Skanda Purana · Verses 5.10-2

// śrīmahādeva uvāca // //
karkoṭeśvarasaṃjñaṃ ca daśamaṃ viddhi pārvati //
yasya darśanamātreṇa viṣairnaivābhibhūyate

mātrā ca bhujagāḥ śaptāḥ svavacobhaṃgakāraṇāt //
madvaco na kṛtaṃ yasmādbhavadbhiḥ pāpakarmaṇi

vahnirhi dhakṣyate yuṣmānsatre janmejayasya hi //
śrutvā śāpaṃ tato māturmṛtyubhītāśca pannagāḥ

gatāḥ sarve yathāsthānaṃ jīvanārthaṃ yaśasvini //
himaśailaṃ gataḥ śeṣastapaḥ karttuṃ tataḥ priye

sarpaśca kaṃbalonāma lokaṃ paitāmahaṃ gataḥ //
śaṃkhacūḍo'tha nāgeṃdro maṇipūraṃ gatastataḥ

yamunāṃbhasi saṃlīnaḥ kāliyo bhayavihvalaḥ

evaṃ te sarparā jāno nāgāḥ susmitaśobhane //
kurukṣetre gatāḥ sarve tapaścartuṃ yaśasvini//
dhṛtarāṣṭrastathā nāgaḥ prayāgamagamatpriye ४७///
elāpatrastu nāgeṃdro brahmalokaṃ jagāma ha //
praṇamya tamathovāca māturutsaṃgasaṃsthitāḥ

mātrā śaptā vayaṃ deva kruddhayā tava saṃnidhau //
sā kathaṃ śāpakāle tu bhavatā na nivāri tā

// brahmovāca // //
niṣiddhā naiva te mātā bhāvikarmabalānmama //
sarpasatro hi bhavitā rājño janmejayasya ca

tvaṃ ca vatsa mamādeśānmahākālavanaṃ vraja //]
śāṃtyarthaṃ sarvanāgānāṃ bhaktyā yuktastu satvaram

samārādhaya deveśaṃ mahāmāyāsamīpataḥ//
bhavitā tatra te siddhi devadevaprasādataḥ

tatra gatvātha karkoṭaḥ svayaṃ devi samāhitaḥ //
devamārādhayāmāsa mahāmāyāpuraḥsthitaḥ //
tasya tuṣṭotha deveśo varaṃ prādādya śasvini

ye daṃdaśūkāḥ krūrāśca pāpācārā viṣolbaṇāḥ //
teṣāṃ vināśo bhavitā na tu ye dharmacāriṇaḥ

bhaktyā tavādya tuṣṭosmi tvaṃ me sāyujyatāṃ vraja //
deve tatra vilīnotha nāgaḥ karkoṭakaḥ priye

karkoṭakeśvaraḥ khyātastato devo maheśvaraḥ//
tasya darśanamātreṇa vyādhayo yāṃti saṃkṣayam

yastaṃ pūjayate devaṃ bhaktyā yukto hi mānavaḥ //
aiśvaryaṃ jāyate tasya kulānāṃ tārayecchatam

vyādhito vyādhito mukto duḥkhī duḥkhātpramucyate //
darśanāttu bhavetsadya sarvapātakavarjitaḥ

niyamena prapaśyaṃti ye ca karkoṭakeśvaram //
te sarvakāmānāpsyaṃti vasaṃtyaṃte ca matpure

paṃcamyāṃ ca caturdaśyāṃ ye paśyaṃti raverdine //
na teṣāṃ tu kule sarpāḥ pīḍāṃ kurvaṃti karhicit

yā nārī durbhagā sāpi saubhāgyaṃ labhate sadā //
gurviṇī labhate putramarogaṃ kulabhūṣaṇam //
śiśugrahāśca naśyaṃti nāpamṛtyubhayaṃ bhavet

yaṃyaṃ kāmamabhidhyāyenmana sā bhaktimānnaraḥ //
taṃtaṃ durllabhamāpnoti karkoṭeśvaradarśanāt

eṣa te kathito devi prabhāvaḥ pāpanāśanaḥ //
karkoṭeśvaradevasya śṛṇu siddheśvaraṃ param

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṃḍe caturaśītiliṅgamāhātmye karkoṭeśvaramāhātmyavarṇanaṃnāma daśamo'dhyāyaḥ // १०