Skanda Purana · Chapter 5.126

mārkaṇḍeya uvāca -
tato gacchettu rājendra paraṃ tīrthamayonijam /
snātamātro narastatra na paśyedyonisaṅkaṭam

tatra tīrthe naraḥ snātvā pūjayeddevamīśvaram /
ayonijo mahādeva yathā tvaṃ parameśvara

tathā mocaya māṃ deva sambhavādyonisaṅkaṭāt /
gandhapuṣpādidhūpaiśca sa mucyetsarvapātakaiḥ

tasya devasya yo bhaktyā kurute liṅgapūraṇam /
sa vaseddevadevasya yāvatsikthasya saṃkhyayā

ayonije mahādevaṃ snāpayedgandhavāriṇā /
madhukṣīreṇa dadhnā vā sa labhedvipulāṃ śriyam

aṣṭabhyāṃ ca site pakṣe asitāṃ vā caturdaśīm /
pūjayitvā mahādevaṃ prīṇayedgītavādyakaiḥ

vasetsa ca śive loke ye kurvanti manoharam /
te vasanti śive loke yāvadābhūtasamplavam

tasya devasya bhaktyā tu yaḥ karoti pradakṣiṇām /
vijñāpayaṃśca satataṃ mantreṇānena bhārata

tasya yatphalamuddiṣṭaṃ pāramparyeṇa mānavaiḥ /
sakāśāddevadevasya tacchṛṇuṣva samādhinā

ayonijo mahādeva yathā tvaṃ parameśvara /
tathā mocaya māṃ śarva sambhavādyonisaṅkaṭāt

kiṃ tasya bahubhirmantraiḥ kaṃṭhaśoṣaṇatatparaiḥ /
yenauṃnamaḥ śivāyeti proktaṃ devasya saṃnidhau

tenādhītaṃ śrutaṃ tena tena sarvamanuṣṭhitam /
yenauṃnamaḥ śivāyeti mantrābhyāsaḥ sthirīkṛtaḥ

na tatphalamavāpnoti sarvadeveṣu vai dvijaḥ /
yatphalaṃ samavāpnoti ṣaḍakṣara udīraṇāt

tatra tīrthe tu yaḥ snātvā pūjayecchivayoginam /
dvijānāmayutaṃ sāgraṃ sa labhetphalamuttamam

athavā bhaktiyuktastu teṣāṃ dānte jitendriye /
saṃskṛtya dadate bhikṣāṃ phalaṃ tasya tato'dhikam

yatihaste jalaṃ dadyādbhikṣāṃ dattvā punarjalam /
sā bhikṣā meruṇā tulyā tajjalaṃ sāgaropamam

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe ayoniprabhavatīrthamāhātmyavarṇanaṃ nāma ṣaḍviṃśatyuttaraśatatamo'dhyāyaḥ //