Skanda Purana · Chapter 5.25

// sanatkumāra uvāca // //
śukreśvaraṃ samabhyarcya sitapuṣpairvilepanaiḥ //
praṇipatya tato bhaktyā rudraloke mahīyate

bhīmeśvaraṃ naro dṛṣṭvā bhaktyā saṃpūjya yatnataḥ //
na bhayaṃ labhate vyāsa raṇe rātrau jale'nale

gargeśvaraṃ snāpayitvā tilatailena mānavaḥ //
bilvapatraistu saṃpūjya dharmavṛddhimavāpnuyāt

upoṣitaścaturdaśyāṃ tilaprasthatilāṃbhasā //
snāpayitvā tilairiṣṭvā sadā saukhyamavāpnuyāt

gosahasraṃ naro dattvā bhāvaṃ kṛtvā viśeṣataḥ //
bhavabaṃdhavinirmukto rudralokaṃ sa gacchati

kāmeśvaraṃ samabhyarcya kuṃkumādivilepanaiḥ //
kāmikena vimānena yāti svargaṃ na saṃśayaḥ

cūḍāmaṇiṃ namaskṛtya navamyāṃ kārtike site //
na viyoniṃ naro yāti dharmabuddhiḥ sa jāyate

caṃḍīśvaraṃ samabhyarcya kṛṣṇāṣṭamyāmupoṣitaḥ //
nirmālyollaṃghanotthena na śokenāpi lipyate

ityāditīrthāni maheśvarasya puṇyāni sarvāṇi naro'bhigamya //
viśuddhacitto bhuvi bhāvitātmā prayāti śaṃbhorbhuvanaṃ suramyam

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe'vantīkṣetramāhātmye śukreśvarabhīmeśvara gargeśvarakāmeśvara cūḍāmaṇīśvara caṇḍīśvarāditīrthamāhātmyavarṇanaṃ nāma pañcaviṃśo'dhyāyaḥ