Skanda Purana · Chapter 5.135

śrīmārkaṇḍeya uvāca -
tasyaivānantaraṃ cānyatsiddheśvaramanuttamam /
tīrthaṃ sarvaguṇopetaṃ sarvalokeṣu pūjitam

tatra tīrthe tu yaḥ snātvā hyumārudraṃ prapūjayet /
vājapeyasya yajñasya sa labhetphalamuttamam

tena puṇyena mahatā mṛtaḥ svargamavāpnuyāt /
apsarogaṇasaṃvīto jayaśabdādimaṅgalaiḥ

sahasravatsarāṃstatra krīḍayitvā yathāsukham /
dhanadhānyasamopete kule mahati jāyate

pūjyamāno naraśreṣṭha vedavedāṅgapāragaḥ /
vyādhiśokavinirmukto jīvecca śaradāṃ śatam

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe siddheśvaramāhātmyavarṇanaṃ nāma pañcatriṃśadadhikaśatatamo'dhyāyaḥ //