સ્કંદ પુરાણ · શ્લોક 5.23-2

॥ શ્રીહર ઉવાચ ॥ ॥
મેઘનાદેશ્વરં દેવિ ત્રયોવિંશતિમં શૃણુ ॥
યસ્ય દર્શનમાત્રેણ પ્રાપ્યતે સર્વસિદ્ધયઃ

રાજમૂલા મહાદેવિ યોગક્ષેમાઃ સુવૃષ્ટયઃ॥
પ્રજાશ્ચ વ્યાધયશ્ચૈવ મરણં ચ ભયાનિ ચ

રાજા કૃતં તથા ત્રેતા દ્વાપરશ્ચ તથા કલિઃ ॥
રાજમૂલાનિ સર્વાણિ રાજાધર્મસ્ય કારણમ્

રાજા બભૂવ લોકેઽસ્મિન્મદાંધોનામ પાર્વતિ ॥
અહંકારાવૃતો દુષ્ટો દેવબ્રાહ્મણકંટકઃ

કલિ દ્વાપરયોઃ સંધૌ તસ્ય દોષાચ્ચ ભામિનિ ॥
અનાવૃષ્ટિરભૂદ્ધોરા લોકે દ્વાદશવાર્ષિકી

ન વવર્ષ સહસ્રાક્ષઃ પ્રતિલોમોઽભવત્પ્રભુઃ ॥
નાદૃશ્યન્તાપિ રાત્ર્યંતે કુત એવાભ્રજાતયઃ

નદ્યઃ સંક્ષિપ્તતોયૌઘાઃ ક્વચિદંતર્હિતાસ્તદા ॥
નિવૃત્તયજ્ઞસ્વાધ્યાયા નિર્વષટ્કારમંગલાઃ

ઉચ્છિન્નકૃષિ ગોરક્ષા નિવૃત્તવિપણાસ્તથા ॥
અસ્થિકંકાલસંકીર્ણા હાહાભૂતનરાકુલાઃ

શૂન્યભૂયિષ્ઠનગરા દગ્ધગ્રામનિવેશિનઃ ॥
ગોજાશ્વમહિષૈર્હીના ભક્ષ્યમાણાઃ પરસ્પરમ્

આશ્રમાન્સંપરિત્યજ્ય પર્યધાવન્નિતસ્તતઃ ॥
બ્રાહ્મણા દુઃખબહુલા મૃતા નષ્ટાશ્ચ પાર્વતિ

સૂષ્ટિરુન્મૂલિતા સર્વા જંગમા સ્થાવરાખિલા ॥
એતસ્મિન્નંતરે દેવાઃ શક્રાદ્યા ભયવિહ્વલાઃ

શરણ્યં શરણં જગ્મુર્દેવદેવં જનાર્દનમ્ ॥
ક્ષીરોદસ્યોત્તરે કૂલે શ્વેતદ્વીપં મનોરમમ્

બ્રહ્મલોકાદિભિર્લોકૈરનૌપમ્યગુણં શુભમ્ ॥
સદાનંદકરં શાંતં સૂર્યકોટિસમપ્રભમ્

સ્વેચ્છાકલ્પિતવિ ન્યાસપ્રાસાદશયનાસનમ્ ॥
વજ્રેંદ્રનીલવૈડૂર્યચંદ્રકાંતાદિદીપિતમ્

જરામૃત્યુભયોપેતસર્વવ્યાધિવિવર્જિતમ્ ॥
તસ્મિન્દ્વીપે તતો દેવિ સૂર્ય કોટિસમપ્રભમ્ ॥
સાષ્ટાંગાં પ્રણતિં કૃત્વા તે દેવાઃ સ્તુતિમબ્રુવન્

ભવાન્બ્રહ્મા ચ રુદ્રશ્ચ મહેંદ્રો દેવસત્તમઃ ॥
ભવાન્કર્ત્તા વિકર્ત્તા ચ લોકાનાં પ્રભવોઽવ્યયઃ

એવં ચ સત્યં પરમં તપશ્ચ પરમં તથા ॥
પવિત્રં પરમમાર્ગં યજ્ઞસ્ત્વં પરમઃ પ્રભો ॥ ૧૭ [॥
પરં હૌત્રં પરં ધામ ત્વામાહુઃ પુરુષં પરમ્ ॥
એવં સ્તુતસ્તદા તૈસ્તુ દેવદેવો વરાનને

પ્રાહ દેવાંસ્તતઃ કૃષ્ણઃ કિં કરોમ્યદ્ય વઃ સુરાઃ ॥
વિજ્ઞપ્તસ્તૈર્હરિર્દેવો હ્યનાવૃષ્ટ્યા પ્રપીડિતૈઃ

ઉપાયઃ કથ્યતાં દેવ તુષ્ટિઃ ધુષ્ટિર્યથા ભવેત્ ॥
ધ્યાનેન ચિંતયિત્વા ચ કથયામાસ કેશવઃ

ગચ્છધ્વં ત્રિદશાઃ સર્વે મહાકાલવને શુભે ॥
લિંગં વૃષ્ટિકરં તત્ર પુરા મેઘૈઃ પ્રતિષ્ઠિતમ્

મેઘા વૃષ્ટિકરાઃ સર્વે તસ્મિઁલ્લિંગે ચ સંતિ વૈ ॥
તસ્ય લિંગસ્ય માહાત્મ્યાદ્વૃષ્ટિરેવ ભવિષ્યતિ

પ્રતીહારેશ્વરાદ્દેવાદીશાને વિદ્યતે સુરાઃ ॥
તસ્ય તદ્વચનં શ્રુત્વા વાસુદેવસ્ય પાર્વતિ

મહાકાલવને પ્રાપ્તા યત્રાસ્તે લિંગમુત્તમમ્ ॥
તુષ્ટુવુઃ પરયા ભક્ત્યા દૃષ્ટ્વા દેવં મનોરમમ્

નમસ્તેઽસ્તુ મહેશાય નમોઽનંતાય માલિને ॥
નમસ્તૈજસમૂર્ત્તાય નમઃ સૌંદર્યશાલિને

નમો યોગાય વેદાય નમઃ પિંગજટાય તે ॥
અનંતજ્ઞાનદેહાય નમ ઈશ્વરમૂર્ત્તયે

નમઃ શુભ્રાટ્ટહાસાય નમસ્તેઽસ્તુ શિખંડિને ॥
શંકરાય નમસ્તેઽસ્તુ નમસ્તેસ્તુ પિનાકિને

નમોંઽતકાય ભવ્યાય ત્ર્યંબકાયાસ્તુ તે નમઃ ॥
નમસ્તે બહુરૂપાય નમસ્તેઽચિંત્યમૂર્ત્તયે

નમો યોગશરીરાય નમસ્તે સર્વ સર્વદા ॥
નષ્ટં દેવ જગત્સર્વમનાવૃષ્ટ્યા પ્રપીડિતમ્

સુવૃષ્ટ્યા દેવદેવેશ પાહિ નઃ શરણાગતાન્ ॥
એતસ્મિન્નંતરે મેઘા પાર્વણાંગારવર્ચસઃ

લિંગમધ્યાત્સમુત્તસ્થુર્વાદયંતો નભસ્તલમ્ ॥
અન્યોન્યવેગાભિહતા વવૃષુર્ભૂતલે તદા

જાતં વિનિષ્પ્રભં સર્વં ન પ્રાજ્ઞાયત કિંચન ॥
તિમિરૌઘપરિક્ષિપ્તા રેજુશ્ચાથ દિશો દશ

તે તસ્ય દેવદેવસ્ય માહાત્મ્યેન પ્રતોષિતાઃ ॥
દેવાઃ પ્રીતિં પરાં જગ્મુઃ સર્વેઽમૃતમિવોત્તમાઃ

તતસ્તમઃ સંહરતો વિનેશુશ્ચ બલાહકા ॥
પ્રવવુઃ શીતલા વાતાઃ પ્રશાંતાશ્ચ દિશો દશ

શુદ્ધપ્રભાણિ જ્યોતીંષિ સોમં ચક્રુઃ પ્રદક્ષિણામ્ ॥
અવિગ્રહં ગ્રહાશ્ચક્રુઃ પ્રશાંતાશ્ચાપિ સિન્ધવઃ

મહર્ષયો વિશોકાશ્ચ ગંધર્વાશ્ચ કલં જગુઃ ॥
અભૂત્સૃષ્ટિઃ પુનઃ સર્વા લિંગસ્યાસ્ય પ્રભાવતઃ

સુરૈઃ સંપૂજ્ય ભક્ત્યા તે ચક્રુર્નામ યથાર્થતઃ ॥
અસ્ય લિંગસ્ય માહાત્મ્યં દૃષ્ટ્વા પ્રીતાઃ સુરા બહુ

મેઘનાદેશ્વરં નામ ભવિષ્યત્યસ્ય સર્વતઃ ॥
મેઘનાદેશ્વરાખ્યાનં મયા તે કથિતં પ્રિયે

ભવિષ્યંતિ નરા ભૂમૌ કૃતાર્થાસ્તત્પ્રભાવતઃ ॥
દર્શનાદસ્ય લિંગસ્ય કામવૃષ્ટિર્ભવિષ્યતિ

કલ્પકોટિસહસ્રાણિ કલ્પકોટિશતાનિ ચ ॥
કુર્વંલ્લિંગસ્ય સ્નપનં રુદ્રલોકે મહીયતે

પ્રભાવઃ પઠ્યતે યત્ર મેઘનાદસ્ય પાર્વતિ ॥
અતિવૃષ્ટિશ્ચૈવ તતો ભવિષ્યતિ ચ ભૂતલે

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં પઞ્ચમઆવંત્યખણ્ડે ચતુરશીતિલિઙ્ગમાહાત્મ્યે મેઘનાદેશ્વરમાહાત્મ્યવર્ણનંનામ ત્રયોવિંશો ઽધ્યાયઃ