Skanda Purana · Chapter 5.189

śrīmārkaṇḍeya uvāca -
tato gacchettu rājendra tīrthaṃ paramaśobhanam /
udīrṇo yatra vārāho hyabhavaddharaṇīdharaḥ

dhanvadaṃṣṭrāṃ karālāgrāṃ bibhracca pṛthivīmimām /
sa eva pañcamaḥ prokto vārāho muktidāyakaḥ

yudhiṣṭhira uvāca -
kathamudīrṇarūpo'bhūdvārāho dharaṇīdharaḥ /
vārāhatvaṃ gataḥ kena pañcamaḥ kena saṃjñitaḥ

mārkaṇḍeya uvāca -
ādikalpe purā rājankṣīrode bhagavān hariḥ /
śete sa bhogiśayane yoganidrāvimohitaḥ

babhūva nṛpatiśreṣṭha gatvā vai devasaṃnidhau /
avocadbhārakhinnāhaṃ gamiṣyāmi rasātalam

dṛṣṭvā devāḥ samudvignā gatā yatra janārdanaḥ /
tuṣṭuvurvāgbhiriṣṭābhiḥ keśavaṃ jagatpatim

devā ūcuḥ /
namo namaste deveśa surārtihara sarvaga /
viśvamūrte namastubhyaṃ trāhi sarvānmahadbhayāt

ityukto daivatairdevo hyuvāca kimupasthitam /
kāryaṃ vadadhvaṃ me devā yatkṛtyaṃ mā ciraṃ kṛthāḥ

devā ūcuḥ /
dharā dharitrī bhūtānāṃ bhārodvignā nimajjati /
tāmuddhara hṛṣīkeśa lokānsaṃsthāpaya sthitau

evamuktaḥ suraiḥ sarvaiḥ keśavaḥ parameśvaraḥ /
vārāhaṃ rūpamāsthāya sarvayajñamayaṃ vibhuḥ

daṃṣṭrākarālaṃ piṅgākṣaṃ samākuñcitamūrdhajam /
kṛtvā'nantaṃ pādapīṭhaṃ daṃṣṭrāgreṇoddharanbhuvam

saparvatavanāmurvīṃ samudraparimekhalām /
uddhṛtya bhagavān viṣṇurudīrṇaḥ samajāyata

darśayanpañcadhātmānamuttare narmadātaṭe /
tathādyaṃ koralāyāṃ tu dvitīyaṃ yodhanīpure

jayakṣetrābhidhāne tu jayeti parikīrtitam /
asurānmohayalliṅgastṛtīyaḥ parikīrtitaḥ

pāvanāya jagaddhetoḥ sthito yasmācchaśiprabhaḥ /
atastu nṛpaśārdūla śveta ityābhidhīyate

uddhṛtya jagatāṃ devīmudīrṇo bhṛgukacchake /
tataḥ pañcama udīrṇo varāha iti saṃjñitaḥ

iti pañcavarāhāste kathitaḥ pāṇḍunandana /
yugapaddarśanaṃ caiṣāṃ brahmahatyāṃ vyapohati

jyeṣṭhe māsi site pakṣa ekādaśyāṃ viśeṣataḥ /
gatvā hyādivarāhaṃ tu samprāpte daśamīdine

haviṣyamannaṃ bhuñjīyāllaghusāyaṃ gate ravau /
rātrau jāgaraṇaṃ kuryādvārāhe hyādisaṃjñake

tataḥ prabhāte hyuṣasi saṃsnātvā narmadājale /
saṃtarpya pitṛdevāṃśca tilairyavavimiśritaiḥ

dhenuṃ dadyāddvije yogye sarvābharaṇabhūṣitām /
nirmamo nirahaṅkāro dānaṃ dadyāddvijātaye

gatvā sampūjayeddevaṃ vārāhaṃ hyādisaṃjñitam /
anena vidhinā pūjya paścādgacchejjayaṃ tvaran

tvaritaṃ tu jayaṃ gatvā pūrvakaṃ vidhimācaret /
aśvaṃ dadyāddvijāgryāya jayapūrvābhinirgatam

liṅge caiva tilā deyāḥ śvete hiraṇyameva ca /
udīrṇe ca bhuvaṃ dadyātpūrvakaṃ vidhimācaret

anastamita āditye varāhānpañca paśyataḥ /
yatphalaṃ labhate pārtha tadihaikamanāḥ śṛṇu

brahmahatyā surāpānaṃ steyaṃ gurvaṅganāgamaḥ /
ebhistu saha saṃyogo viśvastānāṃ ca vañcanam

svasṛduhitṛbhaginīkuladāropabṛṃhaṇam /
ā janmamaraṇādyāvatpāpaṃ bharatasattama

tīrthapañcakapūtasya vaiṣṇavasya viśeṣataḥ /
yugapaccavinaśyeta tūlarāśirivānalāt

nārāyaṇānusmaraṇājjapadhyānādviśeṣataḥ /
vipraṇaśyanti pāpāni girikūṭasamānyapi

dṛṣṭvā pañca varāhānvai pauruṣe mahati sthitaḥ /
āplavannarmadātoye śrāddhaṃ kṛtvā yathāvidhi

udayāstamanādarvāgyaḥ paśyelloṭaṇeśvaram /
kalevaravimuktaḥ sa ityevaṃ śaṅkaro'bravīt

muktiṃ prayāti sahasā duṣprāpāṃ parameśvarīm /
pauruṣe kriyamāṇe'pi na siddhirjāyate yadi

bruvanti svargagamanamapi pāpānvitasya ca /
yatra tatra gatasyaiva bhavetpañcavarāhakī

jyeṣṭhasyaikādaśītithau dhruvaṃ tatra vasennaraḥ /
ādiṃ jayaṃ tathā śvetaṃ liṅgamudīrṇameva ca

āśritya tasyā draṣṭavyā varāhāstu yatastataḥ /
jyeṣṭhasyaikādaśītithau viṣṇunā prabhuviṣṇunā

vārāhaṃ rūpamāsthāya uddhṛtā dharaṇī vibho /
puṇyātpuṇyatamā tena hyaśeṣāghaughanāśinī

dṛṣṭvā pañcavarāhānvai kroḍamudīrṇarūpiṇam /
pūjayitvā vidhānena paścājjāgaraṇaṃ caret

sapañcavartikān dīpān ghṛtenojjvālya bhaktitaḥ /
purāṇaśravaṇairnṛtyairgītavādyaiḥ sumaṅgalaiḥ

vedajāpyaiḥ pavitraiśca kṣapayitvā ca śarvarīm /
yatpuṇyaṃ labhate martyo hyājamīḍha śṛṇuṣva tat

revājalaṃ puṇyatamaṃ pṛthivyāṃ tathā ca devo jagatāṃ patirhariḥ /
ekādaśī pāpaharā narendra bahvāyāsairlabhyate mānavānām

ekaikaśo brahmahatyādikāni śaktāni hantuṃ pāpasaṅghāni rājan /
naite sarve yugapadvai sametā hantuṃ śaktāḥ kiṃ na tadbrūhi rājan

yathedamuktaṃ tava dharmasūno śrutaṃ ca yacchaṅkarāccandramauleḥ /
śrutvedamicchanmucyate sarvapāpaiḥ paṭhanpadaṃ yāti hi vṛtraśatroḥ

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe narmadāmāhātmye udīrṇavarāhatīrthamāhātmyavarṇanaṃ nāmaikonanavatyuttaraśatatamo'dhyāyaḥ //