Skanda Purana · Chapter 5.212

śrīmārkaṇḍeya uvāca -
athānyatsampravakṣyāmi devasya caritaṃ mahat /
śrutamātreṇa yenāśu sarvapāpaiḥ pramucyate

bhikṣurūpaṃ paraṃ kṛtvā devadevo maheśvaraḥ /
ekaśālāṃ gato grāmaṃ bhikṣārthī kṣutpipāsitaḥ

akṣasūtrodyatakaro bhasmaguṇṭhitavigrahaḥ /
sphurattriśūlo viśveśo jaṭākuṇḍalabhūṣitaḥ

kṛttivāsā mahākāyo mahāhikṛtabhūṣaṇaḥ /
vādayanvai ḍamarukaṃ ḍiṇḍimapratimaṃ śubham

kapālapāṇirbhagavānbālakairbahubhirvṛtaḥ /
kvacidgāyanhasaṃścaiva nṛtyanvadan kvacitkvacit

yatra yatra gṛhe devo līlayā ḍiṇḍamaṃ nyaset /
bhārākrāntaṃ gṛhaṃ pārtha tatratatra vinaśyati

evaṃ sampracaran devo veṣṭito bahubhirjanaiḥ /
dṛśyādṛśyena rūpeṇa nirjagāma bahiḥ prabhuḥ

itaścetaśca dhāvantaṃ na paśyanti yadā janāḥ /
vismitāste sthitāḥ śambhurbhaviṣyati tato'stuvan

teṣāṃ tu stuvatāṃ bhaktyā śaṅkaraṃ jagatāṃ patim /
ḍiṇḍirūpo hi bhagavāṃstadāsau pratyadṛśyata

tadāprabhṛti deveśo ḍiṇḍimeśvara ucyate /
darśanātsparśanādrājan sarvapāpaiḥ pramucyate

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe ekaśālaḍiṇḍimeśvaratīrthamāhātmyavarṇanaṃ nāma dvādaśottaradviśatatamo'dhyāyaḥ //