Skanda Purana · Verses 5.32-2

// īśvara uvāca // //
triṣu lokeṣu vikhyātaṃ dvātriṃśattamamuttamam //
viddhi siddhipradaṃ puṃsāṃ pattaneśvaramīśvaram

purā'haṃ parvate devi maṃdare cārukandar //
krīḍansārddhaṃ tvayā pṛṣṭaḥ kadācidrahasi sthitaḥ

kimarthaṃ parvataṃ tyaktvā kailāsaṃ ramaṇīyakam //
muktā phalaśilāśubhraṃ śaṅkhacandrāṃśunirmalam

siddhacāraṇagandharvakiṃnarodgītanāditam //
sadā puṣpadrumacchannaṃ kadalīvanarājitam

atha kokilacakrāhvacakorakurarākulam //
pu'ṇyalokopamaṃ sthānaṃ triviṣṭapavibhūṣaṇam

mahākālavane śūnye nānāgulmalatāvṛte //
gajeṃdragajaśārdūla siṃhaśambarasaṃkule

ṛkṣavānaragomāyujantukādivirājite //
mayūrasarpamārjāramūṣikādivirājite

kathaṃ vāsaḥ kṛto deva kautūhalamidaṃ mama

iti pṛṣṭastvayā devi maṃdare cārukandare //
mayā proktaṃ prasannena pattanaṃ ca mama priye

mahākālavanaṃ ramyaṃ svargātsukhakaraṃ param //.
smaśānapīṭhasatkṣetravanoparasamāśritam

anaupamyaguṇaṃ viddhi pattanaṃ parvatātmaje //
evaṃ pattanadevo vai na dṛṣṭo bhuvanatraye //
gītavāditracāturyaiḥ sparddhate yaḥ surālayam

etasminnaṃtare devi devarṣirnārado muniḥ //
draṣṭukāmaḥ samāyāto mandare māṃ yaśasvini

vinodārthaṃ mayā pṛṣṭastvatpriyārthaṃ kutūhalāt //
kva tvayā gamitaḥ kālaḥ kalpasaṃkhyo mahāmune

kasminnāśramasaṃsthāne tapasaḥ saṃcayaḥ kṛtaḥ //
tīrthāni kāni bhrāṃtāni kva te ratirabhūcciram

kautukaṃ dṛṣṭapūrvaṃ tu vada me munisattama //
iti pṛṣṭo mayā devi brahmaputro mahāmuniḥ //
kathayāmāsa vṛttāṃtaṃ pattanasya prayatnataḥ

bahūni saṃparikramya tīrthānyāyatanāni ca //
pattanāni vicitrāṇi deśāśca nagarāṇi ca

aṭanārthaṃ mahādeva jaṃbūdvīpe manorame //
dṛṣṭaḥ pattanarājaśca sadānaṃdakaraḥ paraḥ

svecchākalpitavinyāsaḥ prāsādaśatakalpitaḥ //
icchākāmaphalāvāptira nirdeśyasukhāvahaḥ

sarvartukusumāmodasukhasparśānilāvṛtaḥ //
vīṇāveṇuravairghuṣṭo manaḥprahlādakārakaḥ

vajreṃdranīlavaiḍūryacandrakāṃtādidī pitaḥ //
jarāmṛtyubhayopetaḥ sarvavyādhivivarjitaḥ

śakrāgniyamarakṣobdhivāyusomeśasevitaḥ //
ūrddhādhaḥ saptalokeṣu puṇyeṣu nivasaṃti hi //

sadā pramuditā devāste'pi kāṃkṣaṃti pattanann //
tatra śāṃtā mahātmāno nivasaṃte maheśvara

vidyotitadiśo dāṃtāḥ sūrya vaiśvānaraprabhāḥ //
divyāṃbaradharā dhīrā jagamukuṭadhāriṇaḥ

viprā māheśvarāḥ puṇyāḥ kṣatriyā haratatparāḥ //
mumukṣavastaponiṣṭhā vaiśyā śūdrāścirāyupaḥ

sa śubhrarūpaḥ sa ca lohitākṛtiḥ sa cāpi pītaḥ sasitetaraḥ kvacit //
sa nāmadheyaḥ sa ca nāmavarjyaḥ so'dṛ śyarūpaḥ sa ca dṛṣṭarūpaḥ

kvacidravisahasrākṣaḥ kvacidekaraviprabhaḥ //
kvaciccandrādviśiṣyeta kvacidaṃgulikāṃtimān

janma mṛtyujarārogairduḥkhāni vividhāni ca //
prayāti vilayaṃ tāni prasanne pattaneśvare

eṣa te kathito devi prabhāvaḥ pāpanāśanaḥ //
pattaneśasya devasya ānaṃdeśamataḥ śṛṇu

iti śrīskāṃde mahāpurāṇa ekāśītisāhasryāṃ saṃhitāyāṃ paṃcama āvaṃtyakhaṃḍe caturaśītiliṃgamāhātmye pattaneśvara māhātmyavarṇanaṃnāma dvātriṃśo'dhyāyaḥ