Skanda Purana · Verses 5.41-2

// śrīmahādeva uvāca // //
catvāriṃśattamaṃ saikamīśvaraṃ viddhi pārvati //
luṃpeśvaramiti khyātaṃ nāma yasya mahītale

deśe mlecchagaṇākīrṇe babhūva jagatīpatiḥ //
luṃpādhipa iti khyāto maheṃdrasamavikramaḥ

tasyāsīddayitā bhāryā viśālānāma nāmataḥ //
sā yauvanaguṇopetā rūpeṇāpratimā bhuvi

sa yuddhakāmo nṛpatiḥ paryapṛcchadvijottamān

atha kenāpi kathitamāśrame sāmago dvijaḥ ///
tena sārddhaṃ mahābāho yudhyasva tvaṃ nṛpottama

tataḥ sa prasthito rājā mlecchaiḥ sārddhaṃ sahasraśaḥ //
tuṣārairbarbarairluṃpaiḥ pahlavaiḥ śvagaṇaistathā

dasyubhiḥ saṃvṛtaḥ krūraiḥ krodhenākuliteṃdriyaḥ //
ājagāmāśramaṃ puṇyaṃ sāmagasya munestadā

muninā pūjitastena madhuparkādiviṣṭaraiḥ //
etasminnantare rājā homadhenuṃ dadarśa ha

prārthayāmāsa sahasā na dattā muninā tadā //
pramathya cāśramaṃ tasya homadhenuṃ jahāra saḥ //
vanaṃ babhaṃja sakalaṃ tasya viprasya paśyataḥ

kālyamānāṃ ca gāṃ dṛṣṭvā vatsaṃ cātīva duḥkhitam //
uvāca vacanaṃ vipro mā rājansāhasaṃ kuru

evaṃ vadaṃtaṃ vipreṃdraṃ śaraistīkṣṇairjaghāna ha //
luṃpaḥ krodhasamāviṣṭo duṣṭo duṣṭajanairvṛtaḥ

asakṛtputraputreti vilapaṃtamanāthavat //
hatvā ca sāmagaṃ vipraṃ jagāma svagṛhaṃ nṛpaḥ

etasminnaṃtare putraḥ samitpāṇirupāgataḥ //
dṛṣṭvā ca pitaraṃ vipraṃ tadā mṛtyuvaśaṃ gatam //
anāgasaṃ mahātmānaṃ vilalāpa suduḥkhitaḥ

kenedaṃ kutsitaṃ karma kṛtaṃ pāpena me pitā //
ayudhyamāno vṛddhaḥ sanhataḥ śaraśataiḥ śiteḥ

vilapyaivaṃ sakaruṇaṃ bahunā nāvidhaṃ tathā //
pretakāryāṇi sarvāṇi pituścakre vidhānataḥ

dadāha pitaraṃ cāgnau toyamādāya satvaram //
tasya luṃpādhipasyāpi dadau śāpaṃ sudāruṇam

svadharmanirato vidvānyena me nihataḥ pitā //
sa pāpātmā durācāraḥ kuṣṭharogamavāpnuyāt

etasminnantare rājā kuṣṭharogeṇa pīḍitaḥ //
acaṃkramaṇatāṃ prāpto luṃpādhīśo varānane

auṣadhairadhiko'bhyeti brahmaśāpaprabhāvataḥ //
vairāgyānmartukāmo'sau kāṣṭhānyādāya duḥkhitaḥ

citāṃ kartuṃ samārebhe samāyāto'tha nāradaḥ //
pūjito vidhinā tena duḥkhitena nṛpeṇa hi

atha papraccha luṃpo'sau nāradaṃ munisattamam //
akasmānmama devarṣe kuṣṭharogo babhūva ha //
tenāhaṃ pīḍito'tīva na ca śāṃtiṃ vrajatyasau

auṣadhairvarddhate kasmādetadākhyātumarhasi //
na testvaviditaṃ kiṃcidihaloke paratra ca

tasya tadvacanaṃ śrutvā luṃpādhīśasya nāradaḥ //
kathayāmāsa tatsarvaṃ brahmaśāpaṃ sudustaram

tataḥ sabhāryo nṛpatiḥ prārthayāmāsa nāradam //
kathaṃ me bhagavañchāpo dustaro yāsyati kṣayam

evamuktastu lumpena nārado bhagavānṛṣiḥ //
kāruṇyātkathayāmāsa sabhāryasya yaśasvini

mahākālavane rājam̐lliṃgaṃ kuṣṭhaharaṃ param //
sarvasaṃpatkaraṃ tatra vidyate pāpanāśanam

śiprāyāśca taṭe ramye keśavārkasya pūrvataḥ //
tatra tvaṃ gaccha rājeṃdra kāṃtyā yukto bhaviṣyasi

evamuktastu luṃpo'sau hyājagāma tvarānvitaḥ //
mahākālavanaṃ ramyaṃ maharṣigaṇasevitam

prāptaḥ svargopamaṃ bhūpaḥ śiprayā pariśobhitam //
viveśa ca mudā yukto dṛṣṭvā liṃgamanuttamam

snātvā śiprājale puṇye mahāpātakanāśane //
darśanāttasya liṃgasya divyarūpo vabhūva ha

kuṣṭharogeṇa muktastu mukto vai brahmahatyayā //
kṛtakṛtyo nṛpo jāto darśanādeva pārvati

sa tatra tāmuṣitvaikāṃ rajanīṃ pṛthivīpatiḥ //
tāpasānāṃ paraṃ cakre satkāraṃ bhāryayā saha

tataḥ kṛtasvastvayanastāpasaistairmahātmabhiḥ //
divyajñānānvitairdivyaiḥ sūryavaiśvānaraprabhaiḥ

kṛtaṃ nāma tadā tasya liṃgasya kamalānane //
luṃpenārādhito yasmāddevo'yaṃ kuṣṭhanāśanaḥ //
lumpeśvara iti khyāto bhaviṣyati mahītale

pūjayiṣyaṃti ye bhaktyā liṃgaṃ lumpeśvaraṃ param //
snātvā śiprājale puṇye te yāsyaṃti paraṃ padam

prārthayiṣyaṃti yānkāmānmanasā/ cepsitānpriyān //
tānāpsyaṃti na sandeho lumpeśasya ca darśanāt

mahāpāpasamāyukto yaḥ paśyati samāhitaḥ //
liṃgaṃ lumpeśvaraṃ so'pi devatulyo bhaviṣyati

goghnaścaiva kṛtaghnaśca mātṛhā gurutalpagaḥ //
duṣṭakarmasamācāro bhrātṛhā pitṛhā tathā

/ /
lumpeśvaraṃ sakṛtpaśyanmucyate sarvakilbiṣaiḥ //
pūjito'pi dahetpāpaṃ saptajanmārjitaṃ ca yat

ityuktvā munayaḥ sarve pūjayāmāsu ranvitāḥ //
kuṣṭharogavinirmukto rājā svaviṣayaṃ gataḥ

eṣa te kathito devi prabhāvaḥ pāpanāśanaḥ //
lumpeśvarasya devasya śṛṇu gaṃgeśvaraṃ param

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe caturaśītiliṅgamāhātmye luṃpeśvaramāhātmyava rṇanaṃnāmaikonacatvāriṃśo'dhyāyaḥ