સ્કંદ પુરાણ · અધ્યાય 5.11

અથાતઃ સંપ્રવક્ષ્યામિ તીર્થં વિદ્યાધરસ્ય તુ ॥
તત્ર સ્નાત્વા શુચિર્ભૂત્વા વિદ્યાધરપતિર્ભવેત્

॥ વ્યાસ ઉવાચ ॥ ॥
કથં તીર્થમિદં ક્ષેત્રે જાતમત્ર મહામુને ॥
પ્રસાદાદ્બ્રૂહિ મે બ્રહ્મઞ્છ્રોતુમિચ્છામિ સાંપ્રતમ્

॥ સનત્કુમાર ઉવાચ ॥ ॥
વિદ્યાધરપતિઃ કશ્ચિદાસીદ્રૂપધરઃ પુરા ॥
ગ્રથિતા પારિજાતસ્ય માલા તેન મનોરમા

ગૃહીત્વા ચ સ તાં માલાં ગતો વાસવવેશ્મનિ ॥
નૃત્યંતી વાસવસ્યાગ્રે દૃષ્ટા તેન ચ મેનકા

દત્તા તસ્યૈ તદા તેન સા માલા નૃત્યમાશ્રિતઃ ॥
સા મેનકાસ્તુતાઽસ્થાને માલયા મોહિતા ભવત્। ૫ ॥
કોપાવિષ્ટેન શક્રેણ શપ્તો વિદ્યાધરસ્તદા ॥
પૃથિવ્યાં ગચ્છ પાપિષ્ઠ નૃત્યભંગસ્ત્વયા કૃતઃ

વિદ્યાધરપદં ત્યક્ત્વા મમ શાપાચ્ચ સાંપ્રતમ્॥
એવમુક્તસ્તુ શક્રેણ વાક્યં વિદ્યાધરોઽબ્રવીત

અજાનતા મયા નાથ અપરાધઃ કૃતોઽધુના ॥
અનુગ્રહમતો દેવ કુરુ મે ત્વં પ્રસા દતઃ

એવમુક્તઃ સ શક્રો વૈ વિદ્યાધરમુવાચ હ ॥
ગચ્છાવંતીં ત્વમદ્યૈવ યત્રાસ્તે ગાંગટી ગુહા

તસ્યાશ્ચોત્તરભાગે તુ વિદ્યતે તીર્થમુત્તમમ્ ॥
ખ્યાતં તત્ત્રિષુ લોકેષુ નામ્ના વિદ્યાધરં શુભમ્

ભક્ત્યા તત્ર કૃતે સ્નાને વિદ્યાધરપતિર્ભવેત્ ॥
અતસ્ત્વમપિ તત્રૈવ કુરુ સ્નાનં પ્રયત્નતઃ

એવમુક્તઃ સ શક્રેણ આગતોઽવંતિમંડલે ॥
સ્નાનં કૃત્વા ચ તેનૈવ તીર્થે તસ્મિન્મનોરમે

પ્રભાવાત્તસ્ય તીર્થસ્ય પુનઃ પ્રાપ્તં પદં સ્વકમ્ ॥
એવં વ્યાસ સમાખ્યાતં તીર્થં વિદ્યાધરં શુભમ્

તત્ર પુષ્પાણિ યો દદ્યાચ્ચંદનં ચ વિલેપનમ્ ॥
લભેત્સમસ્તભોગાન્સ ઇહલોકે પરત્ર ચ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સહિતાયાં પઞ્ચમ આવંત્યખંડે ઽવન્તીક્ષેત્રમાહાત્મ્યે વિદ્યાધરતીર્થમાહાત્મ્યવર્ણનં નામૈકાદશોઽધ્યાયઃ