Skanda Purana · Verses 5.13-2

// hara uvāca // //
viddhi kāmeśvaraṃ devi tatra liṃgaṃ trayodaśam //
yasya darśanamātreṇa saubhāgyaṃ jāyate śubham

brahmaṇo dhyāyamānasya prajākāmasya pārvati //
utpanno'rkaprabhākāro lāvaṇyanicayo mahān //
alaṃkārāvṛtaḥ kāṃto divyamaṃḍanamaṃḍitaḥ

taṃ dṛṣṭvā paramaṃ divyaṃ kāṃtaṃ saubhāgyaśobhitam //
apratarkyamavijñeyaṃ brahmā provāca taṃ tadā

ko bhavānkiṃ nimittaṃ tu iha vā kimupāgataḥ //
vada tvaṃ manmathākāra kaṃdarpa iva lakṣyame

brahmaṇo vacanaṃ śrutvā proktaṃ tenaiva sādaram //
ahaṃ te sṛṣṭikāmasya bhāvena vihitoṃśakaḥ //
prajāpate mahābhāga kiṃ karomi diśasva mām

brahmovāca // //
mayā tu sṛṣṭikāmena ye prajāpatayaḥ kṛtāḥ //
na te śaktāḥ prajāḥ sraṣṭuṃ kāmaite sukhamāpnuyuḥ

tvamagraṇīḥ prajāsarge tvadadhīnamidaṃ jagat //
kuru sṛṣṭiṃ vicitrāṃ ca kaṃdarpa mama śāsanāt

ityukto brahmaṇā devi jagāmādarśanaṃ smaraḥ//
kruddhena brahmaṇā śapto vināśaṃ yāsyasi dhruvam

madvaco na kṛtaṃ yasmādbhavanetrodbhavāgninā//
tacchrutvā dāruṇaṃ śāpaṃ kaṃdarpo bhayavihvalaḥ//
brahmāṇaṃ praṇato bhūtvā prahvaḥ prāṃjalirabravīt

prasīda devadeveśa ananyagatike mayi//
nahi nirbharatāṃ yāṃti prabhūṇāmāśrite ruṣaḥ

//brahmovāca//
yasmātte bhaktiratulā mamopari mahāmate //
tasmātsthānāni dattāni tava dvādaśa saṃkhyayā

kāminīnāṃ kaṭākṣeṣu keśapāśeṣu caiva hi //
jaghanastananābhau tu dormūle'dharapallave

vasaṃte kokilālāpe jyotsnāyāṃ jaladāgame //
kāmārthe ca mayā dattau sabalau madhumādhavau

striyo'mṛtamayā dhanyā saṃsāre sārakāraṇam //
rateścaiva nidhānāni saṃtānārthaṃ vinirmitāḥ

etābhirvaranārībhirjagadevaṃ vaśīkṛtam //
strībhirāsaktamanasaḥ kutaḥ puṃso manasvitā

kṛtaścāpi svavaśatā strīgauravagatasya ca //
striya eva vināśāya pūrveṣāmamaradviṣām

striya eva hi devānāmiṃdrādīnāṃ bhayāśrayāḥ //
nārībhirlabdhavṛtteśca puruṣasyāpi sarvataḥ

parābhavaḥ prabhavati vivaśatvaṃ ca bhīṣaṇam //
strībhirājitacittasya sulabho vipadodayaḥ

ityukto manmatho bhadre brahmaṇā ca visarjitaḥ //
dattvā vai puṣpakaṃ cāpaṃ tathā vai bāṇapaṃcakam

ratiprītisamāyukto jhaṣaketurmanobhavaḥ //
viḍaṃbayati lokāṃstrīnsasahāyo dhanurdharaḥ

paṃḍitāṃstāpasānvīrānsudhiyaśca jiteṃdriyān //
kāle kuśalabhāvajñāndevānpitṛgaṇāṃstathā

bhūtapretapiśācāṃśca yakṣagaṃdharvakiṃnarān //
kṛmikīṭapataṃgāṃśca bhūtagrāmaṃ caturvidham

mamārthe ca kṛto yatnaściṃtayitvā punaḥpunaḥ //
duḥsādhyaḥ śaṃkaro devaḥ śrūyate bhuvanatraye //
tasya devasya kaḥ śaktaḥ kṣobhaṇārthaṃ mayā vinā

ityuktvā tu samāyāto yatrāhaṃ tapasi sthitaḥ //
ratyā yutaḥ sa garveṇa sakhyā'yaṃ madhunāśritaḥ //

dṛṣṭavānmāṃ tadā kāmaḥ piṃjakūṭajaṭāsaṭam //
kiṃcinnimittato'nidraṃ bhogīṃdrakṛtabhūṣaṇam

prekṣamāṇamṛjusthānaṃ nāsāvaṃśāgra locanam//
tato'vamarakākāramālaṃbyāśrayamātrakam

praviṣṭaḥ kararaṃdhreṇa madano hṛdaye mama//
ratyarthaṃ kāmataptena saṃsmṛtā bhavatī mayā

samādherbhāvanā divyā lakṣyapratyakṣarūpiṇī //
gatā mama vimalatā tatkṣaṇādeva pārvati

unmattatāṃ gato'haṃ vai vikṛtiṃ madanātmikām //
nirākṛtaṃ mayā devi dhairyamālaṃbya yatnataḥ

dṛṣṭo mayātmahṛdaye manmatho'pathyakārakaḥ //
dehasthaṃ nirdahiṣyāmi pratyāhāraprayogataḥ

amānuṣīṃ vrajedyoniṃ yoginaṃ praviśedyadi //
bāhyāgnau dhāraṇāṃ kṛtvā dehasaṃsthe vinirdahet

etasminnaṃtare so'pi saṃtapto madano bhṛśam//
icchāśarīro durjñeyo niḥsṛto vyasanātmakaḥ

sahakāratarormūle bhūtvā madhusakhastadā //
mumoca mohanaṃ nāma mārgaṇaṃ makaradhvajaḥ

sa cāpi hṛdaye prāpto madīye līlayā śaraḥ //
tatohaṃ kupito devi netraṃ kṛtvā tṛtīyakam

tannetravisphuliṃgena krośatāṃ nākavāsinām//
gamito bhasmasāttūrṇaṃ kaṃdarpaḥ kāmidarpakaḥ

tasmindagdhe tataḥ kāme ratiḥ śokaparāyaṇā //
vilalāpa suduḥkhārtā patibhaktiparāyaṇā //

hā nātha hā mama prāṇa hā svāminkiṃ jahāsi mām //
pativratāṃ patiprāṇāṃ kasmānmāṃ tyajasi prabho

evaṃ ca vilapaṃtīṃ tāṃ vāguvā cāśarīriṇī //
mā tvaṃ ruda viśālākṣi punareṣa patistava //
prasādāddevadevasya utthāsyati śivasya ca

prārthito'haṃ tato devi tasminnavasare priye //
eṣa kāmastvayā dagdhaḥ krodhena parameśvara

yenānena prabho naṣṭā sṛṣṭirvai dharaṇītale //
kṛpāṃ vidhehi deveśa dīnāyai dehi me patim //

tato'hamabruvaṃ devi tāṃ ratiṃ dīnabhāṣiṇīm //
anena madanenādya kṛtaṃ taralitaṃ manaḥ

tato dagdhaṃ mayāsyāṃgaṃ jīvaye tvatprasādataḥ//
aṃgaṃ dagdhaṃ mayāsyādya tṛtīyanetravahninā

tasmādanaṃga evaiṣa prajāsu vicariṣyati //
anaṃgo'pi yadāvaṃtyāṃ liṃgaṃ saṃsevayiṣyati

devānāmanukaṃpārthamanaṃgo'sau kṛto mayā //
tridaśaiśca samādiṣṭaḥ kāmo'vaṃtyāṃ jagāma ha

tatra gatvā hyanaṃgo'pi bhaktibhāvasamanvitaḥ //
dadarśa paramaṃ liṃgaṃ samīhitaphalapradam

proktaṃ tuṣṭena liṃgena kāma kāmamavāpsyasi //
anaṃgo'pi samarthastvaṃ bhaviṣyasi na saṃśayaḥ

janma prāpsyati rukmiṇyā garbhe kṛṣṇasya saṃgamāt //
bhavitā viśruto loke nāmnā śaṃbarasūdanaḥ

anaṃgena tvayā yasmānmanasā toṣi to'pi san//
tasmātkhyātiṃ gamiṣyāmi tvannāmnā kāma sarvadā

ye tvāṃ paśyaṃti kaṃdarpaṃ bhaktyā paramayā yutāḥ //
prāpnuvaṃti gatiṃ nityaṃ te sadānaṃdadāyikām

dīrghāyuṣo bhaviṣyaṃti rūpaṃ teṣāṃ bhaviṣyati //
kulaṃ ca nirmalaṃ teṣāṃ ye tvāṃ paśyaṃti manmatha

aiśvaryaṃ paramānbhogānstriyo divyakalānvitāḥ //
arogā saṃtatisteṣāṃ bhaviṣyati na saṃśayaḥ

caitraśuklatrayodaśyāṃ ye māṃ paśyaṃti bhaktitaḥ //
devalokaṃ samāsādya modiṣyaṃti hi te narāḥ

yakṣā gaṇeśvarāḥ siddhāḥ siddhagaṃdharvasevitāḥ //
rudralokaṃ gamiṣyaṃti vimānaiḥ sarvakāmikaiḥ

ityuktaḥ kāmadevopi liṃgena parameśvari //
tatrāśramapadaṃ cakre tasya liṃgasya saṃnidhau

eṣa te kathito devi prabhāvaḥ pāpanāśanaḥ //
kāmeśvarasya śṛṇvagre kuṭuṃbeśvaravaibhavam

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe caturaśītiliṅgamāhātmye kāmeśvaramāhātmyavarṇanaṃnāma trayodaśo'dhyāyaḥ