Skanda Purana · Chapter 5.232

sūta uvāca -
iti vaḥ kathitaṃ viprā revāmāhātmyamuttamam /
yathopadiṣṭaṃ pārthāya mārkaṇḍeyena vai purā

tathā tīrthakadambāśca teṣu tīrthaviśeṣataḥ /
prādhānyena mayā khyātā yathāsaṅkhyaṃ yathākramam

etatpavitramatulaṃ hyetatpāpaharaṃ param /
narmadācaritaṃ puṇyaṃ māhātmyaṃ munibhāṣitam

saptakalpānugo vipro narmadāyāṃ munīśvarāḥ /
mṛkaṇḍatanayo dhīmānparamārthaviduttamaḥ

saṃsevya sarvatīrthāni nadīḥ sarvāśca vai purā /
bahukalpasmarāṃ revāmālakṣya śivadehajām

me kaleti ca śarvoktāṃ śaraṇaṃ śarvajāṃ yayau /
ajarāmamarāṃ devīṃ daityadhvaṃsakarīṃ parām

mahāvibhavasaṃyuktāṃ bhavaghnīṃ bhavajāhnavīm /
tasyāmābadhya satprema jātaḥ so'pyajarāmaraḥ

ṣaṣṭitīrthasahasrāṇi ṣaṣṭikoṭyaśca sattamāḥ /
vyavasthitāni revāyāstīrayugme pade pade

sāritaḥ paritaḥ santi satīrthāstu sahasraśaḥ /
na tulāṃ yānti revāyāstāśca manye munīśvarāḥ

etadvaḥ kathitaṃ sarvaṃ yatpṛṣṭamakhilaṃ dvijāḥ /
yanmaheśamukhācchrutvā vāyurāha ṛṣīnprati

tadvanmṛkaṇḍatanayo'pyanubhūyākhilāṃ nadīm /
satīrthāṃ padaśaḥ prāha pāṇḍuputrāya pāvanīm

etacca kathitaṃ sarvaṃ saṃkṣepeṇa dvijottamāḥ /
narmadācaritaṃ puṇyaṃ triṣu lokeṣu durlabham

kimanyaiḥ saritāṃ toyaiḥ sevitaistu sahasraśaḥ /
yadi saṃsevyate toyaṃ revāyāḥ pāpanāśanam

mekalājalasaṃsevī muktimāpnoti śāśvatīm

yathā yathā bhajenmartyo yadyadicchati tīrthagaḥ /
tattadāpnoti niyataṃ śraddhayāśraddhayāpi ca

idaṃ brahmā hariridamidaṃ sākṣātparo haraḥ /
idaṃ brahma nirākāraṃ kaivalyaṃ narmadājalam

tāvadgarjanti tīrthāni nadyo hṛdayaphalapradāḥ /
yāvanna smaryate revā sevāhevā kalau naraiḥ

dhruvaṃ loke hitārthāya śivena svaśarīrataḥ /
śaktiḥ kāpi saridrūpā reveyamavatāritā

tāvadgarjanti yajñāśca vanakṣetrādayo bhṛśam /
yāvanna narmadānāmakīrtanaṃ kriyate kalau

garimā gāṇyate tāvattapodānavratādiṣu /
narairvā prāpyate yāvadbhuvi bhargabhavā dhunī

ye vasantyuttare kūle rudrasyānucarā hi te /
vasanti yāmyatīre ye lokaṃ te yānti vaiṣṇavam

dhanyāste deśavaryāste yeṣu deśeṣu narmadā /
narakāntakarī śaśvatsaṃśritā śarvanirmitā

kṛtapuṇyāśca te lokāḥ śokāya na bhavanti te /
ye pibanti jalaṃ puṇyaṃ pārvatīpatisindhujam

idaṃ pavitramatulaṃ revāyāścaritaṃ dvijāḥ /
śṛṇoti yaḥ kīrtayate mucyate sarvapātakaḥ

yatphalaṃ sarvavedaiśca saṣaḍaṅgapadakramaiḥ /
śrutaiśca paṭhitaistasmātphalamaṣṭaguṇaṃ bhavet

satrayājī phalaṃ yacca labhate dvādaśābdikam /
śrutvā sakṛcca revāyāścaritaṃ tatphalaṃ labhet

sarvatīrthāvagāhācca yatphalaṃ sāgarādiṣu /
sakṛcchrutvā ca māhātmyaṃ revāyāstatphalaṃ labhet

etaddharmyamupākhyānaṃ sarvaśāstreṣvanuttamam /
deśe vā maṇḍale vāpi nagare grāmamadhyataḥ

gṛhe vā tiṣṭhate yasya likhitaṃ sārvavārṇikam /
sa brahmā sa śivaḥ sākṣātsa ca devo janārdanaḥ

dharmārthakāmamokṣāṇāṃ mārge'yaṃ devasevitaḥ /
gurūṇāṃ ca guruḥ śāstraṃ paramaṃ siddhikāraṇam

yaścedaṃ śṛṇuyānnityaṃ purāṇaṃ devabhāṣitam /
brāhmaṇo vedavānbhūyātkṣatriyo vijayī bhavet

dhanāḍhyo jāyate vaiśyaḥ śūdro vai dharmabhāgbhavet

saubhāgyasantatiṃ nārī śrutvaitatsamavāpnuyāt /
śriyaṃ saukhyaṃ svargavāsaṃ janma caivottame kule

rasabhedī kṛtaghnaśca svāmidhruṅmitravañcakaḥ /
goghnaśca garadaścaiva kanyāvikrayakārakaḥ

brahmaghnaśca surāpī ca steyī ca gurutalpagaḥ /
narmadācaritaṃ śṛṇvaṃstāmabdaṃ yo'bhiṣevate

sarvapāpavinirmukto jāyate nātra saṃśayaḥ /
pākabhedī vṛthāpākī devabrāhmaṇanindakaḥ

parīvādī guroḥ pitroḥ sādhūnāṃ nṛpatestathā /
te'pi śrutvā ca pāpebhyo mucyante nātra saṃśayaḥ

ye punarbhāvitātmānaḥ śastraṃ śṛṇvanti nityaśaḥ /
pūjayanti ca tacchāstraṃ nārmadaṃ vastrabhūṣaṇaiḥ

puṣpaiḥ phalaiścandanādyairbhojanairvividhairapi /
śāstre'sminpūjite devāḥ pūjitā guravastathā

iha loke pare caiva nātra kāryā vicāraṇā /
tasmātsarvaprayatnena gandhavastrādibhūṣaṇaiḥ

pūjayetparayā bhaktyā vācakaṃ śāstrameva ca /
vedapāṭhaiśca yatpuṇyamagnihotraiśca pālitaiḥ

tatphalaṃ samavāpnoti narmadācarite śubhe /
kurukṣetre ca yatpuṇyaṃ prabhāse puṣkare tathā

rudrāvarte gayāyāṃ ca vārāṇasyāṃ viśeṣataḥ /
gaṅgādvāre prayāge ca gaṅgāsāgarasaṅgame

evamādiṣu tīrtheṣu yatpuṇyaṃ jāyate nṛṇām /
narmadācaritaṃ śrutvā tatpuṇyaṃ sakalaṃ labhet

ādimadhyāvasāneṣu narmadācaritaṃ śubham /
yaḥ śṛṇoti naro bhaktyā śṛṇudhvaṃ tatphalaṃ mahat

samāpya śivasaṃsthānaṃ devakanyāsamāvṛtaḥ /
rudrasyānucaro bhūtvā śivena saha modate

dharmākhyānamidaṃ puṇyaṃ sarvākhyāneṣvanuttamam /
gṛhe'pi paṭhyate yasya caturvarṇasya sattamāḥ

dhanyaṃ tasya gṛhaṃ manye gṛhasthaṃ cāpi tatkulam /
pustakaṃ pūjayedyastu narmadācaritasya tu

narmadā pūjitā tena bhagavāṃśca maheśvaraḥ /
vācake pūjite tadvaddevāśca ṛṣayo'rcitāḥ

lekhayitvā ca sakalaṃ revācaritamuttamam /
bhūṣaṇaṃ sarvaśāstrāṇāṃ yo dadāti dvijanmane

narmadāsarvatīrtheṣu snānadānena yatphalam /
tatphalaṃ samavāpnoti sa naro nātra saṃśayaḥ

etatpurāṇaṃ rudroktaṃ mahāpuṇyaphalapradam /
svargadaṃ putradaṃ dhanyaṃ yaśasyaṃ kīrttivardhanam

dharmyamāyuṣyamatulaṃ duḥkhaduḥsvapnanāśanam /
paṭhatāṃ śṛṇvatāṃ cāpi sarvakāmārthasiddhidam

yatpradattamidaṃ puṇyaṃ purāṇaṃ vācyate dvijaiḥ /
śivaloke sthitistasya purāṇākṣaravatsarī

iti nigaditametannarmadāyāścaritraṃ pavanagaditamagryaṃ śarvavaktrādavāpya /
tribhuvanajanavandyaṃ tvetadādau munīnāṃ kulapatipuratastatsūtamukhyena sādhu

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe revākhaṇḍasamāptirevākhaṇḍapustakadānādimāhātmyavarṇanaṃ nāma dvātriṃśadadhikadviśatatamo'dhyāyaḥ //