Skanda Purana · Chapter 5.228

yudhiṣṭhira uvāca -
parārthaṃ tīrthayātrāyāṃ gacchataḥ kasya kiṃ phalam /
kiyanmātraṃ muniśreṣṭha tanme brūhi kṛpānidhe

mārkaṇḍeya uvāca -
parārthaṃ gacchatastanme vadataḥ śṛṇu pārthiva /
yathā yāvatphalaṃ tasya yātrādivihitaṃ bhavet

uttameneha varṇena dravyalobhādinā nṛpa /
nādhamasya kvacitkāryaṃ tīrthayātrādisevanam

dharmakarma mahārāja svayaṃ vidvānsamācaret /
śarīrasyāthavā śaktyā anyadvā kāryayogataḥ

dharmakarma sadā prāyaḥ savarṇenaiva kārayet /
putrapautrādikairvāpi jñātibhirgotrasambhavaiḥ

śreṣṭhaṃ hi vihitaṃ prāhurdharmakarma yudhiṣṭhira /
taireva kārayettasmānnottamairnādhamairapi

adhamena kṛtaṃ samyaṅna bhavediti me matiḥ /
uttamaścādhamārthe vai kurvandurgatimāpnuyāt

na śūdrāya matiṃ dadyānnocchiṣṭaṃ na haviṣkṛtam /
na cāsyopadiśeddharmaṃ na cāsya vratamādiśet

japastapastīrthayātrā pravrajyā mantrasādhanam /
devatārādhanaṃ dīkṣā strīśūdrapatanāni ṣaṭ

pativatnī patatyeva vidhavā sarvamācaret /
sabhartṛkāśake patyau sarvaṃ kuryādanujñayā

gatvā parārthaṃ tīrthādau ṣoḍaśāṃśaphalaṃ labhet /
gacchataśca prasaṅgena tīrthamarddhaphalaṃ smṛtam

anusaṅgena tīrthasya snāne snānaphalaṃ viduḥ /
naiva yātrāphalaṃ tajjñāḥ śāstroktaṃ kalmaṣāpaham

pitrarthaṃ ca pitṛvyasya māturmātāmahasya ca /
mātulasya tathā bhrātuḥ śvaśurasya sutasya ca

poṣakārthādayoścāpi mātāmahyā gurostathā /
svasurmātṛṣvasuḥ paitryā ācāryādhyāpakasya ca

ityādyarthe naraḥ snātvā svayamaṣṭāṃśamāpnuyāt /
sākṣātpitroḥ prakurvāṇaścaturthāṃśamavāpnuyāt

patipatnyormithaścārddhaṃ phalaṃ prāhurmanīṣiṇaḥ /
bhāgineyasya śiṣyasya bhrātṛvyasya sutasya ca /
ṣaṭtripañcacaturbhāgānphalamāpnoti vai naraḥ

iti te kathitaṃ pārtha pāramparyakramāgatam /
kartavyaṃ jñātivargasya parārthe dharmasādhanam

varṣāṛtusamāyoge sarvā nadyo rajasvalāḥ /
muktvā sarasvatīṃ gaṅgāṃ narmadāṃ yamunānadīm

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe parārthatīrthayātrāphalakathanaṃ nāmāṣṭaviṃśatyadhikadviśatatamo'dhyāyaḥ //