Skanda Purana · Chapter 5.167

yudhiṣṭhira uvāca -
narmadādakṣiṇe kūle tvaccihnenopalakṣitam /
tīrthametanmamākhyāhi sambhavaṃ ca mahāmune

mārkaṇḍeya uvāca -
purā kṛtayugasyādau dakṣiṇe girimuttamam /
vindhyaṃ sarvaguṇopetaṃ niyato niyatāśanaḥ

ṛṣisaṅghaiḥ kṛtātithyo daṇḍake nyavasaṃ ciram /
uṣitvā suciraṃ kālaṃ varṣāṇāmayutaṃ sukhī

tānṛṣīn samanujñāpya śiṣyairanugatastataḥ /
nivṛttaḥ sumahābhāga narmadākūlamāgataḥ

puṇyaṃ ca ramaṇīyaṃ ca sarvapāpavināśanam /
kṛtvāhamāspadaṃ tatra dvijasaṃghasamāyutaḥ

brahmacāribhirākīrṇaṃ gārhasthye supratiṣṭhitaiḥ /
vānaprasthaiśca yatibhiryatāhārairyatātmabhiḥ

tapasvibhirmahābhāgaiḥ kāmakrodhavivarjitaiḥ /
tatrāhaṃ varṣamayutaṃ tapaḥ kṛtvā sudāruṇam

ārādhayaṃ vāsudevaṃ prabhuṃ kartāramīśvaram /
japaṃstapobhirniyamairnarmadākūlamāśritaḥ

tatastau varadau devau samāyātau yudhiṣṭhira /
pratyakṣau bhāskarau rājannumāśrībhyāṃ vibhūṣitau

praṇamyāhaṃ tato devau bhaktiyukto vaco'bruvam /
bhavantau prārthayāmi sma varārhau varadau śivau

dharmasthitiṃ mahābhāgau bhaktiṃ vānuttamāṃ yuvām /
ajaro vyādhirahitaḥ pañcaviṃśativarṣavat /
asminsthāne sadā stheyaṃ saha devairasaṃśayam

evamuktau mayā pārtha tau devau kṛṣṇaśaṅkarau /
māmūcatuḥ prahṛṣṭau tau nivāsārthaṃ yudhiṣṭhira

devāvūcatuḥ /
asminsthāne sthitau viddhi saha devaiḥ savāsavaiḥ /
evamuktvā tato devau tatraivāntaradhīyatām

ahaṃ ca sthāpayitvā tau śaṅkaraṃ kṛṣṇamavyayam /
kṛtakṛtyastato jātaḥ sampūjya susamāhitaḥ

tasmiṃstīrthe naraḥ snātvā pūjayetparameśvaram /
mārkaṇḍeśvaranāmnā vai viṣṇuṃ tribhuvaneśvaram

sa gacchetparamaṃ sthānaṃ vaiṣṇavaṃ śaivameva ca /
ghṛtena payasā vātha dadhnā ca madhunā tathā

nārmadenodakenātha gandhadhūpaiḥ suśobhanaiḥ /
puṣpopahāraiśca tathā naivedyairniyatātmavān

evaṃ viṣṇoḥ prakurvīta jāgaraṃ bhaktitatparaḥ /
snānādīni tathā rājanprayataḥ śucimānasaḥ

jyeṣṭhe māsi site pakṣe caturdaśyāmupoṣitaḥ /
dvādaśyāṃ kārayeddevapūjanaṃ vaiṣṇavo naraḥ

evaṃ kṛtvā caturdaśyāmekādaśyāṃ narottama /
vaiṣṇavaṃ lokamāpnoti viṣṇutulyo bhavennaraḥ

māheśvare ca rājendra gaṇavanmodate pure /
śrāddhaṃ ca kurute tatra pitṝnuddiśya susthiraḥ

tasya te hyakṣayāṃ tṛptiṃ prāpnuvanti na saṃśayaḥ /
narmadāyāṃ dvijaḥ snātvā maunī niyatamānasaḥ

upāsya sandhyāṃ tatrastho japaṃ kṛtvā suśobhanam /
tarpayitvā pitṝndevānmanuṣyāṃśca yathāvidhi

kṛṣṇasya purataḥ sthitvā mārkaṇḍeśasya vā punaḥ /
ṛgyajuḥsāmamantrāṃśca japedatra prayatnataḥ

ṛcamekāṃ japedyastu ṛgvedasya phalaṃ labhet /
yajurvedasya yajuṣā sāmnā sāmaphalaṃ labhet

ekasminbhojite vipre koṭirbhavati bhojitā /
mṛtaprajā tu yā nārī vandhyā strījananī tathā

rudrāṃstu vidhivajjaptvā brāhmaṇo vedatattvavit /
liṅgasya dakṣiṇe pārśve sthāpayetkalaśaṃ śivam

rudraikādaśabhirmantraiḥ snāpayetkalaśāmbhasā /
putramāpnoti rājendra dīrghāyuṣamakalmaṣam

mārkaṇḍeśvaravṛkṣānyo dūrasthānapi paśyati /
brahmahatyādipāpebhyo mucyate śaṅkaro'bravīt

ya idaṃ śṛṇuyādbhaktyā paṭhedvā nṛpasattama /
sarvapāpaviśuddhātmā jāyate nātra saṃśayaḥ

idaṃ yaśasyamāyuṣyaṃ dhanyaṃ duḥkhapraṇāśanam /
paṭhatāṃ śṛṇvatāṃ vāpi sarvapāpapramocanam

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe mārkaṇḍeśvaratīrthamāhātmyavarṇanaṃ nāma saptaṣaṣṭyuttaraśatatamo'dhyāyaḥ //