સ્કંદ પુરાણ · અધ્યાય 5.126

માર્કણ્ડેય ઉવાચ -
તતો ગચ્છેત્તુ રાજેન્દ્ર પરં તીર્થમયોનિજમ્ ।
સ્નાતમાત્રો નરસ્તત્ર ન પશ્યેદ્યોનિસઙ્કટમ્

તત્ર તીર્થે નરઃ સ્નાત્વા પૂજયેદ્દેવમીશ્વરમ્ ।
અયોનિજો મહાદેવ યથા ત્વં પરમેશ્વર

તથા મોચય માં દેવ સમ્ભવાદ્યોનિસઙ્કટાત્ ।
ગન્ધપુષ્પાદિધૂપૈશ્ચ સ મુચ્યેત્સર્વપાતકૈઃ

તસ્ય દેવસ્ય યો ભક્ત્યા કુરુતે લિઙ્ગપૂરણમ્ ।
સ વસેદ્દેવદેવસ્ય યાવત્સિક્થસ્ય સંખ્યયા

અયોનિજે મહાદેવં સ્નાપયેદ્ગન્ધવારિણા ।
મધુક્ષીરેણ દધ્ના વા સ લભેદ્વિપુલાં શ્રિયમ્

અષ્ટભ્યાં ચ સિતે પક્ષે અસિતાં વા ચતુર્દશીમ્ ।
પૂજયિત્વા મહાદેવં પ્રીણયેદ્ગીતવાદ્યકૈઃ

વસેત્સ ચ શિવે લોકે યે કુર્વન્તિ મનોહરમ્ ।
તે વસન્તિ શિવે લોકે યાવદાભૂતસમ્પ્લવમ્

તસ્ય દેવસ્ય ભક્ત્યા તુ યઃ કરોતિ પ્રદક્ષિણામ્ ।
વિજ્ઞાપયંશ્ચ સતતં મન્ત્રેણાનેન ભારત

તસ્ય યત્ફલમુદ્દિષ્ટં પારમ્પર્યેણ માનવૈઃ ।
સકાશાદ્દેવદેવસ્ય તચ્છૃણુષ્વ સમાધિના

અયોનિજો મહાદેવ યથા ત્વં પરમેશ્વર ।
તથા મોચય માં શર્વ સમ્ભવાદ્યોનિસઙ્કટાત્

કિં તસ્ય બહુભિર્મન્ત્રૈઃ કંઠશોષણતત્પરૈઃ ।
યેનૌંનમઃ શિવાયેતિ પ્રોક્તં દેવસ્ય સંનિધૌ

તેનાધીતં શ્રુતં તેન તેન સર્વમનુષ્ઠિતમ્ ।
યેનૌંનમઃ શિવાયેતિ મન્ત્રાભ્યાસઃ સ્થિરીકૃતઃ

ન તત્ફલમવાપ્નોતિ સર્વદેવેષુ વૈ દ્વિજઃ ।
યત્ફલં સમવાપ્નોતિ ષડક્ષર ઉદીરણાત્

તત્ર તીર્થે તુ યઃ સ્નાત્વા પૂજયેચ્છિવયોગિનમ્ ।
દ્વિજાનામયુતં સાગ્રં સ લભેત્ફલમુત્તમમ્

અથવા ભક્તિયુક્તસ્તુ તેષાં દાન્તે જિતેન્દ્રિયે ।
સંસ્કૃત્ય દદતે ભિક્ષાં ફલં તસ્ય તતોઽધિકમ્

યતિહસ્તે જલં દદ્યાદ્ભિક્ષાં દત્ત્વા પુનર્જલમ્ ।
સા ભિક્ષા મેરુણા તુલ્યા તજ્જલં સાગરોપમમ્

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે અયોનિપ્રભવતીર્થમાહાત્મ્યવર્ણનં નામ ષડ્વિંશત્યુત્તરશતતમોઽધ્યાયઃ ॥