Skanda Purana · Chapter 5.213

śrīmārkaṇḍeya uvāca -
punaranyatpravakṣyāmi devasya caritaṃ mahat /
śrutamātreṇa yenaiva sarvapāpaiḥ pramucyate

abālo bālarūpeṇa grāmaṇyairbālakaiḥ saha /
āmalaiḥ krīḍate śambhustatte vakṣyāmi bhārata

sarvaistairāmalāḥ kṣiptā ye te devena pāṇḍava /
ānītāstatkṣaṇādeva tataḥ paścātkṣipeddharaḥ

yāvadgatvā diśo digbhya āgacchanti pṛthakpṛthak /
tāvattamāmalaṃ bhūtaṃ paśyanti parameśvaram

tṛtīye caiva yatkarma devadevasya dhīmataḥ /
sthānānāṃ paramaṃ sthānamāmaleśvaramuttamam

tena pūjitamātreṇa prāpyate paramaṃ padam

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe āmaleśvaratīrthamāhātmyavarṇanaṃ nāma trayodaśottaradviśatatamo'dhyāyaḥ //