Skanda Purana · Chapter 5.23

// sanatkumāra uvāca // //
atha yātrāṃ pravakṣyāmi mahākālasya yatnataḥ //
śivāṃ śreyaskarīṃ puṇyāṃ puṇyalokapradāyinīm //

snātvā sarasi rudrasya dṛṣṭvā koṭeśvaraṃ śivam//
namaskṛtya tato gacchenmahākālaṃ sanātanam

gandhaiḥ puṣpairnamaskāraiḥ saṃpūjya tridaśeśvaram//
praṇipatya tato gaccheddevaṃ kapālamocanam

tatraiva devadeveśaḥ kapālaṃ nyastavānkṣitau //
kapāle tatkṣaṇānnyaste tatrābhūlliṃgamuttamam //

kapālamocanaṃ nāma sarvapāpapraṇāśanam //
tatra vai snapanaṃ kuryādājyapalaśatena vai

tadardhārdhena pādena vittaśāṭhyavivarjitaḥ //
kāle pūrṇe sa viprendra śivaloke mahīyate

namaskṛtya tato gacchetkapileśvaramuttamam //
darśanādasya devasya mucyate brahmahatyayā

hanumatkeśvaraṃ devaṃ tato gacchetsamāhitaḥ //
aiśvaryamatulaṃ vyāsa darśanādasya jāyate

tato gacchenmahādevaṃ paippalākhyaṃ sanātanam //
yasya darśanamātreṇa muktiḥ syāddvijasattama

svapneśvaraṃ tato gacchedbhaktiśraddhāsamanvitaḥ //
darśanādasya devasya duḥsvapnaṃ ca vinaśyati

tato gacchenmahādevamīśānaṃ viśvatomukham//
yasya darśanamātreṇa viśvasyaiva patirbhavet

someśvaraṃ tato gacchejjitakrodho jiteṃdriyaḥ //
kuṣṭharogādidoṣebhyo darśanādasya mucyate

vaiśvānareśvaraṃ vyāsa tato gacchetsamāhitaḥ //
tasya vṛddhiḥ sadā loke jāyate tasya darśanāt

bījapūrakahastaṃ tu laku līśaṃ tato vrajet //
rudratvaṃ darśanāttasya jāyate nātra saṃśayaḥ

tato gacchenmahādevaṃ gadyāṇeśvaramuttamam //
yasya darśanamātreṇa jāyaṃte sarva siddhayaḥ

abhyarthitaḥ sadā devaiḥ pūjitaḥ siddhikāraṇāt //
tenābhyarthiteśvaro'yaṃ vikhyāto vighnanāyakaḥ

vayovṛddhaṃ tato gacchenmahākālaṃ sanātanam //
na rogo na jarāvyādhirdarśanānnātra saṃśayaḥ

vighnanāśaṃ tato gacchetprāṇīśaṃ balamuttamam //
snānaṃ ghaṭaśataistasya kuryādbhaktyā samāhitaḥ

tasya caiva kṛte snāne labhyaṃte sarvasiddhayaḥ //
svargaścāpi sadā vyāsa darśanādasya jāyate

tanayaṃ tamanūllaṃghya daṃḍa pāṇiṃ tato vrajet //
yasya darśanamātreṇa yamaloko na dṛśyate

puṣpadantaṃ tato gacchedbhaktiśraddhāsamanvitaḥ //
yasya darśanamātreṇa mucyate sarvapātakaiḥ

guhyaṃ caiva mahākālaṃ tato gacchetsamāhitaḥ //
yasya darśanamātreṇa guhyapāpaiḥ pramucyate

tato gacchetsamādhistho durvāseśvaramuttamam //
yasya darśanamātreṇa kṛtakṛtyo naro bhavet

śvāsāvarodhanaṃ kṛtvā durvāsasaḥ samīpataḥ //
gaurīṃ gatvā mahādurgāṃ tyajecchvāsamanaṃtaram

tatrocchvāso vimoktyastāmabhyarcya tu sarvathā //
kāleśvaraṃ tato gaccheddevadevaṃ maheśvaram

yasya darśanamātreṇa yamalokaṃ na paśyati //
vidhīśaṃ ca tato gaccheddevadevaṃ maheśvaram

yasya darśanamātreṇa badhiratvaṃ na jāyate //
kīrtayedātmano nāma sthānaṃ gotraṃ ca tasya vai

na kīrtayedyadā nāma sā yātrā viphalī bhavet //
devasyāgre tato vyāsa upaviśya samāhitaḥ //

bhaktiyuktastato brūyānnamaskṛtvā punaḥpunaḥ //
mayā samarpitā yātrā tvatprasādānmaheśvara

saṃsārasāgarāddhorānmāmuddhara jagatpate //
anena vidhinā yastu mahākālaṃ pradakṣayet

pradakṣiṇīkṛtā tena saptadvīpā vasuṃdharā //
golakṣaṃ dvijalakṣāya dattvā yallabhate phalam

tatphalaṃ devadevasya sakṛddattvā pradakṣiṇam//
bhaktyā paramayā yukto mahākālaṃ pradakṣayet

padepade yajñaphalamiti me śaṃkaro'bravīt //
ṣaṣṭikoṭi sahasrāṇi ṣaṣṭikoṭiśatāni ca

pūjitāni bhavaṃtyatra yātreśvarasamarcanāt //
ya evaṃ kurute yātrāṃ śivadhyānaparāyaṇaḥ

sahasradakṣiṇāṃ dadyāttasya puṇyaphalaṃ śṛṇu //
saptajanmakṛtātpāpānmucyate nātra saṃśayaḥ

evaṃ yātrāṃ samāpyātha gatvā nijagṛhaṃ naraḥ //
yātrādaivata saṃkhyānvai ṣaḍviṃśatidvijottamān

bhojayecchivabhaktāṃśca śivadhyānaparāyaṇān //
savastrāṃ dakṣiṇāṃ dattvā prāpyānujñāṃ visarjayet

yātrākrameṇa caikaikaṃ dvārāṃtaramanuvrajet //
dharmopadeśake paścātsarvopaskarasaṃyutām

dhenuṃ payasvinīṃ dadyādvittaśāṭhyavivarjitaḥ //
bhuñjītātha svayaṃ vyāsa sarvabhṛtyasamanvitaḥ

dīnānāthadaridrāṃdhavikalādyāṃśca bhojayet //
yadatra phalamuddiṣṭaṃ tadvadāmi śṛṇuṣva me

kulānāṃ śatamuddhṛtya mātāpitroḥ samāhitaḥ //
kalpakoṭisahasrāṇi śivaloke sa modate

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe'vantīkṣetramāhātmye mahākāleśvarayātrāmāhātmyavarṇanaṃnāma trayoviṃśo'dhyāyaḥ