Skanda Purana · Verses 5.11-2

// // śrīmahādeva uvāca // //
liṃgamekādaśaṃ viddhi devi siddheśvaraṃ śubham //
vīrabhadrasamīpe tu sarvasiddhipradāyakam

deva dāruvane pūrvaṃ viprā yogasamanvitāḥ //
sparddhayā siddhilabdhyarthaṃ tapo'kurvata saṃyatāḥ

śākāhārā nirāhārāḥ parṇāhārāstathāpare //
daṃtolūkhalinaḥ kecidaśmakuṭṭāstathā pare

kecidvīrāsanaratā dhūmrapānaratāḥ pare //
pādairūrdhvairadhovaktraiḥ kecidabhrāvakāśikāḥ

kṛcchracāṃdrāyaṇādīni kurvantyanye samāhitāḥ //
na cāpi paramā prāptā siddhirvarṣaśatairapi

duḥkhārttāściṃtayāmāsuḥ kathaṃ siddhirbhaviṣyati //
tapasā duṣkareṇaiva siddhirna vātra labhyate

vyarthā śrutistathā jātā yā gītā munibhiḥ purā //
tapasā labhyate sarvaṃ tapomūlamidaṃ jagat

aṃjanaṃ guṭikā caiva pādukāgamanaṃ tathā //
khaḍgasiddhirbile vāsaściṃtāmaṇirapekṣitam

evaṃ te'ciṃtayasiddhāḥ paramāmarṣapūritāḥ //
utsārya tattapodharmaṃ nāstikyaṃ bhāvamāgatāḥ

etasminneva kāle tu vāguvācāśarīriṇī //
āśvāsayaṃtī tānsiddhānmātā putramivaurasam

mā'vamanyadhvamāryā hi śrutirvyarthā mahītale //
tapo na niṃdyaṃ dharmo vā śrūyatāmatra kāraṇam

bhavitā bhavatāṃ siddhiratra naiva tapodhanāḥ //
sparddhayā siddhikāmaiśca tapastaddhi kṛtaṃ vṛthā

kāmācca tapaso hānirahaṃkārācca vismayaḥ //
krodhāllobhāttathā mohājjāyate nātra saṃśayaḥ //

sparddhayā rahito yastu kāmakrodhavivarjitaḥ //
karoti karma bhāvena sa tapaḥphalamaśnute

vāsanāvāsito yastu ekacittaḥ samāhitaḥ //
āstikaḥ śraddadhānaśca sa tapaḥphalamaśnute

mātṛvatparadārāṇi paradravyāṇi loṣṭavat //
yaḥ paśyati naro nityaṃ sa tapaḥ phalamaśnute

īdṛśe puruṣe viprāstapaḥsiddhiśca dṛśyate //
bhavaṃtaḥ sparddhayā caiva kṛtavaṃtaśca duṣkaram

tasmādvarṣasahasreṇa naiva siddhirbhaviṣyati //
yadi madvacanaṃ kāryaṃ nirvikalpena cetasā

mahākālavanaṃ gatvā yūyaṃ sarve samāhitāḥ //
ārādhayadhvaṃ deveśaṃ sadā siddhipradāyakam

darśanāttasya devasya labhyate siddhiruttamā //
sanakādayo'pi ye devamāsādya yogatatparāḥ //
pūjayitvāpi bhāvena saṃsiddhiṃ paramāṃ gatāḥ

rājñā vasumatā pūrvaṃ khaṅgasiddhiḥ sudurlabhā //
prāptā darśanamātreṇa liṃgasyāsya prabhāvataḥ

pādukāgamanaṃ labdhaṃ haihayena mahātmanā //
kṛtavīrātmajenaiva vāhānāṃ ca sahasrakam

adṛśyakaraṇaṃ caiva prāptaṃ cānūruṇā purā//
svarṇasiddhiśca siddhena pādalepo rasāyanam//
aṃjanaṃ ca tathā labdhaṃ liṃgasyāsya ca darśanāt

ākāśavacanaṃ śrutvā te siddhā vismayānvitāḥ//
samāyātā mudā yuktā mahākālavanottame

sarvasiddhipradaṃ caiva dadṛśurliṃgamuttamam //
darśanāttasya liṃgasya saṃsiddhiṃ paramāṃ gatāḥ

tataḥprabhṛti vikhyāto devaiḥ siddheśvaraḥ paraḥ //
ye paśyaṃti narā devi devaṃ siddheśvaraṃ param //
na teṣāṃ durlabhā siddhirbhaviṣyati mahītale

siddheśvaraṃ gamiṣyaṃti bhāvahīnāḥ prasaṃgataḥ //
saṃsiddhāste bhaviṣyaṃti niyatā nātra saṃśayaḥ

mahāpātakasaṃyukto yastu siddheśvaraṃ smaret //
saṃsiddhastu bhavennūnaṃ jñānaiśvaryasamanvitaḥ

niyamena tu yaḥ paśyeddevaṃ siddheśvaraṃ param //
ṣaṇmāsājjāyate siddhirvāṃchitā yā bhaveddhṛdi

aṣṭamyāṃ ca caturddaśyāṃ kṛṣṇapakṣe viśeṣataḥ //
siddheśvaraṃ tu yaḥ paśyetsa paśyenmama maṃdiram

aputro labhate putraṃ nirdhanastu dhanaṃ labhet //
vidyārthī labhate vidyāṃ bhāryārthī labhate striyam //

saṃkrāṃtau somavāre ca grahaṇe caiva yo'rcayet //
kulānāṃ śatamuddhṛtya paitṛkaṃ svādhikaṃ priye //
modate mama loke ca yāvadiṃdrāścaturdaśa

eṣa te kathito devi prabhāvaḥ pāpanāśanaḥ //
siddheśvarasya devasya lokapāleśvaraṃ śṛṇu

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe caturaśītiliṃgamāhātmye siddheśvaramāhātmyavarṇanaṃnāmaikādaśo'dhyāyaḥ