Skanda Purana · Verses 5.14-2

// śrīmahādeva uvāca // //
kuṭuṃbeśvarasaṃjñaṃ tu devaṃ viddhi caturdaśam //
yasya darśanamātreṇa gotravṛddhiśca jāyate

yadā devāsuraiḥ pūrvaṃ mathitaḥ kṣīrasāgaraḥ //
tadā ca nirgataṃ devi durddharaṃ duḥsahaṃ viṣam

kālakūṭamayaṃ raudraṃ viṣaṃ jvālāvibhīṣaṇam //
dahyate ca jagattena sadevāsuramānuṣam

tato devagaṇāḥ sarve sāsurā yakṣarākṣasāḥ //
viṣajvālātibhītāśca māmeva śaraṇaṃ gatāḥ

stutohaṃ vividhaiḥ stotrairidamuktaṃ varānane //
amṛtārthe kṛto yatnaḥ saṃprāptaṃ maraṇaṃ vibho

anyathā ciṃtitaṃ kāryaṃ daivena kṛtamanyathā //
atimathitumārabdhe lobhādvai kṣīrasāgaram

utpannaṃ kālakūṭaṃ tu yena dagdhaṃ carācaram //
tato'smākaṃ bhayaṃ jātaṃ kālakūṭodbhavaṃ prabho //

rakṣāṃ kuru jagannātha śaraṇāgatavatsala //
hitārthaṃ sarvalokānāṃ yathā na pralayo bhavet

mayā teṣāṃ vacaḥ śrutvā tridaśānāṃ yaśasvini //
māyūraṃ rūpamāsthāya devānāmanukaṃpayā //
kaṃṭhe dhṛtaṃ mahāraudraṃ kālakūṭāhvayaṃ tadā

tvaṃ bhītā sahasā naṣṭā rūpaṃ dṛṣṭvā tu māmakam //
viṣavṛkṣamasevyaṃ tu tato'haṃ duḥkhito'bhavam //5.2.14.१ ०//
nadīsaṃghasamāyuktā gaṃgā dṛṣṭā ca pārśvataḥ //
sā ca proktā mayā devi sādaraṃ stutipūrvakam

kālakūṭaviṣaṃ gaṃge vegānnaya mahodadhim //
nānyā śaktā samānetuṃ tvāṃ vinā lokapāvani

// gaṃgovāca // //
nāsti me bhagavañchaktirvivoḍhuṃ ca jagatpate //
raudrarūpī ca duḥsevyo dahatyeva na saṃśayaḥ

tatastu yamunā proktā na samarthā sarasvatī //
anyāśca vividhā nadyo mayāhūtāḥ pṛtha kpṛthak

aśaktāstāḥ samānetuṃ kālakūṭāhvayaṃ viṣam //
tadāhūtā mayā devi śiprā brahmasamudbhavā

śipre putri mamādeśānmahākāla vanaṃ vraja //
gṛhītvā kālakūṭaṃ tu puraḥ kāmeśvarasya hi

vidyate paramaṃ liṃgaṃ tasmiṃlliṃge niyojaya //
mayā proktā tadā prāha brahmaṇaḥ paramā kalā

eṣāsmi prasthitā deva tava vākyādasaṃśayam //
duḥsparśaḥ kālakūṭo'yaṃ nūnaṃ māṃ bhakṣayiṣyati

asevyāhaṃ bhaviṣyāmi duṣṭasaṃparka yogataḥ //
tato mayā punaḥ proktā śiprā pātakanāśinī

yāni tīrthāni bhūloke pātāle yāni saṃti vai //
svargaloke hyaṃtarikṣe puṇyāni cāruhāsini

tāni sarvāṇi sevārthamāgatya mama vākyataḥ //
ājñāṃ tava kariṣyaṃti gaccha putri mamājñayā

evamuktā tadā śiprā gṛhītvā kālakūṭakam //
samāyātā varārohe yatra liṃgamanuttamam

tadviṣaṃ kālakūṭāhvaṃ nikṣiptaṃ liṃgamūrddhani //
viṣaliṃgastato jāto dṛṣṭo mṛtyupradāyakaḥ

paśuḥ pakṣī naro vāpi yo hi paśyati taṃ śivam //
mriyate sa tadā devi tasya devasya darśanāt

tīrthayātrāṃ tataḥ kartuṃ tatrāyātāṃstapodhanāḥ //
taṃ ca devaṃ tato dṛṣṭvā mṛtāḥ sarve ca tatkṣaṇāt

tato hāhākṛtaṃ devi trailokyaṃ sacarācaram//
hāhākāraṃ mahacchrutvā mayā te dvijasattamāḥ //
saṃjīvitāśca vai sarve dṛṣṭipātena pārvati

tuṣṭuvuḥ praṇatā viprā māmato vividhaiḥ stavaiḥ //
mayā proktāstu te viprā vṛṇudhvaṃ varamuttamam

tairuktaṃ praṇatairdevi lokānāṃ ca hitārthataḥ //
saṃmriyaṃte prajā deva liṃgenānena śaṃkara

tāḥ saṃrakṣa jagannātha hyeṣo'smākaṃ varaḥ prabho //
pratijñātaṃ mayā devi lokānāmanukaṃpayā

kṣemārogyakaraṃ liṃgaṃ bhaviṣyati na saṃśayaḥ //
kāyāvarohaṇādviprāḥ svayamatrāgamiṣyati

lakulīśastadā cāyaṃ devaḥ spṛśyo bhaviṣyati //
vṛddhikārī kuṭumbasya bhaviṣyati na saṃśayaḥ

kuṭuṃbeśvara iti nāmnā loke khyātiṃ gamiṣyati //
ityuktāste mayā viprāstatraiva tapasi sthitāḥ

lakulīśo'tha talliṃgamāruroha mamājñayā //
janayanvismayaṃ loke kīrtiṃ janapade tathā

kuṭumbeśvarasaṃjñaṃ tu ye paśyaṃti yaśasvini //
teṣāṃ kule tu vṛddhiḥ syātkuṭuṃbasya na saṃśayaḥ

āśvināsitapaṃcamyāṃ darśa naṃ yaḥ kariṣyati //
bahuputro bahudhano bhaviṣyati na saṃśayaḥ

mahatīṃ śriyamāpnoti rogaiścāpi pramucyate //
sarvakāmasamṛddho'sau mama loke sa modate

darśanaṃ ye kariṣyaṃti sparśanaṃ yajanaṃ tathā //
te sarve kāmasaṃpūrṇāḥ prayāṃti mama maṃdiram

samīpe tu saricchiprā vāpīkūpena saṃyutā //
yasyā darśanamātreṇa naraḥ pāpātpramucyate

somavārerkavāre ca snātvā tasyāṃ samāhitaḥ//
aṣṭamyāṃ vā caturdaśyāṃ yaḥ paśyetkuṭuṃbeśvaram //

rājasūyasahasrasya vājapeyaśatasya ca //
phalaṃ sa labhate devi satyametanmayoditam

eṣa te kathito devi prabhāvaḥ pāpanāśanaḥ //
kuṭuṃbeśvaradevasya tviṃdradyumneśvaraṃ śṛṇu

iti śrīskāṃde mahāpurāṇa ekāśītisāhasyāṃ saṃhitāyāṃ pañcama āvaṃtyakhaṃḍe caturaśītiliṅgamāhātmye kuṭuṃbeśvaramāhātmyavarṇanaṃnāma caturdaśo'dhyāyaḥ