સ્કંદ પુરાણ · અધ્યાય 5.136

શ્રીમાર્કણ્ડેય ઉવાચ -
તતો ગચ્છેન્મહીપાલ ચાહલ્યેશ્વરમુત્તમમ્ ।
યત્ર સિદ્ધા મહાભાગા ત્વહલ્યા તાપસી પુરા

ગૌતમો બ્રાહ્મણસ્ત્વાસીત્સાક્ષાદ્બ્રહ્મેવ ચાપરઃ ।
સત્યધર્મસમાયુક્તો વાનપ્રસ્થાશ્રમે રતઃ

તસ્ય પત્ની મહાભાગા હ્યહલ્યા નામ વિશ્રુતા ।
રૂપયૌવનસમ્પન્ના ત્રિષુ લોકેષુ વિશ્રુતા

અસ્યા અપ્યતિરૂપેણ દેવરાજઃ શતક્રતુઃ ।
મોહિતો લોભયામાસ હ્યહલ્યાં બલસૂદનઃ

માં ભજસ્વ વરારોહે દેવરાજમનિન્દિતે ।
ક્રીડયસ્વ મયા સાર્દ્ધં ત્રિષુ લોકેષુ પૂજિતા

કિં કરિષ્યસિ વિપ્રેણ શૌચાચારકૃશેન તુ ।
તપઃસ્વાધ્યાયશીલેન ક્લિશ્યન્તીવ સુલોચને

એવમુક્તા વરારોહા સ્ત્રીસ્વભાવાત્સુચઞ્ચલા ।
મનસાધ્યાય શક્રં સા કામેન કલુષીકૃતા

તસ્યા વિદિત્વા તં ભાવં સ દેવઃ પાકશાસનઃ ।
ગૌતમં વઞ્ચયામાસ દુષ્ટભાવેન ભાવિતઃ

વિદિત્વા ચાન્તરં તસ્ય ગૃહીત્વા વેષમુત્તમમ્ ।
અહલ્યાં રમયામાસ વિશ્વસ્તાં મન્દિરાન્તિકે

ક્ષણમાત્રાન્તરે તત્ર દેવરાજસ્ય ભારત ।
આજગામ મુનિશ્રેષ્ઠો મન્દિરં ત્વરયાન્વિતઃ

આગતં ગૌતમં દૃષ્ટ્વા ભીતભીતઃ પુરંદરઃ ।
નિર્ગતઃ સ તતો દૃષ્ટ્વા શક્રોઽયમિતિ ચિન્તયન્

તતઃ શશાપ દેવેન્દ્રં ગૌતમઃ ક્રોધમૂર્છિતઃ ।
અજિતેન્દ્રિયોઽસિ યસ્માત્ત્વં તસ્માદ્બહુભગો ભવ

એવમુક્તસ્તુ દેવેન્દ્રસ્તત્ક્ષણાદેવ ભારત ।
ભગાનાં તુ સહસ્રેણ તત્ક્ષણાદેવ વેષ્ટિતઃ

ત્યક્ત્વા રાજ્યં સુરૈઃ સાર્દ્ધં ગતશ્રીકો જગામ હ ।
તપશ્ચચાર વિપુલં ગૌતમેન મહીતલે

અહલ્યાપિ તતઃ શપ્તા યસ્માત્ત્વં દુષ્ટચારિણી ।
પ્રેક્ષ્ય માં રમસે શક્રં તસ્માદશ્મમયી ભવ

ગતે વર્ષસહસ્રાન્તે રામં દૃષ્ટ્વા યશસ્વિનમ્ ।
તીર્થયાત્રાપ્રસઙ્ગેન ધૌતપાપા ભવિષ્યસિ

એવં ગતે તતઃ કાલે દૃષ્ટા રામેણ ધીમતા ।
વિશ્વામિત્રસહાયેન ત્યક્ત્વા સાશ્મમયીં તનુમ્

પૂજયિત્વા યથાન્યાયં ગતપાપા વિમત્સરા ।
આગતા નર્મદાતીરે તીર્થે સ્નાત્વા યથાવિધિ

કૃતં ચાન્દ્રાયણં માસં કૃચ્છ્રં ચાન્યં તતઃ પરમ્ ।
તતસ્તુષ્ટો મહાદેવો દત્ત્વા વરમનુત્તમમ્

જગામાદર્શનં ભૂયો રેમે ચોમાપતિશ્ચિરમ્ ।
અહલ્યા તુ ગતે દેવે સ્થાપયિત્વા જગદ્ગુરુમ્

અહલ્યેશ્વરનામાનં સ્વગૃહે ચાગમત્પુનઃ ।
તત્ર તીર્થે તુ યઃ સ્નાત્વા પૂજયેત્પરમેશ્વરમ્

સ મૃતઃ સ્વર્ગમાપ્નોતિ યત્ર દેવો મહેશ્વરઃ ।
ક્રીડયિત્વા યથાકામં તત્ર લોકે મહાતપાઃ

ગતે વર્ષસહસ્રાન્તે માનુષ્યં લભતે પુનઃ ।
ધનધાન્યચયોપેતઃ પુત્રપૌત્રસમન્વિતઃ

વેદવિદ્યાશ્રયો ધીમાઞ્જાયતે વિમલે કુલે ।
રૂપસૌભાગ્યસમ્પન્નઃ સર્વવ્યાધિવિવર્જિતઃ ।
જીવેદ્વર્ષશતં સાગ્રમહલ્યાતીર્થસેવનાત્

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે અહલ્યાતીર્થમાહાત્મ્યવર્ણનં નામ ષટ્ત્રિંશદધિકશતતમોઽધ્યાયઃ ॥