સ્કંદ પુરાણ · અધ્યાય 5.135

શ્રીમાર્કણ્ડેય ઉવાચ -
તસ્યૈવાનન્તરં ચાન્યત્સિદ્ધેશ્વરમનુત્તમમ્ ।
તીર્થં સર્વગુણોપેતં સર્વલોકેષુ પૂજિતમ્

તત્ર તીર્થે તુ યઃ સ્નાત્વા હ્યુમારુદ્રં પ્રપૂજયેત્ ।
વાજપેયસ્ય યજ્ઞસ્ય સ લભેત્ફલમુત્તમમ્

તેન પુણ્યેન મહતા મૃતઃ સ્વર્ગમવાપ્નુયાત્ ।
અપ્સરોગણસંવીતો જયશબ્દાદિમઙ્ગલૈઃ

સહસ્રવત્સરાંસ્તત્ર ક્રીડયિત્વા યથાસુખમ્ ।
ધનધાન્યસમોપેતે કુલે મહતિ જાયતે

પૂજ્યમાનો નરશ્રેષ્ઠ વેદવેદાઙ્ગપારગઃ ।
વ્યાધિશોકવિનિર્મુક્તો જીવેચ્ચ શરદાં શતમ્

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે સિદ્ધેશ્વરમાહાત્મ્યવર્ણનં નામ પઞ્ચત્રિંશદધિકશતતમોઽધ્યાયઃ ॥