Skanda Purana · Chapter 5.136

śrīmārkaṇḍeya uvāca -
tato gacchenmahīpāla cāhalyeśvaramuttamam /
yatra siddhā mahābhāgā tvahalyā tāpasī purā

gautamo brāhmaṇastvāsītsākṣādbrahmeva cāparaḥ /
satyadharmasamāyukto vānaprasthāśrame rataḥ

tasya patnī mahābhāgā hyahalyā nāma viśrutā /
rūpayauvanasampannā triṣu lokeṣu viśrutā

asyā apyatirūpeṇa devarājaḥ śatakratuḥ /
mohito lobhayāmāsa hyahalyāṃ balasūdanaḥ

māṃ bhajasva varārohe devarājamanindite /
krīḍayasva mayā sārddhaṃ triṣu lokeṣu pūjitā

kiṃ kariṣyasi vipreṇa śaucācārakṛśena tu /
tapaḥsvādhyāyaśīlena kliśyantīva sulocane

evamuktā varārohā strīsvabhāvātsucañcalā /
manasādhyāya śakraṃ sā kāmena kaluṣīkṛtā

tasyā viditvā taṃ bhāvaṃ sa devaḥ pākaśāsanaḥ /
gautamaṃ vañcayāmāsa duṣṭabhāvena bhāvitaḥ

viditvā cāntaraṃ tasya gṛhītvā veṣamuttamam /
ahalyāṃ ramayāmāsa viśvastāṃ mandirāntike

kṣaṇamātrāntare tatra devarājasya bhārata /
ājagāma muniśreṣṭho mandiraṃ tvarayānvitaḥ

āgataṃ gautamaṃ dṛṣṭvā bhītabhītaḥ puraṃdaraḥ /
nirgataḥ sa tato dṛṣṭvā śakro'yamiti cintayan

tataḥ śaśāpa devendraṃ gautamaḥ krodhamūrchitaḥ /
ajitendriyo'si yasmāttvaṃ tasmādbahubhago bhava

evamuktastu devendrastatkṣaṇādeva bhārata /
bhagānāṃ tu sahasreṇa tatkṣaṇādeva veṣṭitaḥ

tyaktvā rājyaṃ suraiḥ sārddhaṃ gataśrīko jagāma ha /
tapaścacāra vipulaṃ gautamena mahītale

ahalyāpi tataḥ śaptā yasmāttvaṃ duṣṭacāriṇī /
prekṣya māṃ ramase śakraṃ tasmādaśmamayī bhava

gate varṣasahasrānte rāmaṃ dṛṣṭvā yaśasvinam /
tīrthayātrāprasaṅgena dhautapāpā bhaviṣyasi

evaṃ gate tataḥ kāle dṛṣṭā rāmeṇa dhīmatā /
viśvāmitrasahāyena tyaktvā sāśmamayīṃ tanum

pūjayitvā yathānyāyaṃ gatapāpā vimatsarā /
āgatā narmadātīre tīrthe snātvā yathāvidhi

kṛtaṃ cāndrāyaṇaṃ māsaṃ kṛcchraṃ cānyaṃ tataḥ param /
tatastuṣṭo mahādevo dattvā varamanuttamam

jagāmādarśanaṃ bhūyo reme comāpatiściram /
ahalyā tu gate deve sthāpayitvā jagadgurum

ahalyeśvaranāmānaṃ svagṛhe cāgamatpunaḥ /
tatra tīrthe tu yaḥ snātvā pūjayetparameśvaram

sa mṛtaḥ svargamāpnoti yatra devo maheśvaraḥ /
krīḍayitvā yathākāmaṃ tatra loke mahātapāḥ

gate varṣasahasrānte mānuṣyaṃ labhate punaḥ /
dhanadhānyacayopetaḥ putrapautrasamanvitaḥ

vedavidyāśrayo dhīmāñjāyate vimale kule /
rūpasaubhāgyasampannaḥ sarvavyādhivivarjitaḥ /
jīvedvarṣaśataṃ sāgramahalyātīrthasevanāt

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe ahalyātīrthamāhātmyavarṇanaṃ nāma ṣaṭtriṃśadadhikaśatatamo'dhyāyaḥ //