Skanda Purana · Verses 5.31-2

// śrīmahādeva uvāca // //
ekatriṃśattamaṃ viddhi devaṃ khaṃḍeśvaraṃ priye //
saṃpūrṇaṃ jāyate yasya darśāddānavratādikam

āsīttretāyuge devi bhadrāśvonāma pārthivaḥ //
yasya nāmnā'bhavadvarṣaṃ bhadrāśvaṃnāma nāmataḥ

tasyāgastyaḥ kadācittu gṛhamāgamya sattamaḥ //
uvāca saptarātraṃ tu vasāmi bhavato gṛhe

taṃ rājā śirasā natvā svāsyatāmityabhāṣata //
tasya kāṃtimatīnāma bhāryā paramaśobhanā

tasyāstejaḥ samabhavaddvādaśādityasaṃnibham //
sapatnīnāṃ śataṃ tasyā vidyate varavarṇini

tā dāsya iva karmāṇi kurvaṃtyaharahaḥ sadā //
kāṃtimatyāḥ prabhāvena bhayottra stāḥ sulocanāḥ

tāmagastyastathā dṛṣṭvā tanmukhāsaktalocanām //
evaṃbhūtāṃ tathā dṛṣṭvā rājñīṃ paramaśobhanām //
sādhusādhu jagannāthetyagastyaḥ prāha harṣitaḥ

dvitīye divasepyevaṃ rājñīṃ dṛṣṭvā mahāprabhām //
aho hyaṃganayā muṣṭaṃ jagadetaccarācaram

ityagastyo dvitīye'hni rājñīṃ dṛṣṭetyuvāca ha //
tṛtīye'hni ca tāṃ dṛṣṭvā punarevamuvāca ha

aho mūḍhā na jānaṃti liṃgamāhātmyamuttamam //
mahākālavane kṣetre cyavaneśasya pūrvataḥ

khaṃḍavratāni jāyaṃte pūrṇāni darśanādyadaḥ //
caturthe divase hastāvutkṣipya punarabravīt

sādhusādhu jagannātha sādhu bhadrāśva suvrata //
paṃcame divase'pyevaṃ ṣaṣṭhe caiva punaḥpunaḥ

nṛtyaṃtaṃ saptame dṛṣṭvā dine patnyā samanvitaḥ //
provāca cainaṃ rājā sa vismitenāṃtarātmanā //
kiṃ harṣakāraṇaṃ brahmanyena nṛtyasamanvitaḥ

// agastya uvāca // //
aho bhūpāla mūḍhastvaṃ mahāmūrkhāśca maṃtriṇaḥ //
aho purohito mugdho ye na jānaṃti me matam

īdṛśā api jāyaṃte rājāno yasya darśanāt //
evamuktastato rājā kṛtāṃjalirabhāṣata

na jānīmo vayaṃ brahmannabhiprāyaṃ tavādhunā //
kathayasva mahābhāga yadyanugrahakṛdbhavān

// agastya uvāca // //
iyaṃ rājñī tvadīyābhūddāsī vaiśyasya vaidiśe //
nagare haridattasya tvamasyāḥ patireva ca //
khaṃḍavrataprabhāvena jātaḥ karmakaro bhavān

sa ca vaiśyo mahākāle gatvā devaṃ maheśvaram//
arcayāmāsa vivivadgaṃdhapuṣpādibhiḥ śubhaiḥ

abhyarcya tu gṛhaṃ yāvadbhavaṃtau rakṣapālakau //
tataḥ kālena mahatā mṛtau dvāvapi daṃpatī

tena puṇyena te janma priyavratagṛhe'bhavat //
iyaṃ ca patnī te jātā purā vaiśyapradāsikā

parakīyaprasaṃgena saṃjātā bhūbhiruttamā //
rājyaṃ patnī sutā sādhurityuktaṃ vacanaṃ mayā

tasya devasya māhātmyādyajaṃtaṃ vividhairmakhaiḥ //
paśyāmi tvāṃ mahīpāla bhūpālaśataveditam

ataḥ sādhupurā proktaṃ mayā tava mahīpate

iti tasya vacaḥ śrutvā kuṃbhayonermahātmanaḥ //
mahākālavane gaṃtuṃ matiṃ cakre mahīpatiḥ //
tataḥ sāṃtaḥpuraḥ prāyāttena sārddhaṃ maharṣiṇā

agastyakathitaṃ liṃgaṃ dadarśa śraddhayā punaḥ //
pūjayāmāsa vidhivatpatnyā sārddhaṃ mahīpatiḥ

tatastuṣṭastadā devo nṛpaṃ prāhāmitadyutiḥ //
mano'bhīṣṭaṃ tapastestu bhogamaiśvaryameva ca

kulaṃ prabhāvaṃ saubhāgyaṃ dīrghamāyurarogitām //
niḥsapatnaṃ tato rājyaṃ kṛtvā svargamavāpsyati

ityukto devadeven gato'sau viṣayaṃ svakam //
niṣkaṃṭakaṃ tato rājyaṃ kṛtvā svargaṃ gataḥ priye

anekajanmacaritaṃ khaṃḍavratakadambakam //
saṃpūrṇamabhavaddevi liṃgasyāsya prabhāvataḥ

ataḥ khaṇḍeśvaro devo vikhyāto bhuvanatraye //
ye paśyaṃti narā devi devaṃ khaṇḍeśvaraṃ śivam

khaṇḍavratāni pūrṇāni teṣāmāśu bhavaṃti hi //
tapaḥkhaṇḍaṃ vrate khaṇḍaṃ dānakhaṃḍaṃ ca yatkṛ tam//
tatsarvaṃ pūrṇatāṃ yāti śrīkhaṃḍeśvaradarśanāt

dṛṣṭvā khaṃḍeśvaraṃ devaṃ pāpavighnaiḥ pramucyate //
saptajanmakṛtairdevi manovākkāyakarmabhiḥ

dṛṣṭvā khaṇḍeśvaraṃ devaṃ kṛtakṛtyatvamāpyate //
tasya naśyati daurbhāgyaṃ saptajanmodbhavaṃ priye

khaṃḍeśvare'rcite deve sarve devāḥ savāsavāḥ//
saṃtuṣṭā varadāścaiva bhavaṃti varavarṇini

devaṃ khaṃḍeśvaraṃ ye vai yajaṃti śraddhayā priye //
puṇyairnānāvidhaiḥ snānaiḥ sugandhaiśca viśeṣataḥ

dhūpa dīpairnamaskārairjapaiḥ stotraiḥ pṛthagvidhaiḥ //
te sarve kāmasaṃpannāḥ śrīmanto rājyasaṃyutāḥ

dīrghāyuṣaḥ śubhācārā jāyaṃte dehino'malāḥ //
ati śreṣṭhā gatisteṣāṃ viśokā nityamakṣayāḥ //
khaṃḍeśvaraprasādena jāyaṃte nātra saṃśayaḥ

ete ca viṣṇubrahmeṃdrakuveradahanādayaḥ //
parāṃ siddhiṃ susaṃprāptāḥ khaṃḍeśvarasamarcanāt

eṣa te kathito devi prabhāvaḥ pāpanāśanaḥ //
khaṃḍeśvarasya devasya śṛṇu vai pattaneśvaram

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṃḍe caturaśītiliṅgamāhātmye khaṇḍe śvaramāhātmyavarṇanaṃnāmaikatriṃśo'dhyāyaḥ //