Skanda Purana · Chapter 5.225

śrīmārkaṇḍeya uvāca -
tataḥ krośāntare gacchedalikātīrthamuttamam /
alikā nāma gāndharvī kuśīlā kuṭilāśayā

citrasenasya dauhitrī vidyānandamṛṣiṃ gatā /
vavre te svīkṛtā tena daśavarṣāṇi taṃ śritā

patiṃ jaghāna taṃ suptaṃ kasmiṃścitkāraṇāntare /
gatvā nivedayāmāsa pitaraṃ ratnavallabham

pitrā mātrā ca saṃtyaktā bahubhirbhartsitā nṛpa /
garbhaghnī tvaṃ patighnī tvamiti darśaya mā mukham

brahmaghnī yāhi pāpiṣṭhe parityaktā gṛhādvraja

mārkaṇḍeya uvāca -
iti duḥkhānvitā mūḍhā tābhyāṃ nirbhartsitā satī /
tanuṃ tyaktuṃ manaścakre prāpya tīrthāntaraṃ kvacit

saṃpṛcchyamānā tīrthāni brāhmaṇebhyo yudhiṣṭhira /
śrutvā pāpaharaṃ tīrthaṃ revāsāgarasaṅgame

tatra pārtha tapaścakre nirāhārā jitavratā /
kṛcchrātikṛcchrapārākamahāsāṃtapanādibhiḥ

cāndrāyaṇairbrahmakūrcaiḥ karśayāmāsa vai tanum /
evaṃ varṣaśataṃ sārddhaṃ vyatītaṃ tapasā nṛpa

tasyā viśuddhimicchantyāḥ śivadhyānārcanādibhiḥ /
tataḥ katipayāhobhistasyā jñātvā haṭhaṃ param /
parituṣṭaḥ śivaḥ prāha pārvatyā paricoditaḥ

īśvara uvāca -
putri mā sāhasaṃ kārṣīḥ śuddhadehāsi sāmpratam /
tuṣṭo'haṃ tapasā te'dya varaṃ varaya vāñchitam

alikovāca -
yadi tuṣṭo'si deveśa varārhā yadyahaṃ matā /
nānāpāpāgnitaptāyā dehi śuddhiṃ parāṃ mama

tvaṃ me nātho hyanāthāyāstvameva jagatāṃ guruḥ /
dīnānāthasamuddhartā śaraṇyaḥ sarvadehinām

īśvara uvāca -
tvaṃ bhadre śuddhadehāsi mā kiṃcidanuśocithāḥ /
svanāmnā sthāpayitveha māṃ tataḥ svargameṣyasi

ityuktvā devadeveśastatraivāntaradhīyata /
alikāpi tato bhaktyā snātvā saṃsthāpya śaṅkaram

dattvā dānaṃ ca viprebhyo lokamāpa mahotkaṭam /
pitaraṃ ca samāsādya mātaraṃ ca yudhiṣṭhira

taiśca saṃmānitā prītyā bandhubhiḥ sālikā tataḥ /
vimānavaramārūḍhā divyamālānvitā nṛpa

gaurīlokamanuprāptasakhitve'dyāpi modate /
tataḥ prabhṛti tatpārtha vikhyātamalikeśvaram

tatra tīrthe tu yā nārī puruṣo vā yudhiṣṭhira /
snātvā sampūjayedbhaktyā mahādevamumāyutam

sa pāpairvividhairmukto lokamāpnoti śāṃkaram /
mānasaṃ vācikaṃ pāpaṃ kāyikaṃ yatpurā kṛtam

sarvaṃ tadvilayaṃ yāti bhojayitvā dvijānsadā /
dīpaṃ dattvā ca devāgre na rogaiḥ paribhūyate

dhūpapātraṃ vimānaṃ ca ghaṇṭāṃ kalaśameva ca /
dattvā devāya rājendra śākraṃ lokamavāpnuyāt

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe revāsāgarasaṅgame'likeśvaratīrthamāhātmyavarṇanaṃ nāma pañcaviṃśatyadhikadviśatatamo'dhyāyaḥ //