Skanda Purana · Verses 5.17-2

// īśvara uvāca // //
devaṃ saptadaśaṃ viddhi vikhyātamapsareśvaram //
yasya darśanamātreṇa loko'bhīṣṭānavāpnuyāt

naṃdanākhye vane devi sarvakāmasamanvite //
siddhacāraṇagaṃdharvakiṃnarodgītanādite

śukakokilacakrāhvacakorakurarāvṛte //
divyalokopamasthāne triviṣṭapavi bhūṣaṇe

tatropaviṣṭo vṛtrāriḥ surajyeṣṭhaśca sevitaḥ //
nanartta raṃbhā tasyāgre nṛtyabhāvānvivṛṇvatī

tatonyacittā saṃjātā kiṃcitsmṛtvā pramādataḥ //
layatālavihīnā ca dṛṣṭā vai vāsavena sā

cukopa ca suraśreṣṭhastasyāḥ śāpaṃ dadau kila //
vismṛtirmānuṣaṃ karma na divyaṃ kvāpi dṛśyate //
tasmāttu mānuṣe loke gaccha tvaṃ niṣprabhā satī

atheṃdrakopasaṃkṣobhātpatitā bhuvi sāpsarāḥ//
niśceṣṭā vikalībhūtā rudatī visvaraṃ bahu

karuṇaṃ vilapaṃtī ca kiṃ mayā duṣkṛtaṃ kṛtam //
nirmalaṃ na tapastaptaṃ kathaṃ nārādhitaḥ suraḥ

athāpsarogaṇaḥ sarvaḥ sakhīgaṇa samanvitaḥ //
raṃbhā yatraiva patitā samāyāto varānane //
tasyāḥ śokāgnidāhena saṃtapto'psarasāṃ gaṇaḥ

susuptā padminī sābhre yathā naiva virājate //
tathā śāpena vidhvastā raṃbhā no rājate sadā

sakhīgaṇaiḥ parivṛtā raṃbhā dṛṣṭā varānane //
devarṣiṇā nāradena vismitenāṃtarātmanā

kasmādapsarasaḥ sadyo dṛśyaṃte śokavihvalāḥ //
kasmācca karuṇaṃ raṃbhā rodityeṣā muhurmuhuḥ //

papraccha ca samāgatya kasmādapsaraso varāḥ //
viṣaṇṇavadanā dīnāḥ kathyatāṃ mama sādaram

vṛttāṃtaṃ kathayāmāsustāśca tasmai purātanam //
śrutvā ca nāradastatra dhyānāsakto'bhavanmuniḥ

upāyaṃ kathayāmāsa hitaṃ tāsāṃ prayatnataḥ //
gacchaṃtvapsarasaḥ sarvā mahākālavanottame

ārādhayadhvaṃ deveśaṃ liṃgaṃ sarvārthasādhakam //
pṛcchādevyāstu purataḥ purā kalpe prapūjitam

urvaśyā mama vākyena bharttā prāptaḥ purūravāḥ //
nāradasya vacaḥ śrutvā samājagmurgaṇāstathā

mahākālavane ramye liṃgārādhanakāmyayā //
tatastuṣṭaḥ svayaṃ rudrastāsāṃ bhaktyā varaṃ dadau

raṃbhe prāpsyasi saubhāgyaṃ svargalokaṃ yaśasvini //
bhaviṣyasi mahābhāge jiṣṇostvaṃ vallabhā dhuvam

tasmāttriviṣṭapaṃ gaccha saṃghenānena pūjitā //
ārādhito'psarobhiśca purā svargārthakāmyayā //
atopsareśvaraḥ khyāto yayau khyātiṃ jagattraye

ye samārādhayiṣyaṃti bhaktyā cāpsaraseśvaram //
te sarvakāmasaṃpūrṇā bhaviṣyaṃti yugeyuge

prerayiṣyaṃti ye loke darśanārthaṃ yaśasvini //
sthānabhraṃśo viyogaśca teṣāṃ svapne na jāyate

kiṃ dānaiḥ kiṃ tapobhiśca kiṃ yajñairbahudakṣiṇaiḥ //
sparśanāllabhate rājyaṃ svargaṃ mokṣaṃ krameṇa tu

eṣa te kathito devi prabhāvaḥ pāpanāśanaḥ //
apsareśvaradevasya śrūyatāṃ kalkaleśvaraḥ

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe caturaśītiliṅgamāhātmye'psareśvaramāhātmyavarṇanaṃnāma saptadaśo'dhyāyaḥ