવ સ્થિરયૌવનાઃ ॥
ઈદૃશી ચ પુરી દૃષ્ટા ભુવિ વ્યાસ સનાતની

દેવદાનવગન્ધર્વૈઃ કિન્નરોરગરાક્ષસૈઃ ॥
ભુક્તિમુક્તિપ્રદા નિત્યા બહુકાલફલપ્રદા

અમરાણાં કટકં હ્યત્ર તસ્માજાતામરાવતી ॥
ય એતસ્યાં મહાભાગાઃ પ્રસંગેન સમાગતાઃ

સ્નાનદાનાદિકં કૃત્વા પશ્યત્યેવ મહેશ્વરમ્ ॥
ન તેષાં દુર્લભં કિઞ્ચિત્પુત્રતો ધનતોઽપિ વા

સર્વભોગાનવાપ્નોતિ મૃતઃ શિવપુરં વ્રજેત્ ॥
પઠનાચ્છ્રવણાદ્વાપિ શતરુદ્રિયફલં લભેત્

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં પઞ્ચમ આવંત્યખણ્ડેઽવન્તીક્ષેત્રમાહાત્મ્યેઽમરાવતીનામકથનંનામ ષટ્ચત્વારિંશોઽધ્યાયઃ