Skanda Purana · Verses 5.3-2

// śrīrudra uvāca // //
ḍhuṃḍheśvaraṃ tṛtīyaṃ tu sukhasvargaphalapradam //
sarvapāpaharaṃ ligaṃ nṛṇāṃ duṣkṛtanāśanam

ḍhuṃḍhaścāsītpurā devi kailāse gaṇanāyakaḥ //
sa ca kāmī durācāro vyasanopahatendriyaḥ

gato'sau śakralokaṃ tu kautukārthaṃ yadṛcchayā //
yatra nṛtyati sā raṃbhā śakrasyāgre vivṛṇvatī //

bhāvānbahuvidhānramyāndṛṣṭihastādikāñchubhān/
sūcīviddhādikaraṇānpatākādikahastakān//
nṛtyaṃ hastādisaṃyuktaṃ layatālānugaṃ tathā

śakro'pi tridaśaiḥ sārddhaṃ tanmukhāsaktalocanaḥ //
babhūva hṛṣṭacetā vai hṛṣitāṃgaruhānanaḥ

etasminnaṃtare devi ḍhuṃḍhastallalitena tu //
kāmarāgavaśenaiva bhāvyarthena ca mohitaḥ

tena raṃgaratā raṃbhā puṣpagucchena tāḍitā //
sa śapto vāsavenaiva dṛṣṭvā'nyāyaṃ gaṇasya tu

pata tvaṃ mānuṣaṃ lokaṃ raṃgabhaṃgastvayā kṛtaḥ //
iti śapto gaṇo devi śakreṇāmitatejasā

patito mānuṣe loke visaṃjño vihvalendriyaḥ //
kādigbhūto hato tsāho vilalāpa punaḥpunaḥ

aho'nyāyaphalaṃ prāptaṃ mayā mohādanuṣṭhitam //
tasmānnītirvidhātavyā puruṣeṇa vijānatā

nyāyamārgaṃ samāśritya yena siddhirbhavenmama

ityuktvā sa tapastepe maheṃdre parvatottame //
śrīśaile malaye viṃdhye pāriyātre yamālaye

no siddho'sau yadā devi tadā gaṃgāmahattaṭam //
yamunāṃ caṃdrabhāgāṃ ca vitastāṃ narmadāṃ nadīm

godāvarīṃ bhīmarathīṃ kauśikīṃ śāradāṃ śivām //
carmaṇvatīṃ samāsādya snātvā tyaktakriyo'bhavat

tīrthaṃ vyarthaṃ tapo vyarthaṃ tīrthayātrāphalaṃ yataḥ //
na prāptaṃ ca mayābhīṣṭamaṭatā karmabhūmiṣu

etasminnaṃtare devi vāguvācāśarīriṇī //
āśvāsayaṃtī gaṇapaṃ mahākālāyane vraja

prayāgādyāni tīrthāni pṛthivyāṃ yāni saṃti vai //
sadā siddhikaraṃ teṣāṃ mahākālaṃ viśiṣyate

tatrāste sumahāpuṇyaṃ liṃgaṃ sarvārthasādhakam //
piśāceśvarasāṃnidhye tamārādhaya satvaram

prasādāttasya liṃgasya punaryāsyasi śāṃkaram //
lokaṃ tejasvināṃ gamyaṃ durlabhaṃ pāpināṃ sadā

iti śrutvā tato vāṇīmākāśasthāṃ gaṇastadā //
ājagāma mudā yukto mahākālavanottame

dadarśa tatra talliṃgaṃ sarvasaṃpatkaraṃ śubham//
pūjayāmāsa deveśaṃ bhaktyā paramayā yutaḥ

liṃgamadhyāttato vāṇī niḥsṛtā parva tātmaje //
aho tuṣṭosmi te vatsa kiṃ kāmaṃ pradadāmyaham

// ḍhuṃḍha uvāca // //
yadi tuṣṭo'si deveśa śaraṇāgatavatsala //
tvatpādapaṃkaje bhūyādbhaktirme'vicalā sadā

varamenaṃ prayacchāśu yadi tuṣṭo maheśvaraḥ

ye ca tvāṃ mānavā deva paśyaṃti parameśvara //
pāpātsadyo vinirmuktāste bhavaṃtu mahītale

ḍhuṃḍhasya bhāṣitaṃ śrutvā liṃgenoktaṃ yaśasvini //
ye ca māṃ pūjayiṣyaṃti śraddhayā parayā punaḥ//
te bhaviṣyaṃti satataṃ sadā pātakavarjitāḥ

lapsyaṃti te parānkāmānbhaviṣyaṃti gaṇottamāḥ//
pūjyāḥ sarveṣu lokeṣu sarvālaṃkārabhūṣitāḥ

evaṃ labdhavaro ḍhuṃḍhaḥ prāṃjaliḥ punarabravīt //
mannāmnā prathitaṃ liṃgaṃ saṃbhūyādbhuvane sadā

evamastviti liṃgena proktaṃ tuṣṭena pārvati //
tadāprabhṛti vikhyāto devo ḍhuṃḍhe śvaraḥ paraḥ

yasya darśanamātreṇa sadā siddhirbhavennṛṇām

bhaktyā ye pūjayiṣyaṃti devaṃ ḍhuṃḍheśvaraṃ param //
ājanmaprabhavaṃ pāpaṃ teṣāṃ yāsya ti tatkṣaṇāt

sa eva sukṛtī loke sa eva mama vallabhaḥ//
yaḥ paśyati naro bhaktyā liṃgaṃ ḍhuṃḍheśvaraṃ param

rājasūyaśatenaiva yatpuṇyaṃ ca bhaviṣyati //
tato bhaviṣyatyadhikaṃ ḍhuṃḍheśvaranirīkṣaṇāt

mānasaṃ vācikaṃ vāpi kāyikaṃ guhyasaṃbhavam //
prakāśaṃ vā'prakāśaṃ ca prasaṃgādapi yatkṛ tam //
tatsarvaṃ yāsyati kṣipraṃ ḍhuṃḍheśvarasya darśanāt

ityuktastu mayā devi sa ḍhuṃḍho gaṇanāyakaḥ //
kṛto liṃgasya māhātmyādgato loke madīyake //
reje ca gaṇapaiḥ sārddhaṃ mamābhīṣṭataro'bhavat

eṣa te kathito devi prabhāvaḥ pāpanāśanaḥ //
śravaṇātkīrttanādvāpi mama loke mahīyate

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe caturaśītiliṃgamāhātmye ḍhuṃḍheśvaramāhātmyavarṇanaṃnāma tṛtīyo'dhyāyaḥ