Skanda Purana · Verses 5.40-2

// īśvara uvāca // //
catvāriṃśattamaṃ viddhi kuṃḍeśvaramataḥ śṛṇu //
yasya darśanamātreṇa labhyate sadgatiḥ parā

vijñapto'haṃ tvayā devi maṃdare cārukaṃdare //
vīrakaṃ draṣṭumicchāmi kva gato mama putrakaḥ

mayā proktaṃ viśālākṣi mahākālavano ttame //
jalamadhye sthitastepe tapaḥ paramadāruṇam

munibhiḥ sahito dhīmānbhrājamānoṃ'śumāniva //
gacchāmastatra taṃ draṣṭuṃ gaṇaiḥ sārddhaṃ varānane //

madīyaṃ vacanaṃ śrutvā tvayāhaṃ preritastadā //
uttiṣṭha śambho gacchāmo vṛṣamāruha satvaram

saprasnavau stanau jātau sadyaḥ saṃsmṛtya vīrakam //
mayā smṛto vṛṣo devi dharmarūpī sanātanaḥ

madīyaṃ ciṃtitaṃ jñātvā mamapārśvamupāgataḥ //
ārūḍho'haṃ tvayā sārddhaṃ tasminneva vṛṣe tadā

prasthitastatkṣaṇācchīghraṃ gaṇairnānāvidhaiḥ saha //
vegātprayāto vṛṣabhaskaṃdhālaṃbitayā tvayā

raṇadvalayabāhubhyāṃ gāḍhamāliṃgito hyaham//
tvaṃ bhītā ca tadā jātā yadātīva praṇoditaḥ

vṛṣo mayā viśālākṣi sa kṛṣṭo gaṇapaistadā //
kṛṣṭaṃ ca satvaraṃ dṛṣṭvā proktaṃ ca bhītayā tadā

śrāṃtāsmi sāṃprataṃ deva vegenānena bhīṣitā //
tadviśramitumicchāmi bhūdharasya taṭe vibho

kṣaṇaṃ padbhyāṃ gamiṣyāmi viṣamoyaṃ girirmahān//
tvadīyaṃ vacanaṃ śrutvā bāḍhamuktaṃ priye mayā

muhūrttaṃ cārujaghane śailapādamupāśritā //
kuru śramāpanayanaṃ yāvadvegātprayāmyaham //

paṃthāna tvatsukhaṃ yatra taṃ vayaṃ mṛgayāvahe //
eṣa kuṇḍo gaṇādhyakṣastvatsamīpe vasiṣyati //
tvadājñāvaśavarttī ca kiṃkaraḥ sthāpito mayā //

evamuktvā tato devi saṃsthāpya gaṇarakṣakam //
ārūḍho'haṃ gireḥ prāṃtamudayādriṃ raviryathā

tato'valokito'tyarthaṃ ramaṇīyo mahā giriḥ //
idaṃ ramyamidaṃ ramyamityasminvaraparvate

paśyato mama śaileṃdraṃ gatāḥ saṃvatsarā daśa //
tvayātha ciṃtitaṃ devi kva gatastripurāṃtakaḥ

nūnaṃ na madanātaptāṃ vetti māṃ rativarjitām //
māṃ vihāya mahādevo nirviśaṃkaḥ kva varttate

harasya kvāpi yātasya vairaṃ saṃsmṛtya cittajaḥ //
bādhate māmanaṃgopi cāparopitamārgaṇaḥ //
vilokayaṃtīṃ hā dṛṣṭvā vilapaṃtīṃ punaḥ punaḥ

tataḥ kuṇḍo gaṇādhyakṣo jñātvā bhāvaṃ tvadīyakam //
utkṛṣṭena svareṇoktaṃ mā devi vimanā bhava

āyāta eṣa te bharttā mā cetaḥ kaluṣaṃ kuru //
etacchrutvā vacastasya kuṇḍasya kamalānane

duḥkhārttayā tvayā proktaḥ kuṇḍa vedmi na śaṃkaram //
kva gataḥ kiṃ ca kurute kālaṃ dīrghamimaṃ śivaḥ //
darśayasva mahādevamityukto' sau punaḥpunaḥ

yadā na darśitastena kuṇḍenāhaṃ varānane //
tadā śaptastvayā devi kruddhayā gaṇarakṣakaḥ

gaccha tvaṃ mānuṣaṃ lokaṃ yasmānna kathito haraḥ //
etasminnaṃtare devi prāpto'haṃ tvatsamīpataḥ

pṛṣṭaścāhaṃ tvayā devi vihāya kva gato'si mām //
durgame parvate śūnye tasmāttya kṣyāmi jīvitam

gatvāgre bhūdharasyāsya kiṃ kṛtaṃ ca tvayā vibho //
mayā tava vacaḥ śrutvā kathitaṃ sarvameva tat

durādharṣataraḥ śailaḥ samaṃtādduratikramaḥ //
tvatpriyārthaṃ mahābhāge mayā mārgo'valokitaḥ

yena mārgeṇa viśrabdhaṃ gamiṣyāmaḥ sumadhyame //
ayaṃ kuṇḍo gaṇo devi viṣaṇṇo vyākulaḥ kṛtaḥ

tvayāpyuktaṃ mahādeva kuṇḍaḥ śapto mayā gaṇaḥ /
mamājñā na kṛtā yasmādviphalaṃ na vaco mama //
tasmādyātu mamādeśā nmahākālavanaṃ śubham

bhairavaṃ rūpamāsthāya yatra tvaṃ cottare sthitaḥ //
tasyāgrataḥ sthitaṃ liṃgaṃ varttate kāmadaṃ sadā

tasya darśana mātreṇa gaṇapo'yaṃ bhaviṣyati //
kuṇḍeśvareti vikhyātaḥ sa devo vai bhaviṣyati

ityuktaḥ sa tvayā devi samāsādya punaḥpunaḥ //
prasthāpitastvayādeśādvraja kuṇḍa mamājñayā

mahākālavanaṃ śīghraṃ liṃgamārādhya satvaram //
kīrtiste bhavitā putra triṣu lokeṣu śāśvatī

ityuktastatkṣaṇātprāpto dṛṣṭvā liṅgaṃ tu śāśvatam //
uttarasya śivasyāgre pūjayāmāsa bhaktitaḥ

tato devāḥ sagaṃdharvāḥ siddhāśca paramarṣayaḥ //
yakṣāścāpsarasaścaiva samājagmuḥ sahasraśaḥ

athāhaṃ tatkṣaṇātprāptastvayā sārddhaṃ gaṇairvṛtaḥ //
dṛṣṭvā kuṇḍaṃ gaṇeśaṃ tu liṃgārādhanatatparam

samādhidhyānanirataṃ proktamasmābhirādarāt //
tuṣṭā te pārvatī putra prārthyatāṃ varamuttamam

akṣayaṃ tu padaṃ prāptaṃ tvayā liṃgasya darśanāt //
adyaprabhṛti devo'yaṃ khyāto bhuvi bhaviṣyati //
nāmnā kuṇḍeśvaro yasmātsarvasaṃpatkaraḥ sadā

kuṇḍeśvaramanādiṃ tu bhaktyā paśyati yo naraḥ //
so'śvamedhasahasrasya phalaṃ prāpsyati nānyathā

tasya dānaphalaṃ sarvaṃ sarvatīrthaphalaṃ sadā //
liṃgaṃ kuṇḍeśvaraṃ yastu bhaktyā saṃpūjayiṣyati

daśānāmaśvamedhānāmagniṣṭomaśatasya ca//
sparśanātphalamāpnoti kuṇḍeśvarasya sarvadā

prātaḥ paśyaṃti ye bhaktyā kṛtvā niyamapūrvakam//
siddhiṃ sukāmikīṃ hṛṣṭāḥ saṃprāpsyaṃti na saṃśayaḥ

eṣa te kathito devi prabhāvaḥ pāpanāśanaḥ //
kuṇḍeśvarasya devasya śṛṇu luṃpeśvaraṃ param

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṃḍe caturaśītiliṅgamāhātmye kuṃḍeśvaramāhātmyavarṇanaṃnāma catvāriṃśo 'dhyāyaḥ