Skanda Purana · Verses 5.24-2

// īśvara uvāca // //
mahālayaṃ mahābhāge caturviṃśatikaṃ śubham //
brahmādistaṃbaparyaṃtaṃ trailokyaṃ sacarā caram

utpāditaṃ dhṛtaṃ vyāptaṃ tvayā deva mayā śrutam //
tvayaikena viśuddhena sarvagena mahātmanā

atyarthaṃ munayaḥ sarve muditā maunino 'vyayāḥ //
vadaṃti kāraṇaṃ cāsya trailokyasya maheśvara

tvayā sarvamidaṃ sṛṣṭaṃ trailokyaṃ bhūrbhuvādikam //
utpādyamānamutpannaṃ pralīyacca sahasraśaḥ

devadānavagaṃdharvamunicāraṇabhoginām //
utpattisthitisaṃhārāstvayā dṛṣṭā muhurmuhuḥ

jagaccarācaraṃ deva kutra sthitvāsṛjasya lam //
līlayā saṃharasyetatprasādādvaktumarhasi

ko'sau mahālayo raudragraharūpī vyavasthitaḥ //
yasmindhṛtaṃ tvayā sarvaṃ trailokyaṃ bhūrbhuvādikam //

iti pṛṣṭastvayā devi mayā te kathitaṃ purā //
idānīṃ kathayiṣyāmi śṛṇuṣvaikāgramānasā

pṛthivyādīni bhūtāni mahākālavane priye //
dhṛtāni pralayasyāṃte ekoddeśe mahālaye

brahmalokādibhirlokairanaupamyaguṇaṃ śubham //
sthānaṃ mahālayaṃ tatra mamānaṃdakaraṃ param

paraṃ brahmamayaṃ liṃgaṃ tatra tiṣṭhati sarvadā //
tasya liṃgasya madhye tu dhṛtaṃ kṛtsnaṃ carācaram

tatra brahmādayo devā viṣṇustatraiva saṃsthitaḥ //
liṃgasyābhyaṃtare devi sarvamevādhitiṣṭhati //
tasmālliṃgātsamutpanno mahānātmā mahāmatiḥ

bhūtādiścāpyahaṃkāro viṣṇuḥ śaṃbhuśca pārvati //
buddhiḥ prajñā dhṛtiḥ khyātiḥ smṛtirlajjā sarasvatī

sarvataḥ pāṇipādaṃ tatsarvato'kṣiśiromukham //
sarvataḥ śrutimalloke sarvamāvṛtya tiṣṭhati

asmādbhūtāni liṃgāni mahābhūtāni pañca vai //
pṛthivī vāyurākāśamāpo jyotiḥ pralīyate

sthalamāpastathākāśaṃ janma cāpi caturvidham//
aṇḍajodbhijjaṃ ca sasvedaṃ jarāyujamathāpi vā

caturddhā janmacihnaṃ yalliṃgesminneva lakṣyate //
tapaḥ karma ca puṇyaṃ ca vrataṃ dānaṃ tathaiva ca

rajaḥsattvaṃ tamobhāvastasmālliṃgācca jāyate //
tasmiṃstacchrūyate satyaṃ jyotirbrahma sanātanam

avyaktakāraṇaṃ sūkṣmaṃ yattatsadasadātmakam //
yasmātpitāmaho jajñe prabhurekaḥ prajāpatiḥ

viśvedevāstathādityā vasavo'thāśvināvapi //
yakṣāḥ sādhyāḥ piśācāśca guhyakāḥ pitara stathā

āpo dyauḥ pṛthivī vāyuraṃtarikṣaṃ diśastathā //
saṃvatsarartavo māsāḥ pakṣāhorātrayastathā

yaccānyadapi tatsarvaṃ saṃbhūtaṃ loka sākṣikam //
yadidaṃ dṛśyate kiṃcittasyāṃte ca pralīyate

ato mahālayonāma vikhyāto bhuvanatraye //
muktīśvarasya devasya dakṣiṇe saṃvyava sthitaḥ

yaḥ pūjayati talliṃgaṃ rudramūrtyā mahālayam //
trailokyavijayī nityaṃ kīrttimānsa naro bhavet

mahālayeśvare puṇye pūjite parameśvare //
bhaktyā paramayā caiva sarve devāḥ supūjitāḥ //
bhavaṃtīha mahābhāge yatastairapi pūjyate

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe caturaśītiliṅgamāhātmye mahālayeśvaramāhātmyavarṇanaṃnāma caturviṃśo'dhyāyaḥ