Skanda Purana · Chapter 5.226

mārkaṇḍeya uvāca -
tataḥ krośāntare puṇyaṃ tīrthaṃ tadvimaleśvaram /
yatra snānena dānena japahomārcanādibhiḥ

vimaleśvaramārādhya yo yadicchetsa tallabhet /
svargalābhādikaṃ vāpi pārthivaṃ vā yathepsitam

purā triśirasaṃ hatvā tvaṣṭuḥ putraṃ śatakratuḥ /
yasya tīrthasya māhātmyādvaimalyaṃ paramaṃ gataḥ

yatra vedanidhirvipro mahattaptvā tapaḥ purā /
nānākarmamalaiḥ kṣīṇairvimalo'bhavadarkavat

mahādevaprasādena somavatpriyadarśanaḥ /
purā bhānumatīṃ bhānuḥ sutāṃ smaraśarārditaḥ

cakame tena doṣeṇa kuṣṭharogārdito'bhavat /
sa cāpyatra tapastaptvā vimalatvamupāgataḥ

mahādevena tuṣṭena svasthānaṃ mudito'bhajat /
tathaiva ca purā pārtha vibhāṇḍakasuto muniḥ

yogisaṅgaṃ vane prāpya pure ca nṛpatestathā /
rājasaṃsargadoṣādvai mālinyaṃ paramātmanaḥ

vicārayannabhyupetya revāsāgarasaṅgamam /
śāntayā bhāryayā sārddhaṃ taptvā dvādaśavatsarān

kṛcchracāndrāyaṇairdevaṃ toṣayaṃstryambakaṃ muniḥ /
mahādevena tuṣṭena so'pi vaimalyamāptavān

śarvāṇyā preritaḥ śarvaḥ purā dāruvane nṛpa /
mohanānmunipatnīnāṃ svaṃ dīkṣya vimalaṃ kila

vicārya paramasthānaṃ narmadodadhisaṅgamam /
tatra sthitvā mahārāja tapastaptvā sahomayā

vimalo'sau yato jātastenāsau vimaleśvaraḥ /
tena nāmnā svayaṃ tasthau lokānāṃ hitakāmyayā

tatastilottamāṃ sṛṣṭvā brahmā lokapitāmahaḥ /
prajānātho'pi tāṃ sṛṣṭvā dṛṣṭvāgre sumanoharām

bhāviyogabalākrāntaḥ sa tasyāmabhiko'bhavat /
tena vīkṣya sadoṣatvaṃ revātīradvayaṃ śritaḥ

tīrthānyanusaranmaunī trisnāyī saṃsmarañchivam /
revārṇavasamāyoge snātvā sampūjya śaṅkaram /
kālenālpena rājarṣe brahmāpyamalatāṃ gataḥ

evamanye'pi bahuśo devarṣinṛpasattamāḥ /
tyaktvā doṣamalaṃ tatra vimalā bahavo'bhavan

tathā tvamapi rājendra tatra snātvā śivārcanāt /
amalo'pi viśeṣeṇa vaimalyaṃ prāpsyase param

tatra snātvā naro nārī pūjayitvā maheśvaram /
pāpadoṣavinirmukto brahmaloke mahīyate

tatropavāsaṃ yaḥ kṛtvā paśyeta vimaleśvaram /
aṣṭamyāṃ ca caturdaśyāṃ sarvaparvasu pārthiva

saptajanmakṛtaṃ pāpaṃ hitvā yāti śivālayam /
śrāddhaṃ kṛtvā vidhānena pitḥṇāmanṛṇī bhavet /
brāhmaṇān bhojayecchaktyā tebhyo dadyācca dakṣiṇām

yadyadiṣṭatamaṃ loke yaccaivātmahitaṃ gṛhe /
tattadguṇavate deyaṃ tatraivākṣayamicchatā /
svarṇadhānyāni vāsāṃsi chatropānatkamaṇḍalum

gṛhaṃ devasya vai śaktyā kṛtvā syādbhuvi bhūpatiḥ /
gītanṛtyakathābhiśca toṣayetparameśvaram

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe vimaleśvaratīrthamāhātmyavarṇanaṃ nāma ṣaḍviṃśatyadhikadviśatatamo'dhyāyaḥ //