સ્કંદ પુરાણ · અધ્યાય 5.212

શ્રીમાર્કણ્ડેય ઉવાચ -
અથાન્યત્સમ્પ્રવક્ષ્યામિ દેવસ્ય ચરિતં મહત્ ।
શ્રુતમાત્રેણ યેનાશુ સર્વપાપૈઃ પ્રમુચ્યતે

ભિક્ષુરૂપં પરં કૃત્વા દેવદેવો મહેશ્વરઃ ।
એકશાલાં ગતો ગ્રામં ભિક્ષાર્થી ક્ષુત્પિપાસિતઃ

અક્ષસૂત્રોદ્યતકરો ભસ્મગુણ્ઠિતવિગ્રહઃ ।
સ્ફુરત્ત્રિશૂલો વિશ્વેશો જટાકુણ્ડલભૂષિતઃ

કૃત્તિવાસા મહાકાયો મહાહિકૃતભૂષણઃ ।
વાદયન્વૈ ડમરુકં ડિણ્ડિમપ્રતિમં શુભમ્

કપાલપાણિર્ભગવાન્બાલકૈર્બહુભિર્વૃતઃ ।
ક્વચિદ્ગાયન્હસંશ્ચૈવ નૃત્યન્વદન્ ક્વચિત્ક્વચિત્

યત્ર યત્ર ગૃહે દેવો લીલયા ડિણ્ડમં ન્યસેત્ ।
ભારાક્રાન્તં ગૃહં પાર્થ તત્રતત્ર વિનશ્યતિ

એવં સમ્પ્રચરન્ દેવો વેષ્ટિતો બહુભિર્જનૈઃ ।
દૃશ્યાદૃશ્યેન રૂપેણ નિર્જગામ બહિઃ પ્રભુઃ

ઇતશ્ચેતશ્ચ ધાવન્તં ન પશ્યન્તિ યદા જનાઃ ।
વિસ્મિતાસ્તે સ્થિતાઃ શમ્ભુર્ભવિષ્યતિ તતોઽસ્તુવન્

તેષાં તુ સ્તુવતાં ભક્ત્યા શઙ્કરં જગતાં પતિમ્ ।
ડિણ્ડિરૂપો હિ ભગવાંસ્તદાસૌ પ્રત્યદૃશ્યત

તદાપ્રભૃતિ દેવેશો ડિણ્ડિમેશ્વર ઉચ્યતે ।
દર્શનાત્સ્પર્શનાદ્રાજન્ સર્વપાપૈઃ પ્રમુચ્યતે

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે એકશાલડિણ્ડિમેશ્વરતીર્થમાહાત્મ્યવર્ણનં નામ દ્વાદશોત્તરદ્વિશતતમોઽધ્યાયઃ ॥