Skanda Purana · Verses 5.21-2

īśvara uvāca//
ekaviṃśatikaṃ viddhi kukkuṭeśvarasaṃjñakam//
yasya darśanamātreṇa tiryagyonirna labhyate

kauśikonāma rājābhūtkukkuṭo jāyate sadā//
dṛśyate vāsare bhāge sarvābharaṇabhūṣitaḥ

vyāptā ca pṛthivī tena saśailavanakānanā //
pūrvakarmaprabhāvena prāptaṃ rājyamakaṇṭakam

viśālānāma vikhyātā bhāryā tasya mahīpateḥ //
rūpalāvaṇyasaṃyuktā catuḥṣaṣṭikalānvitā

tayā cakāra sahitaḥ sa rājyaṃ rājasattamaḥ //
sā vallabhāpi nṛpateḥ prāṇebhyo'pi garīyasī

tayā sārddhaṃ kadācicca surataṃ nāsti pārvati //
saṃtaptā sarvadā sā ca ratyabhāvādbabhūva ha

evaṃ gacchati kāle tu saha rājñā smarāturā //
sarvasattvarutajñā sā viśālā vipulekṣaṇā //
dadarśa kīṭamithunamanaṃgakalahāturam

prasādayaṃstathā kīṭaḥ svāṃ priyāṃ ca muhurmuhuḥ //
dāso'smi tava kāṃte'haṃ rūpasaubhāgya sundari

bhajasva māṃ yathākāmamanaṃgaśarapīḍitam //
śirasā praṇatenaiva racitaste mayāṃjaliḥ

na tvayā sadṛśī loke kāminī vidyate kvacit //
suvarṇavarṇasadṛśī madbhaktā cāruhāsinī

kuto vā mayi dīne tvaṃ kruddheva priyavādini //
kimarthaṃ vada kalyāṇi saroṣava danā sthitā

sā tamāha prakopācca kimālapasi māṃ vṛthā //
tvayā modakacūrṇaṃ tu māṃ vihāya manoramām //
pradattaṃ kāmalubdhena anyasya kīṭakādhama

nāhamevaṃ kariṣyāmi kīṭaḥ prāha punaḥpunaḥ //
spṛśāmi pādau satyena praṇatasya prasīda me

iti tadvacanaṃ śrutvā sā prasannābhavattadā //
ātmānamarpayāmāsa kāmanāya pipīlikā

dṛṣṭvā tanmahadāścaryaṃ sā rājñī vilalāpa ha //
dhigrājyaṃ dhikca me rūpaṃ dhikca yauvanamadya me //
na kāmitāhaṃ kāṃtena mariṣyāmi na saṃśayaḥ

evaṃ vilapya bahudhā viniḥśvasya punaḥpunaḥ //
unmatteva viśālākṣī gālavasyāśramaṃ gatā

dṛṣṭvā tamṛṣimāsīnaṃ tapoyoniṃ dṛḍhavratam //
uvāca praṇatāṃgī sā śokasaṃtaptamānasā

eko'yaṃ saṃśayo brahmanhṛdaye parivarttate//
vaśyo'pi hi ca me bharttā rūpalāvaṇyavānapi//
na jāne kāraṇaṃ kiṃ tu saṃgamo nopajāyate

yo gatvā pramadārājyaṃ jitvā sarvāḥ purā raṇe//
ājahāra śubhāstāsāṃ madhyādaṣṭau varāṃganāḥ//
naiva kāmayate tāsu kimetaditi suvrata

vājino vāraṇāścaiva dhanadhānyamanaṃtakam//
varttate hi janaḥ sarvo mamājñāṃ pālayankṣitau

kena karmavipākena mamedaṃ yauvanaṃ dṛḍham //
vyarthaṃ jātaṃ dvijaśreṣṭha ratiṃ na kurute nṛpaḥ//

dṛśyate vāsare bhāge rātrau caiva na dṛśyate //
ihajanmakṛtaṃ caitadāhosvitpāralaukikam

duṣkṛtāvarjanaṃ brahmanmamedaṃ vaktumarhasi //
tasyāstadvacanaṃ śrutvā gālavo vākyamabravīt

śṛṇu putri purāvṛttaṃ bālabhāvena yatkṛtam//
anena rājñā dharmajñe rātrau yena na dṛśyate

vidūrathasya tanayastava bhartā sa niścitam//
māṃsāhārī doṣaratirviṣayāsaktamānasaḥ

bahavaḥ kukkuṭāstena bhakṣitā rājasūnunā

evaṃ bhakṣayatastasya bahuśo vatsarā gatāḥ //
kālena mahatā rājñā tāmracūḍena maṃtriṇaḥ//
pṛṣṭāḥ kiṃ kāraṇaṃ nātra samāyāṃti hi kukkuṭāḥ

atha kenāpi kathitaṃ kukkuṭānāṃ ca bhakṣaṇam //
vidūrathasya putreṇa kauśikena durātmanā //
bhakṣitāḥ kukkuṭāḥ sarve vinā kāraṇato nṛpa

tāmracūḍo'tha saṃkruddho dadau śāpaṃ durātmane //
kauśikāya kṣayo rogo bhaviṣyati bhayāvahaḥ //

tadāprabhṛtyabhūtkṣīṇo rājaputro dinedine //
auṣadhairadhiko'bhyeti vyādhinā pīḍito bhṛśam

atha kenāpi kāmena vāmadevāśramaṃ gataḥ //
kṣayarogābhibhūto'sau maraṇotsukamānasaḥ //
papraccha vāmadevaṃ sa namaskṛtya punaḥpunaḥ

bhagavankena pāpena kṣīyate'harniśaṃ vapuḥ //
madīyaṃ poṣyamāṇaṃ hi māṃsena vividhena ca

vāmadevo'tha taṃ prāha kukkuṭā bhakṣitāstvayā //
tāmracūḍena śapto'si kukkuṭānāṃ nṛpeṇa hi

tameva śaraṇaṃ gaccha sa upāyaṃ vadiṣyati //
tataḥ sa tāmracūḍasyābhyarṇamāgānṛpātmajaḥ

dṛṣṭvā ca tāmracūḍaṃ taṃ mahābhaktyā kṛtāṃjaliḥ //
provāca praṇato bhūtvā pāhi māṃ śaraṇāgatam

ajñānādbhakṣitā deva kukkuṭāḥ puṣṭikāraṇāt //
kṣaṃtumarhasi deveśa mamāgaḥ kṛpaṇasya ca

provāca tāmracūḍo'tha yasmātprārthayase nṛpa //
tasmātte vāsare prāpte puruṣatvaṃ bhaviṣyati

śāstā goptā ca lokānāṃ rājā daṃḍadharaḥ prabhuḥ //
kukkuṭo bhavitā rātrau sarvabhogavivarjitaḥ

ato na dṛśyate putri tiryagbhāvaṃ samāśritaḥ

iti tasya vacaḥ śrutvā gālavasya mahātmanaḥ //
sā saṃpūjya viśālākṣī gālavaṃ munisattamam //
papraccha parayā bhaktyā śāpāṃto hi kathaṃ bhavet

gālavaḥ kathayāmāsa dhyānenālokya yatnataḥ

mahākāla vane liṃgaṃ pakṣiyonivimocanam //
jvāleśvarasya devasya pūrvabhāge vyavasthitam //
tasya darśanamātreṇa śāpasyāṃto bhaviṣyati

sā praṇamya muniśreṣṭhamājagāma tvarānvitā //
yatrāste nṛpaśārdūlo vidhyanbahuvidhānmṛgān

praphullanayanābhyāṃ sā dṛṣṭā lolekṣaṇā priyā //
āhlāditā bahuvidhaiḥ komalairvacanāmṛtaiḥ

tatastena tadā rājñā proktā sā mṛgalocanā //
idānīṃ ki mayā kāṃte kāryaṃ bhavati kathyatām

tayā proktaṃ mahārāja gamyate'dya mayā saha //
mahākālavane puṇye sarvaduṣkṛtanāśane

tasyāstadvacanaṃ śrutvā tvaramāṇo mudānvitaḥ //
tayā nīto'tha nṛpatirliṃgasyāsya samīpataḥ

pūjayitvātha talliṃgaṃ pakṣiyonivimocanam //
tatraiva ca sthito rājā priyayā saha pārvati

tasyāṃ rātrau na saṃjātaḥ kukkuṭo yādṛśaḥ sadā //
śivaprasādādabhavaddivyarūpī manoharaḥ

rūpeṇa nirjitaḥ kāmastenāpratimatejasā //
tato vismayamāpannaściṃtayāmāsa pārthivaḥ //
ko'yaṃ prabhāvo yenāhaṃ śāpānmuktaḥ sudustarāt

priyāṃ papraccha nṛpatiḥ pūrṇenduvadanāṃ bhṛśam //
kathaṃ śāpādvimukto'haṃ kena puṇyena karmaṇā

atha sā kathayāmāsa vṛttāṃtaṃ vistarānmudā //
gālavena hi yatproktaṃ yatkiṃcicchāpamokṣaṇam

rājañchāpādvimukto'si liṃgasyāsya prabhāvataḥ //
punaḥ prasādya talliṃgaṃ bhuktvā bhogāṃściraṃ bhuvi

tayā sārddhaṃ yayau rājā svargaṃ suragaṇaiḥ stutaḥ //
tadāprabhṛti talliṃgaṃ kukkuṭeśvarasaṃjñakam

vikhyātaṃ devi loke'sminsarvakāmaphalapradam //
tacca ye pūjayiṣyaṃti kukkuṭeśvarasaṃjñakam //
tiryagyoniṃ na yāsyaṃti na viyogo bhaviṣyati

na cāpi narakāvāptirna duḥkhaṃ na jarā bhayam //
nākāle maraṇaṃ nṝṇāṃ na ca kaṣṭaṃ bhavi ṣyati

rūpasaubhāgyasaṃpannā bhaviṣyaṃti yugeyuge //
caturddaśyāṃ prapaśyati liṃgaṃ ye kukkuṭeśvaram //
teṣāṃ kule ca ye kecitpitaro nirayasthitāḥ //

tiryagyonigatā ye ca paśuyoniṃ tu ye gatāḥ //
vṛkṣatvamathavā prāptāsteṣāṃ mokṣo bhaviṣyati

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe caturaśītiliṅgamāhātmye kukkuṭeśvaramāhātmyavarṇanaṃnāmaikaviṃśo'dhyāyaḥ