Skanda Purana · Verses 5.4-2

śrīmahādeva uvāca //
khyāto'vaṃtyāṃ caturtho'sau devo ḍamarukeśvaraḥ//
dṛṣṭe yasmiñjagannāthe yāti pāpaṃ ca saṃkṣayam

purā vaivasvate kalpe rururnāma mahāsuraḥ //
tasya putro mahābāhurvajronāma mahābalaḥ //
babhūva sumahākāyastīkṣṇadaṃṣṭro bhayaṃkaraḥ

tena devāḥ svādhikārāccālitāstridaśāla yāt

tato nītaṃ dhanaṃ teṣāṃ brahmāṇaṃ te tato yayuḥ //
brahmāpi bhayasaṃvigno babhūvākuliteṃdriyaḥ

jñātvāvadhyaṃ suraiḥ sārdhaṃ sarvaiḥ so'thamahā balaḥ //
teṣu naṣṭeṣu ye viprā yajvāno'tha tapasvinaḥ //
tāñjaghāna sa duṣṭātmā ye cānye dharmacāriṇaḥ

niḥsvādhyāyavaṣaṭkāraṃ tadāsīddharaṇīta talam//
naṣṭayajñotsavaṃ devi hāhābhūtamacetanam

tataḥ pravyathitā devāstathā sarve maharṣayaḥ //
sametyāmaṃtrayanmaṃtraṃ vadhārthaṃ tasya durmateḥ

tataḥ kāyo'bhavatsadyaḥ sarveṣāṃ puratastadā //
teṣāṃ ciṃtayatāṃ devi tejaḥpuṃjena cāvṛtaḥ

tasmātkṛtyā samutpannā divyā kamalalocanā //
dyotayaṃtī diśaḥ sarvāḥ svatejobhiḥ samaṃtataḥ

sābravīttridaśānsarvānkasmātsṛṣṭā hyahaṃ surāḥ //
yatkartavyaṃ mayā karma tacchīghraṃ saṃnivedyatām

tatastu tridaśāḥ sarve śrutvā tasyāḥ śubhā giraḥ //
ācakhyuḥ sakalaṃ tasyai tadā vajrasya ceṣṭitam

śrutvā jahāsa sā devī sāṭṭahāsaṃ muhur muhuḥ //
tasyā hasaṃtyā niḥsasruḥ kanyāḥ kamalalocanāḥ

pāśāṃkuśadharā raudrā jvālāmālāvṛtānanāḥ //
phetkāreṇa ca saṃnādaiścālayaṃtyaścarācaram

gatāḥ sarvā mahādevi yatra vajro mahāsuraḥ //
yuddhaṃ tu tumulaṃ jātaṃ tābhistasya bhayāvaham

śastrāstrairbahudhā muktairvyāptaṃ caiva digaṃtaram //
saṃnaddhākhilasainyāste yuyudhuḥ samare bhṛśam

tataḥ pravavṛte yuddhaṃ tayā devyā suradviṣām //
tato mātṛgaṇaṃ kruddhaṃ marddayantaṃ mahāsu rān //
parāṅmukhaṃ balaṃ dṛṣṭvā vajro māyāmathāsṛjat

tāmasīṃnāma duḥsādhyāṃ yayā muhyati kanyakāḥ

tamobhūte tatastasminsā devī bhayavihvalā //
tābhiḥ sārddhaṃ samāyātā mahākālavanottamam

kapālavānharo yatra liṃgākāreṇa saṃsthitaḥ //
jñātvā mātṛgaṇaṃ naṣṭaṃ tato māyāprabhāvataḥ

vajro'pi tridaśāñjñātvā devyā sārddhamathopi(ṣi?)tān //
ājagāma tamuddeśaṃ svasainyaparivāritaḥ

mahākālavane divye rathakoṭiśatairvṛtaḥ//
samaṃtācca vanaṃ devi tatkruddho vākyamabravīt

adya devānhaniṣyāmi tayā sākaṃ suduṣṭayā //
kanyābhiḥ saha yā naṣṭā tamomāyābalena tu

etasminnaṃtare kāle nārado munisattamaḥ//
sotsukastu samāyāto maṃdare cārukaṃdare

kathayāmāsa devanāṃ vajrāddevaparābhavam

mahākālavane deva tāḍitāsttridaśāḥ prabho//
vajreṇa ruruputreṇa tasmādyāhi maheśvara

nāradasya vacaḥ śrutvā tato'haṃ parameśvari//
maṃdarādāgatastūrṇaṃ kṛtvā rūpaṃ subhairavam

sarpairlasadbhiratyugrairbhīṣaṇairgaṇasaṃvṛtaḥ//
agre dṛṣṭaṃ mahatsainyaṃ dānavānāṃ bhayāvaham

mahākālavanaṃ ruddhaṃ samaṃtādasureṇa tu //
vajreṇa ruruputreṇa duḥsahena yaśasvini

tadāgatya mayā tāḍya raudraṃ ḍamarukaṃ tathā //
mohitaṃ sahasā sainyaṃ vajrasyaiva durātmanaḥ

ḍamarukasya nādena hyutthitaṃ liṃgamuttamam //
vidārya vasudhāṃ devi jvālāmālākulaṃ tadā

tasya liṃgasya ca tadā mahājvālā vinirgatā //
ekadeśādvarārohe brahmāṃḍavyāpinī tathā

liṃgasyānyapradeśāttu vāyuḥ samabhavanmahān

tejojvālāsamūhena vātena preritena ca //
saha cakreṇa tatsainyaṃ dagdhaṃ bhasmatvamāgatam

tato devagaṇāḥ sarve harṣanirbharamānasāḥ //
namaścakrurha te tasminruruputre mahābale

asya devasya māhātmyāddagdho vajro mahābalaḥ //
sasainyobhūttatastasmādeṣa ḍamarukeśvaraḥ //
khyātiṃ yāsyati lokesminsarvakāmaphalapradaḥ

ḍamarukasya tu nādena jāto yasmānmahītale //
ataḥ pūjyavaro devo bhaviṣyati na saṃśayaḥ

dṛṣṭvā ye pūjayiṣyaṃti devaṃ ḍamarukeśvaram //
te sarve duḥkhanirmuktā bhaviṣyaṃti gatajvarāḥ

cāṃdrāyaṇānāṃ vidhivacchatānāmatha yatphalam //
tatphalaṃ samavāpnoti ḍamarukeśvarapūjanāt

asminsthāne sthitaṃ liṃgaṃ bhaktyā ḍamarukeśvaram //
prasaṃgādapi paśyaṃti hyapi pāpaparā narāḥ

te'pyavaśyaṃ tu yāsyaṃti rudralokaṃ sanātanam //
bhaktāḥ stoṣyaṃti ye liṃgaṃ khyātaṃ ḍamarukeśvaram

mānasaiḥ pātakairmuktā yāsyaṃti paramaṃ padam //
aśvamedhasahasraṃ tu vājapeyaśataṃ bhavet //
gosahasraphalaṃ cātra dṛṣṭvā prāpsyaṃti mānavāḥ

yo yāti saṃgare dhīro dṛṣṭvā ḍamarukeśvaram //
jayedripūnathāṃte sa rudraloke mahīyate

eṣa te kathito devi prabhāvaḥ pāpanāśanaḥ //
stutastu kīrtitaścaiva sarvābhīṣṭaphalaprada

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe caturaśītiliṅgamāhātmye ḍamarukeśvarūmāhātmyavarṇanaṃnāma caturtho' dhyāyaḥ