Skanda Purana · Verses 5.23-2

// śrīhara uvāca // //
meghanādeśvaraṃ devi trayoviṃśatimaṃ śṛṇu //
yasya darśanamātreṇa prāpyate sarvasiddhayaḥ

rājamūlā mahādevi yogakṣemāḥ suvṛṣṭayaḥ//
prajāśca vyādhayaścaiva maraṇaṃ ca bhayāni ca

rājā kṛtaṃ tathā tretā dvāparaśca tathā kaliḥ //
rājamūlāni sarvāṇi rājādharmasya kāraṇam

rājā babhūva loke'sminmadāṃdhonāma pārvati //
ahaṃkārāvṛto duṣṭo devabrāhmaṇakaṃṭakaḥ

kali dvāparayoḥ saṃdhau tasya doṣācca bhāmini //
anāvṛṣṭirabhūddhorā loke dvādaśavārṣikī

na vavarṣa sahasrākṣaḥ pratilomo'bhavatprabhuḥ //
nādṛśyantāpi rātryaṃte kuta evābhrajātayaḥ

nadyaḥ saṃkṣiptatoyaughāḥ kvacidaṃtarhitāstadā //
nivṛttayajñasvādhyāyā nirvaṣaṭkāramaṃgalāḥ

ucchinnakṛṣi gorakṣā nivṛttavipaṇāstathā //
asthikaṃkālasaṃkīrṇā hāhābhūtanarākulāḥ

śūnyabhūyiṣṭhanagarā dagdhagrāmaniveśinaḥ //
gojāśvamahiṣairhīnā bhakṣyamāṇāḥ parasparam

āśramānsaṃparityajya paryadhāvannitastataḥ //
brāhmaṇā duḥkhabahulā mṛtā naṣṭāśca pārvati

sūṣṭirunmūlitā sarvā jaṃgamā sthāvarākhilā //
etasminnaṃtare devāḥ śakrādyā bhayavihvalāḥ

śaraṇyaṃ śaraṇaṃ jagmurdevadevaṃ janārdanam //
kṣīrodasyottare kūle śvetadvīpaṃ manoramam

brahmalokādibhirlokairanaupamyaguṇaṃ śubham //
sadānaṃdakaraṃ śāṃtaṃ sūryakoṭisamaprabham

svecchākalpitavi nyāsaprāsādaśayanāsanam //
vajreṃdranīlavaiḍūryacaṃdrakāṃtādidīpitam

jarāmṛtyubhayopetasarvavyādhivivarjitam //
tasmindvīpe tato devi sūrya koṭisamaprabham //
sāṣṭāṃgāṃ praṇatiṃ kṛtvā te devāḥ stutimabruvan

bhavānbrahmā ca rudraśca maheṃdro devasattamaḥ //
bhavānkarttā vikarttā ca lokānāṃ prabhavo'vyayaḥ

evaṃ ca satyaṃ paramaṃ tapaśca paramaṃ tathā //
pavitraṃ paramamārgaṃ yajñastvaṃ paramaḥ prabho // १७ [//
paraṃ hautraṃ paraṃ dhāma tvāmāhuḥ puruṣaṃ param //
evaṃ stutastadā taistu devadevo varānane

prāha devāṃstataḥ kṛṣṇaḥ kiṃ karomyadya vaḥ surāḥ //
vijñaptastairharirdevo hyanāvṛṣṭyā prapīḍitaiḥ

upāyaḥ kathyatāṃ deva tuṣṭiḥ dhuṣṭiryathā bhavet //
dhyānena ciṃtayitvā ca kathayāmāsa keśavaḥ

gacchadhvaṃ tridaśāḥ sarve mahākālavane śubhe //
liṃgaṃ vṛṣṭikaraṃ tatra purā meghaiḥ pratiṣṭhitam

meghā vṛṣṭikarāḥ sarve tasmim̐lliṃge ca saṃti vai //
tasya liṃgasya māhātmyādvṛṣṭireva bhaviṣyati

pratīhāreśvarāddevādīśāne vidyate surāḥ //
tasya tadvacanaṃ śrutvā vāsudevasya pārvati

mahākālavane prāptā yatrāste liṃgamuttamam //
tuṣṭuvuḥ parayā bhaktyā dṛṣṭvā devaṃ manoramam

namaste'stu maheśāya namo'naṃtāya māline //
namastaijasamūrttāya namaḥ sauṃdaryaśāline

namo yogāya vedāya namaḥ piṃgajaṭāya te //
anaṃtajñānadehāya nama īśvaramūrttaye

namaḥ śubhrāṭṭahāsāya namaste'stu śikhaṃḍine //
śaṃkarāya namaste'stu namastestu pinākine

namoṃ'takāya bhavyāya tryaṃbakāyāstu te namaḥ //
namaste bahurūpāya namaste'ciṃtyamūrttaye

namo yogaśarīrāya namaste sarva sarvadā //
naṣṭaṃ deva jagatsarvamanāvṛṣṭyā prapīḍitam

suvṛṣṭyā devadeveśa pāhi naḥ śaraṇāgatān //
etasminnaṃtare meghā pārvaṇāṃgāravarcasaḥ

liṃgamadhyātsamuttasthurvādayaṃto nabhastalam //
anyonyavegābhihatā vavṛṣurbhūtale tadā

jātaṃ viniṣprabhaṃ sarvaṃ na prājñāyata kiṃcana //
timiraughaparikṣiptā rejuścātha diśo daśa

te tasya devadevasya māhātmyena pratoṣitāḥ //
devāḥ prītiṃ parāṃ jagmuḥ sarve'mṛtamivottamāḥ

tatastamaḥ saṃharato vineśuśca balāhakā //
pravavuḥ śītalā vātāḥ praśāṃtāśca diśo daśa

śuddhaprabhāṇi jyotīṃṣi somaṃ cakruḥ pradakṣiṇām //
avigrahaṃ grahāścakruḥ praśāṃtāścāpi sindhavaḥ

maharṣayo viśokāśca gaṃdharvāśca kalaṃ jaguḥ //
abhūtsṛṣṭiḥ punaḥ sarvā liṃgasyāsya prabhāvataḥ

suraiḥ saṃpūjya bhaktyā te cakrurnāma yathārthataḥ //
asya liṃgasya māhātmyaṃ dṛṣṭvā prītāḥ surā bahu

meghanādeśvaraṃ nāma bhaviṣyatyasya sarvataḥ //
meghanādeśvarākhyānaṃ mayā te kathitaṃ priye

bhaviṣyaṃti narā bhūmau kṛtārthāstatprabhāvataḥ //
darśanādasya liṃgasya kāmavṛṣṭirbhaviṣyati

kalpakoṭisahasrāṇi kalpakoṭiśatāni ca //
kurvaṃlliṃgasya snapanaṃ rudraloke mahīyate

prabhāvaḥ paṭhyate yatra meghanādasya pārvati //
ativṛṣṭiścaiva tato bhaviṣyati ca bhūtale

iti śrīskāṃde mahāpurāṇa ekāśītisāhasryāṃ saṃhitāyāṃ pañcamaāvaṃtyakhaṇḍe caturaśītiliṅgamāhātmye meghanādeśvaramāhātmyavarṇanaṃnāma trayoviṃśo 'dhyāyaḥ