સ્કંદ પુરાણ · શ્લોક 5.11-2

॥ ॥ શ્રીમહાદેવ ઉવાચ ॥ ॥
લિંગમેકાદશં વિદ્ધિ દેવિ સિદ્ધેશ્વરં શુભમ્ ॥
વીરભદ્રસમીપે તુ સર્વસિદ્ધિપ્રદાયકમ્

દેવ દારુવને પૂર્વં વિપ્રા યોગસમન્વિતાઃ ॥
સ્પર્દ્ધયા સિદ્ધિલબ્ધ્યર્થં તપોઽકુર્વત સંયતાઃ

શાકાહારા નિરાહારાઃ પર્ણાહારાસ્તથાપરે ॥
દંતોલૂખલિનઃ કેચિદશ્મકુટ્ટાસ્તથા પરે

કેચિદ્વીરાસનરતા ધૂમ્રપાનરતાઃ પરે ॥
પાદૈરૂર્ધ્વૈરધોવક્ત્રૈઃ કેચિદભ્રાવકાશિકાઃ

કૃચ્છ્રચાંદ્રાયણાદીનિ કુર્વન્ત્યન્યે સમાહિતાઃ ॥
ન ચાપિ પરમા પ્રાપ્તા સિદ્ધિર્વર્ષશતૈરપિ

દુઃખાર્ત્તાશ્ચિંતયામાસુઃ કથં સિદ્ધિર્ભવિષ્યતિ ॥
તપસા દુષ્કરેણૈવ સિદ્ધિર્ન વાત્ર લભ્યતે

વ્યર્થા શ્રુતિસ્તથા જાતા યા ગીતા મુનિભિઃ પુરા ॥
તપસા લભ્યતે સર્વં તપોમૂલમિદં જગત્

અંજનં ગુટિકા ચૈવ પાદુકાગમનં તથા ॥
ખડ્ગસિદ્ધિર્બિલે વાસશ્ચિંતામણિરપેક્ષિતમ્

એવં તેઽચિંતયસિદ્ધાઃ પરમામર્ષપૂરિતાઃ ॥
ઉત્સાર્ય તત્તપોધર્મં નાસ્તિક્યં ભાવમાગતાઃ

એતસ્મિન્નેવ કાલે તુ વાગુવાચાશરીરિણી ॥
આશ્વાસયંતી તાન્સિદ્ધાન્માતા પુત્રમિવૌરસમ્

માઽવમન્યધ્વમાર્યા હિ શ્રુતિર્વ્યર્થા મહીતલે ॥
તપો ન નિંદ્યં ધર્મો વા શ્રૂયતામત્ર કારણમ્

ભવિતા ભવતાં સિદ્ધિરત્ર નૈવ તપોધનાઃ ॥
સ્પર્દ્ધયા સિદ્ધિકામૈશ્ચ તપસ્તદ્ધિ કૃતં વૃથા

કામાચ્ચ તપસો હાનિરહંકારાચ્ચ વિસ્મયઃ ॥
ક્રોધાલ્લોભાત્તથા મોહાજ્જાયતે નાત્ર સંશયઃ ॥

સ્પર્દ્ધયા રહિતો યસ્તુ કામક્રોધવિવર્જિતઃ ॥
કરોતિ કર્મ ભાવેન સ તપઃફલમશ્નુતે

વાસનાવાસિતો યસ્તુ એકચિત્તઃ સમાહિતઃ ॥
આસ્તિકઃ શ્રદ્દધાનશ્ચ સ તપઃફલમશ્નુતે

માતૃવત્પરદારાણિ પરદ્રવ્યાણિ લોષ્ટવત્ ॥
યઃ પશ્યતિ નરો નિત્યં સ તપઃ ફલમશ્નુતે

ઈદૃશે પુરુષે વિપ્રાસ્તપઃસિદ્ધિશ્ચ દૃશ્યતે ॥
ભવંતઃ સ્પર્દ્ધયા ચૈવ કૃતવંતશ્ચ દુષ્કરમ્

તસ્માદ્વર્ષસહસ્રેણ નૈવ સિદ્ધિર્ભવિષ્યતિ ॥
યદિ મદ્વચનં કાર્યં નિર્વિકલ્પેન ચેતસા

મહાકાલવનં ગત્વા યૂયં સર્વે સમાહિતાઃ ॥
આરાધયધ્વં દેવેશં સદા સિદ્ધિપ્રદાયકમ્

દર્શનાત્તસ્ય દેવસ્ય લભ્યતે સિદ્ધિરુત્તમા ॥
સનકાદયોઽપિ યે દેવમાસાદ્ય યોગતત્પરાઃ ॥
પૂજયિત્વાપિ ભાવેન સંસિદ્ધિં પરમાં ગતાઃ

રાજ્ઞા વસુમતા પૂર્વં ખઙ્ગસિદ્ધિઃ સુદુર્લભા ॥
પ્રાપ્તા દર્શનમાત્રેણ લિંગસ્યાસ્ય પ્રભાવતઃ

પાદુકાગમનં લબ્ધં હૈહયેન મહાત્મના ॥
કૃતવીરાત્મજેનૈવ વાહાનાં ચ સહસ્રકમ્

અદૃશ્યકરણં ચૈવ પ્રાપ્તં ચાનૂરુણા પુરા॥
સ્વર્ણસિદ્ધિશ્ચ સિદ્ધેન પાદલેપો રસાયનમ્॥
અંજનં ચ તથા લબ્ધં લિંગસ્યાસ્ય ચ દર્શનાત્

આકાશવચનં શ્રુત્વા તે સિદ્ધા વિસ્મયાન્વિતાઃ॥
સમાયાતા મુદા યુક્તા મહાકાલવનોત્તમે

સર્વસિદ્ધિપ્રદં ચૈવ દદૃશુર્લિંગમુત્તમમ્ ॥
દર્શનાત્તસ્ય લિંગસ્ય સંસિદ્ધિં પરમાં ગતાઃ

તતઃપ્રભૃતિ વિખ્યાતો દેવૈઃ સિદ્ધેશ્વરઃ પરઃ ॥
યે પશ્યંતિ નરા દેવિ દેવં સિદ્ધેશ્વરં પરમ્ ॥
ન તેષાં દુર્લભા સિદ્ધિર્ભવિષ્યતિ મહીતલે

સિદ્ધેશ્વરં ગમિષ્યંતિ ભાવહીનાઃ પ્રસંગતઃ ॥
સંસિદ્ધાસ્તે ભવિષ્યંતિ નિયતા નાત્ર સંશયઃ

મહાપાતકસંયુક્તો યસ્તુ સિદ્ધેશ્વરં સ્મરેત્ ॥
સંસિદ્ધસ્તુ ભવેન્નૂનં જ્ઞાનૈશ્વર્યસમન્વિતઃ

નિયમેન તુ યઃ પશ્યેદ્દેવં સિદ્ધેશ્વરં પરમ્ ॥
ષણ્માસાજ્જાયતે સિદ્ધિર્વાંછિતા યા ભવેદ્ધૃદિ

અષ્ટમ્યાં ચ ચતુર્દ્દશ્યાં કૃષ્ણપક્ષે વિશેષતઃ ॥
સિદ્ધેશ્વરં તુ યઃ પશ્યેત્સ પશ્યેન્મમ મંદિરમ્

અપુત્રો લભતે પુત્રં નિર્ધનસ્તુ ધનં લભેત્ ॥
વિદ્યાર્થી લભતે વિદ્યાં ભાર્યાર્થી લભતે સ્ત્રિયમ્ ॥

સંક્રાંતૌ સોમવારે ચ ગ્રહણે ચૈવ યોઽર્ચયેત્ ॥
કુલાનાં શતમુદ્ધૃત્ય પૈતૃકં સ્વાધિકં પ્રિયે ॥
મોદતે મમ લોકે ચ યાવદિંદ્રાશ્ચતુર્દશ

એષ તે કથિતો દેવિ પ્રભાવઃ પાપનાશનઃ ॥
સિદ્ધેશ્વરસ્ય દેવસ્ય લોકપાલેશ્વરં શૃણુ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં પઞ્ચમ આવંત્યખણ્ડે ચતુરશીતિલિંગમાહાત્મ્યે સિદ્ધેશ્વરમાહાત્મ્યવર્ણનંનામૈકાદશોઽધ્યાયઃ