Skanda Purana · Chapter 5.188

śrīmārkaṇḍeya uvāca -
tataḥ paraṃ mahārāja catvāriṃśatkramāntare /
śālagrāmaṃ tato gacchetsarvadaivatapūjitam

yatrādidevo bhagavānvāsudevastrivikramaḥ /
svayaṃ tiṣṭhati lokātmā sarveṣāṃ hitakāmyayā

nāradena tapastaptvā kṛtā śālā dvijanmanām /
siddhikṣetraṃ bhṛgukṣetraṃ jñātvā revātaṭe svayam

śālagrāmābhidho devo viprāṇāṃ tvadhivāsitaḥ /
sādhūnāṃ copakārāya vāsudevaḥ pratiṣṭhitaḥ

yogināmupakārāya yogidhyeyo janārdanaḥ /
śālagrāmeti tenaiva narmadātaṭamāśritaḥ

māsi mārgaśire śuklā bhavatyekādaśī yadā /
snātvā revājale puṇye taddinaṃ samupoṣayet

rātrau jāgaraṇaṃ kuryātsampūjya ca janārdanam /
punaḥ prabhātasamaye dvādaśyāṃ narmadājale

snātvā saṃtarpya devāṃśca pitṝnmātṝṃstathaiva ca /
śrāddhaṃ kṛtvā tataḥ paścātpitṛbhyo vidhipūrvakam

śaktito brāhmaṇānpūjya svarṇavastrānnadānataḥ /
kṣamāpayitvā tānviprāṃstathā devaṃ khagadhvajam

evaṃ kṛte mahārāja yatpuṇyaṃ ca bhavennṝṇām /
śṛṇuṣvāvahito bhūtvā tatpuṇyaṃ nṛpasattama

na śokaduḥkhe pratipatsyatīha jīvanmṛto yāti murārisāmyam /
mahānti pāpāni visṛjya dugdhaṃ punarna mātuḥ pibate stanodyat

śālagrāmaṃ paśyate yo hi nityaṃ snātvā jale nārmade'ghaughahāre /
sa mucyate brahmahatyādipāpairnārāyaṇānusmaraṇena tena

vasanti ye saṃnyasitvā ca tatra nigṛhya duḥkhāni vimuktasaṅghāḥ /
dhyāyanto vai sāṃkhyavṛttyā turīyaṃ padaṃ murāreste'pi tatraiva yānti

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe śālagrāmatīrthamahātmyavarṇanaṃ nāmāṣṭāśītyuttaraśatatamo'dhyāyaḥ //