Skanda Purana · Chapter 5.11

athātaḥ saṃpravakṣyāmi tīrthaṃ vidyādharasya tu //
tatra snātvā śucirbhūtvā vidyādharapatirbhavet

// vyāsa uvāca // //
kathaṃ tīrthamidaṃ kṣetre jātamatra mahāmune //
prasādādbrūhi me brahmañchrotumicchāmi sāṃpratam

// sanatkumāra uvāca // //
vidyādharapatiḥ kaścidāsīdrūpadharaḥ purā //
grathitā pārijātasya mālā tena manoramā

gṛhītvā ca sa tāṃ mālāṃ gato vāsavaveśmani //
nṛtyaṃtī vāsavasyāgre dṛṣṭā tena ca menakā

dattā tasyai tadā tena sā mālā nṛtyamāśritaḥ //
sā menakāstutā'sthāne mālayā mohitā bhavat/ ५ //
kopāviṣṭena śakreṇa śapto vidyādharastadā //
pṛthivyāṃ gaccha pāpiṣṭha nṛtyabhaṃgastvayā kṛtaḥ

vidyādharapadaṃ tyaktvā mama śāpācca sāṃpratam//
evamuktastu śakreṇa vākyaṃ vidyādharo'bravīta

ajānatā mayā nātha aparādhaḥ kṛto'dhunā //
anugrahamato deva kuru me tvaṃ prasā dataḥ

evamuktaḥ sa śakro vai vidyādharamuvāca ha //
gacchāvaṃtīṃ tvamadyaiva yatrāste gāṃgaṭī guhā

tasyāścottarabhāge tu vidyate tīrthamuttamam //
khyātaṃ tattriṣu lokeṣu nāmnā vidyādharaṃ śubham

bhaktyā tatra kṛte snāne vidyādharapatirbhavet //
atastvamapi tatraiva kuru snānaṃ prayatnataḥ

evamuktaḥ sa śakreṇa āgato'vaṃtimaṃḍale //
snānaṃ kṛtvā ca tenaiva tīrthe tasminmanorame

prabhāvāttasya tīrthasya punaḥ prāptaṃ padaṃ svakam //
evaṃ vyāsa samākhyātaṃ tīrthaṃ vidyādharaṃ śubham

tatra puṣpāṇi yo dadyāccaṃdanaṃ ca vilepanam //
labhetsamastabhogānsa ihaloke paratra ca

iti śrīskāṃde mahāpurāṇa ekāśītisāhasryāṃ sahitāyāṃ pañcama āvaṃtyakhaṃḍe 'vantīkṣetramāhātmye vidyādharatīrthamāhātmyavarṇanaṃ nāmaikādaśo'dhyāyaḥ